បើអ្នកមិនដោះស្រាយបញ្ហាតូចៗ ចេញពីផ្លូវចិត្តរបស់អ្នក។ មិនយូរមិនឆាប់ទេ អ្នកនឹងកើតជំងឺផ្លូវចិត្តវេទនាបំផុត។ បើអ្នកចង់ចៀសវាងបញ្ហាកម្រិតធ្ងន់នេះ អ្នកត្រូវតែចេះគិតតាមលោក Vex King ដែលបានលើកឡើងថា តើអ្នកធ្លាប់ឃើញគេសរសើរថា មានចិត្តល្អឬ មានទង្វើល្អចំពោះអ្នកដទៃ? គឺដូចជាគ្មានទេ។ មនុស្សតែងតែសរសើរពីលម្អរូបសម្បត្តិខាងក្រៅតែប៉ុណ្ណោះ។ មនុស្សច្រើនតែងផ្តល់និយមន័យខាងក្រៅថា “ល្អ” ដោយមើលរំលងសេចក្តីល្អដែលកើតចេញពីក្នុងចិត្ត មានក្តីស្រឡាញ់និងក្តីមេត្តាធម៌។
គួរឱ្យស្តាយដែលគុណសម្បត្តិទាំងនេះមិនជាទីឱ្យចាប់អារម្មណ៍សម្រាប់អ្នកដែលស្វែងរកជោគជ័យបែបសើៗ ឬសម្បកខាងក្រៅ។ និយាយទៅ! វាជារឿងសាមញ្ញធម្មតាណាស់ដែលមនុស្សច្រើនតែប្តូររូបសម្បត្តិខ្លួនឯងទៅរកសេចក្តីល្អតាមឧត្តមគតិដែលសង្គមកំណត់ និងលើកតម្កើងឱ្យថា វាជាក្តីសុខ។
បើយើងព្យាយាមសរសើរអ្នកដទៃថា ល្អព្រោះតែមេត្តាធម៌ឱ្យបានកាន់តែច្រើន គេនឹងងាកមកប្តូរការប្រព្រឹត្តរបស់ខ្លួនគឺប្តូរខាងក្នុងគឺដូរចិត្ត។ សេចក្តីល្អខាងក្នុងមានតម្លៃធំធេងជាងរូបសម្បត្តិខាងក្រៅឆ្ងាយណាស់។ ពេលអ្នកគិតតាមររបៀបនេះ ចិត្តរបស់អ្នកនឹងបានសុខ បានសន្តិភាព។ តាមព្រះពុទ្ធបានសម្តែងថា ក្តីសុខរបស់មនុស្សកើតចេញពីខាងក្នុងចិត្ត”។ ពេលអ្នកចេះពេញចិត្តលើខ្លួនឯង ជីវិតអ្នកនឹងបានក្តីសុខ។
អ្នកមិនគួរចុះទុនក្នុងការចំណាយពេលវេលា និងកម្លាំងទៅលើបុគ្គលណាម្នាក់ឱ្យតម្លៃរូបសម្បត្តិខាងក្រៅធំជាង សំខានជាងសេចក្តីល្អពីខាងក្នុង ចិត្តគំនិត វិធីគិត និងស្មារតីនោះ។ ព្រោះរបស់ខាងក្នុងរបស់អ្នកទាំងនេះ នាំឱ្យជីវិតមនុស្សយើងមានក្តីសុខពិតប្រាកដ។ ពេលអ្នករស់នៅជាមួយតម្លៃខាងក្នុង ចេះពេញចិត្តលើខ្លួនឯង មានក្តីស្រឡាញ់ជាមួយជីវិតរបស់ខ្លួន និងពង្រឹងស្មារតីរៀនសូត្រនោះ ជីវិតរបស់អ្នកកាន់តែរកឃើញក្តីសុខមិនខាន។ លម្អពីខាងក្រៅគ្មានអ្វីលើសពីការបំពេញចិត្តទៅលើតម្រូវការខាងក្រៅនោះទេ។ មានតែមនុស្សល្អទេ ទើបធ្វើឱ្យអ្នកដទៃមានបីតិសោមនស្សក្នុងចិត្ត គំនិត និងស្មារតីបាន។
អ្នកត្រូវចាំថា កាយរបស់យើងមានការផ្លាស់ប្តូរ តែការលម្អខាងក្នុងនាំអ្នកបន្តដំណើរទៅក្តីសុខពេញមួយជីវិត។ នេះជាគុណតម្លៃរបស់អ្នក។ វាជាហេតុផលដែលថា ហេតុអ្វីទើបការចំណាយពេលទៅលើការបណ្តុះទម្លាប់ល្អៗគឺជារឿងសំខាន់។ ព្រោះទម្លាប់នាំចិត្តរបស់អ្នកមានក្តីសុខ។ ហៅថា ចិត្តមានវិន័យ៕ អត្ថបទដោយ៖ ទ្រ សុភាព