ក្រសួងសុខាពិបាលប្រកាស ផ្ទុះជំងឺរលាកភ្នែកនៅខេត្តរតនៈគីរី
នាថ្ងៃទី២៦ខែកញ្ញា ឆ្នាំ២០២៣នេះ ក្រសួងសុខាភិបាលនៃព្រះរាជាណាចក្រកម្ពុជាបានប្រកាសពីការផ្ទុះករណីជំងឺភ្នែកក្រហម ចំនួន៩៣ករណី (ស្រី៥៧នាក់) នៅភូមិប៉ក់តូច ឃុំប៉ក់ញ៉ៃ ស្រុក អូរយ៉ាដាវ ខេត្តរតនគិរី។
ដើមហតុដំបូងនេះកើតឡើងកាលពីថ្ងៃទី១៤ ខែ កញ្ញាឆ្នាំ២០២៣ មានអ្នកភូមិចំនួន៨នាក់ ទៅបុណ្យសពបងប្អូននៅភូមិមួយលើទឹកដីប្រទេសវៀតណាមដែលជាភូមិមានព្រំប្រទល់ជាប់និងភូមិប៉ក់តូចនេះ។ បន្ទាប់ពីត្រឡប់មកផ្ទះវិញក៏មានករណីឈឺភ្នែកក្រហមនេះកើតឡើងចំនួន៤នាក់នៅផ្ទះផ្សេងៗគ្នា និងបាន បន្តចម្លងរាលដាលប៉ះពាល់ដល់អ្នកភូមិជាមួយរហូតដល់៧៣នាក់ នៅក្នុងចំណោមប្រជាជនសរុប ៥៩៤នាក់នៃភូមិឃុំប៉ក់តូច។
រោគសញ្ញាជំងឺភ្នែកក្រហម៖ រួមមាន នៅផ្នែកសនៃភ្នែក ឡើងពណ៌ផ្កាឈូក ឬពណ៌ក្រហម ហើមត្របកភ្នែក (ស្រទាប់ស្ដើងដែលគម្រង់ផ្នែកពណ៌សនៃភ្នែក និងផ្នែកខាងក្នុងនៃត្របកភ្នែក)ជាពិសេសនៅពេលព្រឹក មានហូរទឹកភ្នែកច្រើនជាងមុន ដោយសារមានការកើនឡើងនូវការផលិតទឹកភ្នែក រកាំភ្នែកដោយសារមានអារម្មណ៍ថាមានអ្វីនៅ ក្នុងភ្នែក ឬចង់ញីភ្នែក រមាស់ភ្នែក រលាក និង/ឬក្រហាយភ្នែក មានអាចម៍ភ្នែក (ពណ៍ខ្ទុះ ឬពណ៍ទឹកបាយ) ចុកគ្រាប់ ភ្នែក ។
ជំងឺភ្នែកក្រហមនេះបណ្តាលមកពីមូលហេតុ៣ប្រភេទធំៗ៖
១. បង្កដោយវីរុស
អាចកើតមានលាយឡំជាមួយនឹងជំងឺផ្តាសាយ ឬជំងឺផ្លូវដង្ហើមផ្សេងទៀតជាធម្មតាចាប់ផ្ដើមក្នុងភ្នែកម្ខាង ហើយអាចរាលដាលដល់ភ្នែកម្ខាងទៀតក្នុងរយៈពេលតែប៉ុន្មានថ្ងៃ ជាធម្មតាមានហូរទឹកចេញពីភ្នែក តែមិនខាប់ទេ។
២. បង្កដោយបាក់តេរី
ភាគច្រើនមានអាចម៍ភ្នែកខ្ទុះ ដែលអាចនាំឱ្យត្របកភ្នែកស្អិតជាប់គ្នាជួនកាលកើតឡើងជាមួយនឹងជំងឺរលាកត្រចៀកផងដែរ
ចំណាំ៖ ជំងឺភ្នែកក្រហមដោយវីរុសនិងបាក់តេរីឆ្លងលឿនណាស់ រាលដាលយ៉ាងងាយស្រួលពីមនុស្សម្នាក់ទៅមនុស្ស ផ្សេងទៀត។ អ្នកអាចកាត់បន្ថយហានិភ័យនៃការកើតជំងឺរលាកភ្នែក ឬការចម្លងទៅអ្នកដទៃដោយអនាម័យល្អ។
៣. បង្កដោយអាឡែស៊ី
ជាមួយដើមឈើ រុក្ខជាតិ ស្មៅ ធូលីដី ផ្សិត សត្វចិញ្ចឹម ថ្នាំ ឬគ្រឿងសំអាង ជាធម្មតាកើតលើភ្នែកទាំងសងខាងអាចបង្កជារមាស់ខ្លាំង ហូរទឹកភែ្នក អាចម៍ភ្នែក និងហើមភ្នែកអាចកើតឡើងជាមួយរោគសញ្ញានៃអាឡែហ្ស៊ីដូចជា រមាស់ច្រមុះ កណ្ដាស់ រមាស់បំពង់ក ឬហឺត៕
