បើយើងត្រឡប់មនុស្សចាស់ជំនាន់មុនពួកគាត់ហាក់ដូចសុខភាពល្អណាស់ រឹងមាំ ហើយថែមទាំងអាយុវែងៗទៀត ។ ប៉ុន្តែបើប្រៀបធៀបជាមួយមនុស្សសម័យថ្មីគឺខុសគ្នាឆ្ងាយណាស់។ ជាក់ស្តែងមនុស្សសម័យឥឡូវវ័យ៣០ឆ្នាំមិនទាន់ទេ មានជំងឺឈឺពេញខ្លួន ហើយច្រើនតែស្លាប់មុនអាយុទៀតថែមផងដែរ។
ជាការពិតណាស់ បើតាមការឱ្យដឹងពីគេហទំព័រ eatthis វេជ្ជបណ្ឌិត Bayo Curry-Winchell នាយកផ្នែកវេជ្ជសាស្រ្ដថែទាំបន្ទាន់ នៅមន្ទីរពេទ្យ Saint Mary's បានចែករំលែកពីមូលហេតុកំពូល៤ ដែលធ្វើឱ្យមនុស្សសម័យថ្មីភាគច្រើនស្លាប់មុនអាយុ៖
១. ស្លាប់ដោយការជក់បារី៖ វេជ្ជបណ្ឌិត Curry-Winchell រំឭកយើងថា "បារីបង្កើនហានិភ័យយ៉ាងខ្លាំង ដល់រាងកាយមនុស្ស និងវិវត្តទៅជាជំងឺបេះដូង មហារីក និងការឆ្លងមេរោគដោយធ្វើឱ្យខូចបេះដូង និងសរសៃឈាម ទីបំផុតវាបានកាត់បន្ថយលំហូរឈាមទៅកាន់សរីរាង្គរបស់អ្នក។ យោងតាម CDC បានបញ្ជាក់ថាអាយុរបស់អ្នកជក់បារីខ្លីជាងអាយុរបស់អ្នកមិនជក់១០ឆ្នាំ។
២ ស្លាប់ដោយជំងឺលើសឈាម៖ វេជ្ជបណ្ឌិត Curry-Winchell មានប្រសាសន៍ថា "ជំងឺលើសឈាមជាជំងឺមួយដែលត្រូវបានគេហៅថា "ឃាតករស្ងាត់" វាបណ្តាលឱ្យខូចខាតដល់សរសៃឈាមដោយកាត់បន្ថយអុកស៊ីសែននិងលំហូរឈាមទៅកាន់បេះដូង។ យោងតាមអង្គការសុខភាពពិភពលោក ជំងឺលើសឈាម គឺជាមូលហេតុចម្បងនៃការស្លាប់មុនអាយុនៅទូទាំងពិភពលោក។
៣. ស្លាប់ដោយសារការឡើងទម្ងន់ឬធាត់៖ យោងតាមវេជ្ជបណ្ឌិត Curry-Winchell បាននិយាយថា "ការឡើងទម្ងន់រួមជាមួយនឹងជំងឺរ៉ាំរ៉ៃផ្សេងទៀតអាចបង្កើនហានិភ័យនៃការស្លាប់មុនអាយុ។ មូលហេតុចម្បងនេះគឺដោយសារតែជាតិខ្លាញ់លើសនៅជុំវិញសរីរាង្គរបស់អ្នក និងការកើនឡើងនៃកូឡេស្តេរ៉ុល ដែលបង្កើនហានិភ័យនៃជំងឺបេះដូង ឬសរសៃប្រសាទ ដូចជាគាំងបេះដូង ឬដាច់សរសៃឈាមខួរក្បាល។
៤. ស្លាប់ដោយសារជំងឺមហារីក៖ សមាគមន៍ជំងឺមហារីកអាមេរិកបាននិយាយថា "ជំងឺមហារីកនៅតែបន្តជាមូលហេតុសំខាន់បំផុតទីពីរនៃការស្លាប់នៅក្នុងសហរដ្ឋអាមេរិក បន្ទាប់ពីជំងឺបេះដូង។ ករណីមហារីកថ្មីសរុបចំនួន ១.៩ លានករណី និងការស្លាប់ដោយសារជំងឺមហារីកចំនួន ៦០៩៣៦០នាក់ក្នុងឆ្នាំ២០២២។