ច្រវាក់ទី១. ខឹងច្រើន ទើសច្រើន ចិត្តមិនស្ងប់ទេ៖ បើអ្នកមិនបានអប់រំចិត្តដោយសតិបញ្ញា ចិត្តរបស់អ្នកមិនស្ងប់ទេ។ ព្រះភិក្ខុជិរប្បញ្ញោ គូ សុភាព បានសម្តែងថា អ្នកពូកែខឹងច្រើន ទើសច្រើន ច្រើនតែធ្វើឱ្យចិត្តជាប់ច្រវាក់ជាមួយក្តីមួម៉ៅ ភាពស្មុគស្មាញ និងពិបាកចិត្ត ទាំងអស់នេះជាសំរាមនាំឱ្យចិត្តមនុស្សគ្មានលំហូរចិត្តទៅរកក្តីស្ងប់សោះ។ ពាក្យខ្មែរយើងថា “ខឹងខុស ខឹងខាត”។ ពេលខ្លះអ្នកប្រើកំហឹងមួយឆាវទៅលើកិច្ចការនិងនរណាម្នាក់ អាចឱ្យអ្នកដេកស្តាយក្រោយអស់មួយជីវិតពីទង្វើរបស់ខ្លួនក៏មានដែរ។

ព្រះពុទ្ធបានសម្លែងថា “អ្នកមិនអាចដាក់ទណ្ឌកម្មលើអ្នកដទៃពេលខ្លួនកំពុងតែខឹងនោះទេ ព្រោះតែកំហឹងនេះឯងធ្វើឱ្យបេះដូងរបស់អ្នកឈឺចាប់មុនគេ។ ពេលអ្នកលះបង់កំហឹងគុំកួនចេញពីចិត្តដោយក្តីមេត្តា ចិត្តអ្នកនឹងស្ងប់”។ បើអ្នកចង់បានចិត្តស្ងប់ អ្នកត្រូវគិតថា ជីវិតគេក៏មានទុក្ខលំបាកដែរ បើអញខឹងគេ ទុក្ខក្នុងចិត្តអញនឹងរីកធំឡើងដែរ... ពេលអ្នកគិតរបៀបនេះ ចិត្តមេត្តាក៏ដុះក្តីស្រឡាញ់ដើម្បីរំសាយកំហឹងហើយអារម្មណ៍ទើសទាល់ក៏គ្មានក្នុងចិត្តដែរ។

ច្រវាក់ទី២. ការព្រួយបារម្ភច្រើននាំអ្នកដេកក្នុងវិបត្តផ្លូវចិត្តមិនខានទេ៖ ការព្រួយបារម្ភក៏ជាច្រវាក់មួយទាញចិត្តអ្នកឱ្យមានវិបត្តិដែរ។ ព្រះភិក្ខុជិរប្បញ្ញោ គូ សុភាព បានសម្តែងថា ការព្រួយបារម្ភច្រើនមានគូជាច្រវាក់ទី១. ជាច្រវាក់នៃអារម្មណ៍ស្តាយក្រោយឱ្យអ្នករស់ក្នុងគុកអតីតកាល។ ច្រវាក់ទី២. ជាច្រវាក់ឱ្យអ្នកលង់ចិត្តក្នុងអនាគតធ្វើឱ្យអារម្មណ៍របស់អ្នកចេះតែភ័យខ្លាចនិងខ្វល់ខ្វាយច្រើនដោយមិនដឹងថាជីវិតខ្លួនទៅជាអ្វី? ច្រវាក់ទាំងពីរនេះគៀបសង្កត់ផ្លូវចិត្តរបស់អ្នកទាំងមុខទាំងក្រោយឱ្យមានវិបត្តិខ្លាំងបំផុត។

ការស្រាយវិបត្តិខាងលើ គ្រាន់តែអ្នកមានសតិបញ្ញាប្រាប់ថា អ្វីដែលមិនអាចដោះស្រាយក្នុងអតីត គួរតែទុកវាក្នុងអតីតកាលទៅចុះ បើអ្នកព្រួយបារម្ភពីអនាគត គួរតែចាប់ផ្តើមក្នុងបច្ចុប្បន្ននេះដោយធ្វើការឱ្យអស់ពីលទ្ធភាព អ្នកនឹងលែងកើតទុក្ខសោកទៀតហើយ។ យើងមិនមែនស្មុគស្មាញដោយសារធ្វើការច្រើននោះទេ គឺស្មុគស្មាញនិងព្រួយបារម្ភច្រើនដោយសារតែយើងមិនអាចផ្តោតអារម្មណ៍ធ្វើការក្នុងពេលបច្ចុប្បន្នតាមលំហូរចិត្តនេះឯង៕ ដងស្រង់ពីសៀវភៅ លំហូរចិត្ត អ្នកអាចទិញតាមនេះ៖ 👉 https://t.me/BusinessCambodiaBook