មហារីកមាត់ស្បូន គឺជាប្រភេទមហារីកដែលកើតឡើងនៅក្នុងកោសិកានៃមាត់ស្បូន ផ្នែកខាងក្រោមនៃស្បូនដែលភ្ជាប់ទៅនឹងទ្វារមាស។ មហារីកមាត់ស្បូនស្ទើរតែទាំងអស់ គឺបណ្តាលមកពីការឆ្លងមេរោគ papillomavirus (HPV) តាមរយៈផ្លូវភេទ ប្រព័ន្ធភាពសុំាស្បូនចុះខ្សោយ បង្កឱ្យមានជំងឺមហារីកមាត់ស្បូនភាគច្រើន។

ជាការពិតណាស់ យោងតាមការណែនាំពីគេហទំព័រ everydayhealth បានឱ្យដឹងថា ជម្រើសល្អបំផុត២យ៉ាងដែលស្រ្តីគួរធ្វើដើម្បីឱ្យស្បូនមានសុខភាពរឹងមាំ ហើយអាចឈ្នះមេរោគមហារីកបានគឺ ទី១ ការយកចិត្តទុកដាក់ទៅលើរបបអាហារប្រចាំថ្ងៃ ទី២ ការហាត់ប្រាណពង្រឹងសមត្ថភាពស្បូន។

១. របបអាហារ

·   អាហារមានសារធាតុ Flavonoids៖ សារធាតុ Flavonoids គឺជាសមាសធាតុគីមីនៅក្នុងផ្លែឈើ និងបន្លែ ដែលត្រូវបានគេគិតថាជាប្រភពនាំមុខគេក្នុងការការពារជំងឺមហារីក។ ​ក្រុមបន្លែផ្លែឈើដែល​សម្បូរ​សារជាតិ flavonoid ជាងគេរួមមាន៖ ផ្លែប៉ោម ស្ពៃក្តោប សណ្ដែកខ្មៅ ផ្កាខាត់ណាខៀវ ស្ពៃក្តោប ខ្ទឹម សាឡាត់ សណ្តែកដី ខ្ទឹមបារាំង ទំពាំងបារាំង សណ្តែកសៀង ស្ពៃខ្មៅ...។

·   សារជាតិ Folate (វីតាមីនBរលាយក្នុងទឹក)៖ ជាការសិក្សាបានបង្ហាញថា អាហារសម្បូរជាតិ folate (វីតាមីន B រលាយក្នុងទឹក) កាត់បន្ថយហានិភ័យនៃការកើតជំងឺមហារីកមាត់ស្បូន ចំពោះអ្នកដែលមានមេរោគ HPV។ ទន្ទឹមនឹងនេះសារធាតុ folate ជួយរាងកាយបញ្ឈប់ការឆ្លងមេរោគ HPV បានផងដែរ។អាហារដែលសម្បូរទៅដោយជាតិ folate រួមមាន៖ ផ្លែបឺរ គ្រាប់ធញ្ញជាតិ ទឹកផ្លែឈើស្រស់​ ផ្លែស្ត្របឺរី គីវី...។

·   សារជាតិ Carotenoids (ប្រភពនៃវីតាមីន A)៖ ការសិក្សាមួយចំនួនបានបង្ហាញថា carotenoids ដែលជាប្រភពនៃវីតាមីន A នេះ ក៏មានប្រយោជន៍ក្នុងការការពារហានិភ័យនៃជំងឺមហារីកមាត់ស្បូនផងដែរ។ ដោយជាទូទៅសារជាតិប្រភេទនេះ ភាគច្រើនមាននៅក្នុងក្រុមអាហារពណ៌ទឹកក្រូច រួមមាន ការ៉ុត ដំឡូងជ្វា ល្ពៅ ផ្លែក្រូចក្រហម...។

២. លំហាត់ប្រាណពង្រឹងសមត្ថភាពស្បូន

·   ក្បាច់ Baddha Konasana (Cobbler Pose)៖ ក្បាច់នេះអ្នកគួរហាត់នៅពេលល្ងាច របៀបក្នុងការហាត់ ដំបូងត្រូវអង្គុយឱ្យត្រង់ខ្នង បន្ទាប់មកដាក់បាតជើងទាំង២របស់អ្នកទល់គ្នា រួចឱនមុខទៅមុខឱ្យទល់ទៅនឹងឥដ្ឋឬកម្រាលរយៈពេល១នាទី។ ក្បាច់នេះជួយឱយសាច់ដុំស្បូនរបស់អ្នកមានចលនា និងជួយឱ្យស្បូនរឹងមាំឈ្នះជំងឺផ្សេងៗផងដែរ។

·   ក្បាច់ Hanumanasna (Front Split Pose)៖ ក្បាច់នេះគួរហាត់ពេលល្ងាច របៀបក្នុងការហាត់ ដំបូងត្រូវអង្គុយឱ្យត្រង់ខ្នង រួចសណ្ដូកជើងត្រង់ ហើយកន្ធែកចេញពីគ្នាឱ្យតឹងសរសៃរយៈពេល១នាទី។ ហាត់ដំបូងៗអ្នកមិនគួរព្យាយាមកន្ធែកជើងធំពេកទេ តែព្យាយាមកន្ធែកទៅតាមសរសៃរបស់អ្នកដែលអាចយឺតបាន។

·   ក្បាច់ Paschimottanasana (Seated Forward Fold)៖ ក្បាច់នេះហាត់ពេលល្ងាចដូចគ្នា របៀបក្នុងការហាត់ ដំបូងត្រូវអង្គុយឱ្យត្រង់ខ្នង រួចសណ្ដូកជើងទៅមុខ បន្ទាប់មកយកដៃទាំងពីររបស់អ្នកទៅឈោងកាន់ប្រអប់ជើងរយៈពេល១នាទី។

·   ក្បាច់ Setu Bandhasana (Bridge Pose)៖ ក្បាច់នេះហាត់ពេលល្ងាច របៀបក្នុងការហាត់ ដំបូងត្រូវដេកឱ្យត្រង់ខ្លួន រួចបញ្ឈរជង្គង់ទាំង២ បន្ទាប់មកពើងផ្នែកខ្លួនឡើងទៅលើ(ធ្វើដូចរូប) ចំណែកដៃទាំង២ត្រូវដាក់នៅពីក្រោមខ្លួនដែលពើង ធ្វើបែបនេះរយៈពេល២០វិនាទី។

·   ក្បាច់ KapalBhati Pranayama៖ ហាត់ពេលល្ងាច ក្បាច់នេះហាត់ចុងក្រោយគេក្នុងចំណោមក្បាច់ទាំង៥ ជាក្បាច់សម្រួលអារម្មណ៍និងសរសៃឱ្យដើរស្រួលបន្ទាប់ពីយើងហាត់ក្បាច់ទាំង៤ខាងលើរួច។ របៀបក្នុងការហាត់ ដំបូងអ្នកអង្គុយឱ្យត្រង់ខ្នង ដាក់ជើងដូចរូប រូចដាក់ដៃទាំង២លើជើង បិទភ្នែក តាំងអារម្មណ៍ឱ្យស្ងប់ ដកដង្ហើមចូលចេញឱ្យវែងៗ ធ្វើបែបនេះរយៈពេល១នាទីជាការស្រេច។

អត្ថបទដោយ៖ មឿន គន្ធា