លោកស្រីទន្តបណ្ឌិត ណម ចំណាន  ជាសហស្ថាបនិក និង ជាប្រធានផ្នែកគ្លីនិកនៅមន្ទីរព្យាបាលធ្មេញ មែលវីន ព្រមទាំងជាប្រធានសមាគមផ្នែកពត់តម្រង់ធ្មេញកម្ពុជា បានចែករំលែកនូវចំណេះដឹងអំពីធ្មេញជាមួយនឹងចាបបៃតងឱ្យដឹងថា ធ្មេញមានតម្លៃប៉ុណ្ណា ហើយ ត្រូវធ្វើអ្វីខ្លះដើម្បីថែរក្សាធ្មេញ បង្ការកុំឱ្យខូចខាតធ្មេញខ្លាំង និង អាចព្យាបាលបានទាន់ពេលវេលា។

លោកស្រីទន្តបណ្ឌិត ណម ចំណាន បានលើកយកពីសារៈប្រយោជន៍នៃការពិនិត្យសុខភាពមាត់ធ្មេញ ឱ្យដឹងថាជាធម្មតា ការអញ្ជើញមកទទួលការពិនិត្យមាត់ធ្មេញ គួរតែធ្វើរយៈពេលរៀងរាល់ ៦ខែម្តងឲ្យបានទៀងទាត់។ ហើយប្រសិនបើអ្នកបានពិនិត្យទាន់ពេលវេលា នោះនឹងផ្តល់នូវអត្ថប្រយោជន៍ជាច្រើន ដូចជា៖

-មិនប្រឈមនឹងបញ្ហាមានក្លិនមាត់

-កាត់បន្ថយរោគពុកធ្មេញ និង ការស្រៀវធ្មេញ

-អាចបង្ការមិនឲ្យមានការឈឺចាប់បន្ទាន់

-អាចរក្សាធ្មេញធម្មជាតិបានច្រើន

-កាត់បន្ថយការចំណាយលើការព្យាបាលធ្មេញដែលមានតម្លៃថ្លៃ

-ជួយឲ្យសុខភាពរាងកាយទាំងអស់មានភាពរឹងមាំ ដោយសារមានធ្មេញគ្រប់គ្រាន់ អាចពិសាអាហារបានម៉ត់ល្អ។

ជាមួយគ្នានេះដែរ ការពិនិត្យសុខភាពមាត់ធ្មេញរៀងរាល់៦ខែម្តងនេះ គួរតែពិនិត្យមើលលើផ្នែកសំខាន់ៗដូចខាងក្រោម៖

-ជម្ងឺរលាកជាលិកាអញ្ចាញ ដែលយើងហៅថារាក់ស៊ីធ្មេញ

-ធ្មេញដែលមានដង្កូវស៊ីថ្មី ឬ ជុំវិញបំណះប៉ះចាស់ដែលទាមទារឲ្យរើប៉ះឡើងវិញ

-ធ្មេញដែលមានសំណឹក អាចធ្វើឲ្យស្រៀវខ្លាំង ពេលញាំអាហារឬភេសជ្ជៈ

-ធ្មេញដែលមានការប្រែពណ៌ខុសប្លែកពីធម្មតា ឬ បញ្ហាក្លិនមាត់

-ធ្មេញដែលមានការរលាក ស្រកអញ្ចាញ ស្រកឆ្អឹងជុំវិញ ឬមានដំបៅចុងឬស

-ធ្មេញដែលស្រោបចាស់ ដែលមានស្ថានភាពជ្រាបទឹកធ្វើឲ្យពុកជុំវិញជើងធ្មេញ

-ធ្មេញដែលបង្ករការរំខានញឹកញាប់ ដូចជាការហើម ឈឺចាប់អញ្ចាញជាដើម

-កំណាំធ្មេញដែលខាំខុសប្រក្រតី ដែលកំពុងបង្កបញ្ហាដល់សន្លាក់ឆ្អឹងថ្គាម និងសាច់ដុំទំពារ

-ទម្លាប់មិនល្អមួយចំនួនដែលអាចធ្វើឲ្យមានបញ្ហាដល់ដំណុះធ្មេញពិសេសកុមារ និងក្មេងវ័យជំទង់

-រោគសញ្ញាក្នុងមាត់មួយចំនួនដែលអាចវិវត្តទៅជាជម្ងឺមហារីកមាត់ជាដើម

ដូចនេះហើយការពិនិត្យសុខភាពមាត់ធ្មេញគឺជាសំខាន់ និង ចាំបាច់ណាស់សម្រាប់ជីវិតរស់នៅប្រចាំថ្ងៃ។ ជាមួយគ្នានេះ ចាបបៃតងក៏សូមរម្លឹកផងដែរថា លោកស្រីទន្តបណ្ឌិត ណម ចំណាន បានបញ្ចប់ការសិក្សានៅសាកលវិទ្យាល័យវិទ្យាសាស្រ្តសុខាភិបាល នៅឆ្នាំ២០០៧ រហូតមកដល់ពេលនេះ លោកស្រីទន្តបណ្ឌិត ណម ចំណាន មានឯកទេសខាងពត់តម្រង់ ធ្មេញ និង ដាំបង្គោលអ៊ីមផ្លេន ហើយបានបម្រើការងារ ក្នុងវិស័យទន្តសាស្រ្តនេះ អស់រយៈពេលជាង១៥ឆ្នាំមកហើយដែរ៕

រៀបរៀងអត្ថបទដោយ៖ កញ្ញា លីហួយ