ការរស់់នៅសុខភាពជារឿងសំខាន់បំផុត។ សព្វថ្ងៃនេះ មានមនុស្សភាគច្រើនលើសជាតិខ្លាញ់ និងចូលចិត្តញ៉ាំអាហារសម្បូរជាតិស្ករ និងជាតិប្រៃក្នុងអាហារ ការញ៉ាំលើសរសជាតិបែបនេះ នាំឱ្យកើតជំងឺទឹកនោមផ្អែម ខ្លាញ់រុំបេះដូង និងលើសឈាម...ជាដើម។ ថ្ងៃនេះ យើងមកស្វែងយល់ពីផ្លែឈើមួយ ជួយបញ្ចុះជាតិស្ករ សម្រាប់អ្នកកើតជំងឺទឹកនោមផ្អែម និងអ្នកមិនកើតជំងឺទឹកនោមផ្អែម ដើម្បីការពារទុកជាមុន។ តើផ្លែឈើទិព្វមួយនេះជាផ្លែឈើអ្វី?

នៅប្រទេសកម្ពុជាប្រព័ន្ធថែទាំសុខភាពនៅទាន់ខ្សោយ និងខ្វះការយល់ដឹងពីរបៀបថែសុខភាពផងដែរ។ ហើយបញ្ហានេះ នាំឱ្យប្រជាជនខ្មែរ​មួយភាគធំ កើតជំងឺទឹកនោមផ្អែម និងជំងឺផ្សេងទៀត។ យោងតាមអង្គការសុខភាពពិភពលោក(WHO) បានធ្វើការស្ទង់មតិនៅស្រុកខ្មែរតាមជនបទកាលពីឆ្នាំ ២០០៥ បានបញ្ជាក់ថា អត្រានៃអ្នកជំងឺទឹកនោមផ្អែមចន្លោះពី ៥% ទៅ ១០% ជាមនុស្សមានវ័យ ២៥ឆ្នាំជាង។ នេះជាចម្លើយគួរឱ្យភ្ញាក់ផ្អើលមែនទែន ពីព្រោះប្រជាជនកម្ពុជាមួយចំនួន មានការលើសគីឡូ បើប្រៀបធៀបជាមួយប្រទេសដទៃទៀត។

ជាក់ស្តែងយុវជន និងមនុស្សចាស់មួយចំនួនធំនៅស្រុកខ្មែរ ចូលចិត្តរសជាតិផ្អែម ឬរសជាតិលើសតម្រូវការរាងកាយ។ តាមលោកវេជ្ជបណ្ឌិត គួច ម៉េងលី ក៏ធ្លាប់បានមានប្រសាសន៍ថា ម្ហូបទាំងអស់ដែលប្រជាជនខ្មែរភាគច្រើន តែងតែញុំាមានដូចជា អាហារសម្បូរជាតិស្ករ កម្រិតជាតិប្រៃខ្លាំង មានទឹកក្រឡុក មានទឹកសេរ៉ូ និងគ្រឿងកំប៉ុងផ្សេងៗទៀតនោះ សុទ្ធតែមានជាតិស្ករមិនតិចស្លាបមួយព្រានោះទេ ដែលបែបនឹងសុទ្ធតែជាផ្លូវនាំអ្នកឱ្យកើតជំងឺទឹកនោមផ្អែម កើតរោគធាត់ កើតរោគបេះដូងជាដើម។” អ្នកគួរតែកាត់បន្ថយរសជាតិលើសតម្រូវការរាងកាយដូចខាងលើនេះ។ យោងតាមសមាគមបេះដូងអាមេរិចបានណែនាំឱ្យបុរសទទួលទានជាតិស្ករមិនលើសពី ៣៧ក្រាម (៩ស្លាបព្រាកាហ្វេ) និងស្ត្រីទទួលទានមិនលើសពី ២៥ក្រាម (៦ស្លាបព្រាកាហ្វេ) ក្នុងមួយថ្ងៃ។

យើងមានផ្លែឈើមួយ មានឥទ្ធិពលស្រូកយកជាតិស្ករ និងការពារជំងឺទឹកនោមផ្អែម គឺជាផ្លែប៉ោម។ តាមគេហទំព័រ Healthline បានចុះផ្សាយថា ផ្លែប៉ោម ជួយរំលាយអាហារបានល្អ និងស្រូបយកជាតិស្ករ។ ហើយកាត់បន្ថយជាតិស្ករក្នុងចរន្តឈាម។ ពីព្រោះក្នុងផ្លែប៉ោមមានសារធាតុប៉ូលីហ្វេណុល (polyphenols) ដើម្បីស្រូបជាតិស្ករក្នុងអាហារ ដើម្បីការពារជំងឺទឹកនោមផ្អែម។” តាមលោកវេជ្ជបណ្ឌិត Chris Steele ផ្នែកវេជ្ជសាស្ត្រ សញ្ជាតិអង់គ្លេស បានបញ្ជាក់បន្ថែមថា “ផ្លែប៉ោម ជាប្រភពជាតិសរសៃដ៏អស្ចារ្យដែលមានសារធាតុចិញ្ចឹមកាត់បន្ថយហានិភ័យជំងឺបេះដូង និងជំងឺទឹកនោមផ្អែមប្រភេទទី២។”

សម្រាប់អ្នកមិនទាន់កើតជំងឺទឹកនោមផ្អែមវិញ ការញ៉ាំផ្លែប៉ោមនេះ ជួយពង្រឺងរាងកាយ និងការពារជំងឺផងដែរ។ តាម Uvahealth ចុះផ្សាយថា នៅឆ្នាំ ២០២០នេះ អ្នកដែលទទួលទានផ្លែប៉ោម មួយថ្ងៃមួយផ្លែ ជួយការពារជំងឺសរសៃឈាម បេះដូង កម្ចាត់ជាតិខ្លាញ់ និងការពារជំងឺទឹកនោមផ្អែមផងដែរ។” តាមគេហទំព័រ Healthline បានបញ្ជាក់ឱ្យដឹងថា នៅក្នុងផ្លែប៉ោមមួយនេះ មានសារធាតុបី ទីមួយ Quercetin អាចកាត់បន្ថយល្បឿនជាតិស្ករពីអាហារកាបូអ៊ីដ្រាត ឬស្រូបជាតិស្ករចេញពីអាហារ។ ទីពីរ Chlorogenic acid ជួយឱ្យរាងកាយប្រើប្រាស់ជាតិស្ករមានប្រសិទ្ធភាពជាងមុន។ ទីបី Phlorizin ជួយកាត់បន្ថយជាតិស្ករបែបគីមី ឬពីអាហារកែច្នៃ ហើយជួយបន្ថែមជាតិស្ករធម្មជាតិដល់ចរន្តឈាមឡើងវិញផងដែរ។

ដូចនេះ សម្រាប់អ្នកជំងឺទឹកនោមផ្អែម ការញ៉ាំផ្លែប៉ោម ជួយកាត់បន្ថយជាតិស្ករក្នុងរាងកាយ។ សម្រាប់អ្នកមិនទាន់មានជំងឺទេ ការញ៉ាំផ្លែប៉ោមនេះ ជួយការពារជំងឺបានល្អ។ ហើយអ្នកត្រូវមានទម្លាប់មួយចំនួនទៀត ដើម្បីកាត់បន្ថយ និងការពារជំងឺទឹកនោមផ្អែម អ្នកត្រូវមានរបបអាហារបែបធម្មជាតិ ដូចជាត្រី បន្លែ និងផ្លែឈើជាច្រើន។ ហើយមានទម្លាប់ហាត់ប្រាណបន្ថែម ដើម្បីពង្រឹងរាងកាយរឹងមាំ ជួយបញ្ចុះជាតិស្ករ និងប្រឆាំងជំងឺជាច្រើនមុខ។ សូម្បីការគេងមួយថ្ងៃ៨ម៉ោងជួយអ្នកជៀសវាងពីជំងឺទឹកនោមផ្អែមផងដែរ។ ការមានទម្លាប់រួមផ្សំទាំងនេះ ការពារកើតជំងឺធាត់ ជំងឺលើសឈាម ជំងឺទឹកនោមផ្អែម និងជំងឺបេះដូងទៀត។ សុខភាពរឹងមាំ ធ្វើឱ្យបង្កើតលទ្ធផលការងារបានល្អ និងជីវិតមានភាពរីករាយផងដែរ៕

អត្ថបទដោយ៖ ទ្រ សុភាព