ទឹកដោះគោជា អាហារចម្បងមួយ ដែលរាងកាយចាំបាច់បំផុតសម្រាប់មនុស្សចាស់ ក្មេង និងមនុស្សពេញវ័យ។ ទឹកដោះគោមិនត្រឹមតែមានប្រូតេអ៊ីនខ្ពស់ មានសារធាតុចិញ្ចឹម ជំនួយឆ្អឹង ជំនួយការគេង ធ្វើឱ្យប្រព័ន្ធភាពស៊ាំរឹងមាំផងដែរ។ ត្បិតថាទឹកដោះគោជាភេសជ្ជៈល្អសម្រាប់សុខភាពពិតមែនប៉ុន្តែប្រសិនជាអ្នកផឹកខុសកាលៈទេសៈថាអាចនាំបញ្ហានិងហានិភ័យមកដល់ខ្លួនអ្នកមិនខាន។

ជាការពិតណាស់ យោងតាមការឱ្យដឹងពីគេហទំព័រ indiatimes បានបញ្ជាក់ឱ្យដឹងថា គ្រប់ប្រភេទផលិតផលទឹកដោះគោទាំងអស់មិនថាទឹកដោះគោស្រស់ ឬទឹកដោះគោខាប់នោះទេ គឺវាសម្បូរទៅដោយជាតិប្រូតេអ៊ីនជាច្រើន។ បន្ថែមពីលើនេះទៀត ដោយសាតតែទឹកដោះគោជាប្រភពនៃប្រូតេអ៊ីននេះហើយ ទើបគេមិនណែនាំឱ្យអ្នកផឹកក្រោយញ៉ាំអាហារមួយចំនួនដូចជា៖ សាច់គោ សាច់ជ្រូក សាច់ចៀម សាច់មាន់ ស៊ុត ត្រីប្រា ត្រីសាល់ម៉ុង ត្រីសាឌីន...ជាដើម ពីព្រោះអាហារដែលបានរៀបរាប់មកពីគឺសុទ្ធសឹងតែជាអាហារសម្បូរជាតិប្រូតេអ៊ីន។

នៅពេលដែលយើងញ៉ាំអាហារដែលសម្បូរជាតិប្រូតេអ៊ីនរួច ហើយមកផឹកទឹកដោះគោដែលសម្បូរជាតិប្រូតេអ៊ីនបន្ថែមពីលើទៀតនោះ គឺធ្វើឱ្យរាងកាយរបស់យើងលើសជាតិប្រូតេអ៊ីន ដែលបណ្តាលឱ្យប្រព័ន្ធរំលាយអាហារមិនអាចរំលាយទាន់ពេល ជាហេតុនាំឱ្យច្រាលជាតិអាស៊ីតឡើងមកលើ បង្កើតទៅជាអាការក្អួតចង្អោរ ក្រហាយទ្រូង ឈឺពោះ ហើមពោះ ខ្យល់ដើរមិនល្អ...ជាដើម។ ជម្រើសដ៏ល្អបំផុតនៅពេលដែលអ្នកញ៉ាំអាហារប្រភេទសាច់ ឬញ៉ាំអាហារដែលសម្បូរជាតិប្រូតេអ៊ីននោះ អ្នកគួរតែជ្រើសផឹកទឹកសាបឱ្យបានច្រើន ពីព្រោះទឹកសាបវាមាននាទីជួយសម្រួល និងជំនួយទៅដល់ប្រព័ន្ធរំលាយអាហារឱ្យធ្វើការរំលាយបានលឿន។

មួយវិញទៀត ប្រសិនជាករណីអ្នកមានទម្លាប់ផឹកទឹកដោះគោមុនឬក្រោយបរិភោគអាហារជាប្រចាំ អ្នកត្រូវរក្សាគម្លាតរវាងការញ៉ាំអាហារ និងផឹកទឹកដោះគោយ៉ាងហោចណាស់ឱ្យបាន ២ទៅ៣ម៉ោង។ មានន័យថាប្រសិនជាអ្នកចង់ផឹកទឹកដោះគោមុនញ៉ាំអាហារគឺត្រូវផឹកមុន ២ទៅ៣ម៉ោង។ ប្រសិនចង់ផឹកទឹកដោះគោក្រោយញ៉ាំអាហារគឺត្រូវផឹកក្រោយញ៉ាំអាហាររួច ២ទៅ៣ម៉ោងដូចគ្នា។ ការធ្វើបែបនេះគឺដើម្បីទុកពេលឱ្យប្រព័ន្ធរំលាយអាហារធ្វើការបានល្អ និងការពារកុំឱ្យជាតិអាស៊ីតច្រាលមកលើផងដែរ៕

អត្ថបទដោយ៖ មឿន គន្ធា