ជឿថាឪពុកម្តាយភាគច្រើនដែលមានកូនតូចៗត្រូវដល់វ័យចូលសាលា គឺតែងតែជួបបញ្ហាធំមួយនោះគឺកូនមិនចង់ទៅសាលារៀន​ ពេលដល់ម៉ោងត្រូវទៅសាលាម្តងៗកូនតែងតែយំ ខ្លាចមិនចង់ទៅ។

ជាការពិតណាស់ យោងតាមការចុះផ្សាយនៅលើគេហទំព័រ sleepingshouldbeeasy បានបញ្ជាក់ឱ្យដឹងថា កុមារដែលខ្លាចសាលា មិនចង់ទៅរៀនទាំងដែលពួកគេមិនទាន់ស្គាល់ថាអ្វីទៅជាសាលារៀននោះគឺដោយសារតែពួកគេ មិនចង់ឃ្លាតឆ្ងាយពីឪពុកម្តាយ ពួកគេមានអារម្មណ៍ខ្លាចមនុស្សប្លែកមុខ។ មួយវិញទៀត មកពីនៅសាលារៀនមានមនុស្សច្រើន កូនៗរបស់អ្នក មិនទាន់ធ្លាប់ទៅនិងបរិយាកាស។

ដូច្នេះដើម្បីបណ្តុះអារម្មណ៍កូនៗរបស់អ្នកឱ្យចង់ទៅរៀន មិនខ្លាចសាលា អ្នកត្រូវប្រើតិចនិក៥ខាងក្រោម៖

១.​ និយាយចំណុចល្អអំពីសាលាប្រាប់កូន៖ ជំហានទី១ អ្នកត្រូវតែនិយាយណែនាំអំពីចំណុចល្អៗនៅសាលារៀនប្រាប់ដល់កូនរបស់អ្នកជាមុន។ ឧទាហរណ៍៖ នៅពេលកូនទៅសាលារៀនកូននឹងបានជួបក្មេងៗច្រើន កូននឹងមានមិត្តភក្តិសម្រាប់លេងនិងនិយាយជាមួយ នៅសាលាកូនមានអ្នកគ្រូចាំមើលថែកូន អ្នកគ្រូលោកគ្រូនៅសាលាស្រឡាញ់កូនដូចប៉ាប៉ាក់ស្រឡាញ់កូនអ៊ីចឹង...អាចនិយាយឃ្លាទាំងអស់នេះប្រាប់កូនបន្តិចម្តងៗ ធ្វើយ៉ាងណាឱ្យកូនរបស់អ្នកមានទឹកចិត្តក្នុងការចង់ទៅសាលា។ ចៀសវាងការចាប់បង្ខំកូនឱ្យទៅសាលាភ្លាមៗ ធ្វើបែបនេះអ្នកគ្មានថ្ងៃឈ្នះកូនទេ។ ឪពុកម្តាយត្រូវព្យាយាមនិយាយល្អអំពីសាលាប្រាប់កូនឱ្យបាន៣ខែមុខនាំកូនទៅចុះឈ្មោះចូលរៀន។

២. ថ្ងៃដំបូងនៃថ្ងៃចូលរៀន៖ ថ្ងៃដំបូងជាថ្ងៃសំខាន់ដែលអ្នកត្រូវណែនាំកូនរបស់អំបីសកម្មភាបដែលត្រូវធ្វើនៅក្នុងសាលា។​​ អ្នកគួរព្យាយាមប្រាប់សកម្មភាពណាដែលធ្វើឱ្យកូនរបស់អ្នកមានអារម្មណ៍ថាសប្បាយ​និងជាប់ចិត្តជាមួយសាលា ណែនាំលោកគ្រូអ្នកគ្រូឱ្យកូនរបស់អ្នកស្គាល់។​ ថ្ងៃដែលកូនចូលរៀនដំបូង អ្នកត្រូវចំណាយពេលជាមួយកូនរបស់អ្នកឱ្យបានច្រើននៅសាលា​ ហាមដាច់ខាតជូនកូនទៅដល់សាលាភ្លាមមកវិញភ្លាម ធ្វើបែបនេះកូនរបស់អ្នកនឹងមានអារម្មណ៍ខ្លាចសាលា។

៣. អនុញ្ញាតឱ្យកូនយករបស់ជាទីស្រឡាញ់ទៅសាលា៖​ ជាធម្មតាក្មេងតែងមានរបស់ឬវត្ថុអ្វីមួយដែលគេស្រឡាញ់ និងចូលចិត្តលេងតាំងពីតូច មិនថារបស់នោះជា តុក្កតា សម្ភារសម្រាប់លេងតូចតាចយ៉ាងណាក៏ដោយ បើកូនអ្នកស្រឡាញ់និងចូលចិត្តលេង​អ្នកត្រូវអនុញ្ញាតឱ្យគេយកទៅសាលារៀន គឺដើម្បីឱ្យកូនរបស់អ្នកមានអារម្មណ៍ថាមានទំនុកចិត្ត និងមិនឯកានៅពេលទោសាលា។

៤. កុំព្យាយាមនិយាយរឿងកិច្ចការសាលាច្រើនពេកពេលកូនមកផ្ទះ៖ មានន័យថា កូនៗរបស់អ្នកពួកគេនៅសាលារៀនពេញ១ថ្ងៃហើយ ប្រសិនជាពេលមកផ្ទះអ្នកនាំគេនិយាយតែពីរឿងសាលាទៀត ពួកគេនឹងមានអារម្មណ៍ថាធុញលេងចង់ទៅរៀនមិនខាន។

សរុបជារួមមកវិញ តិចនិកទាំង៤ខាងលើគឺឪពុកម្តាយដែលមានកូនដល់អាយុត្រូវចូលសាលាអាចយកទោអនុវត្តជាមួយកូនៗលោកអ្នកបាន ដើម្បីបន្សាំពួកគេបន្តិចម្តងៗ កុំឱ្យពួកគេមានអារម្មណ៍ថាធុញ និងខ្លាចសាលា៕

អត្ថបទដោយ៖ មឿន គន្ធា