ភាគច្រើននៃជំងឺមហារីក ដែលបានកើតលើកូនក្មេង មានភាពពិបាកក្នុងការកំណត់រោគវិនិច្ឆ័យណាស់ ។ សញ្ញា និងរោគសញ្ញានៃជំងឺមហារីក ដែលកើតលើកូនក្មេង មានលក្ខណៈមិនដូចគ្នានោះទេ ហើយវាមានលក្ខណៈប្រហាក់ប្រហែល ជាមួយនឹងជំងឺផ្សេងៗទៀតផងដែរ ។​ តែទោះជាយ៉ាងនេះក្ដី គ្រូពេទ្យជំនាញ បានប្រាប់ពីរោគសញ្ញាសំខាន់ៗ មួយចំនួន ដែលឪពុកម្ដាយ អាចកត់សម្គាល់ ព្រោះវាអាចជារោគសញ្ញានៃជំងឺមហារីក ។

១. ក្មេងស្រកទម្ងន់ដោយគ្មានមូលហេតុ៖ ភាគច្រើន ជំងឺមហារីកអាចបណ្ដាលឲ្យ កូនក្មេងស្រកទម្ងន់ ដោយគ្មានមូលហេតុនោះទេ ។

២. ឧស្សាហ៍ឈឺក្បាល៖​ ក្មេងដែលឧស្សាហ៍ឈឺក្បាល រួមជាមួយការក្អួតចង្អោរ ជាពិសេសកើតឡើងនៅពេលព្រឹក សូមឪពុកម្ដាយ ចាប់អារម្មណ៍ និងប្រុងប្រយ័ត្ន ។

៣.​មានហើម និងឈឺចាប់៖ ក្មេងដែលឧស្សាហ៍ហើម និងឈឺចាប់មិនព្រមបាត់ នៅត្រង់ជើង ឈឺឆ្អឹង ឈឺសន្លាក់ និងឈឺនៅត្រង់ខ្នងផ្នែកខាងក្រោយជាដើម ។

៤. ហើមកូនកណ្ដុរ៖ ក្មេងដែលឧស្សាហ៍ហើមកូនកណ្ដុល នៅត្រង់ក្លៀក ក ក្នុងពោះ ឬត្រង់ក្រលៀនជាដើម សូមមាតាបិតា ចាប់អារម្មណ៍ និងប្រុងប្រយ័ត្ន ។

៥. ឧស្សាហ៍បង្ករោគ៖ ការបង្ករោគដែលកើតឡើងលើក្មេង ញឹកញាប់ អាចបញ្ជាក់បានថា ប្រព័ន្ធការពាររាងកាយទន់ខ្សោយ ហើយវាក៏អាចជារោគសញ្ញានៃជំងឺមហារីកផងដែរ ។​

៦. ឧស្សាហ៍អស់កម្លាំង៖ ក្មេងដែលកើតជំងឺមហារីក ច្រើនឧស្សាហ៍ខ្សោយ និងអស់កម្លាំង ដោយគ្មានមូលហេតុ រួមជាមួយភាពស្លេកស្លាំងផងដែរ ។​

៧.​ ឧស្សាហ៍គ្រុនក្ដៅ៖ ជំងឺមហារីក អាចបណ្ដាលឲ្យ ក្មេងអាចមានអាការគ្រុនក្ដៅញឹកញាប់ ដោយរកមូលហេតុមិនឃើញនោះទេ ។

ប្រសិនបើ កូនរបស់លោកអ្នកមានរោគសញ្ញាដូចបានរៀបរាប់ខាងលើ សូមប្រញាប់ស្វែងរកការប្រឹក្សាជាមួយគ្រូពេទ្យជំនាញ ដើម្បីកំណត់រោគវិនិច្ឆ័យឲ្យបានត្រឹមត្រូវ ៕

អត្ថបទដោយ៖ ហួ ភារ៉ា

ប្រភព៖ www.cancer.net