កីឡាកររិនី តៃក្វាន់ដូ កូនកាត់ កម្ពុជា-អាម៉េរិកាំង កញ្ញា ថិបកាសាន់ ទ្រីនីកូល (Cassandre Nicole Tubbs🇺🇸) កំពុងធ្វើឱ្យប្រជាជនកម្ពុជា និងអន្តរជាតិរំជួលចិត្តខ្លាំងបន្ទាប់ពីនាងបានដណ្តើមមេដាយមាសជូនកម្ពុជាកាលពីថ្ងៃទី១៥ ខែឧសភា ឆ្នាំ២០២៣ យកឈ្នះកីឡាការិនី វៀតណាម ក្នុងប្រភេទកីឡាតៃក្វាន់ដូទម្ងន់៦៧គីឡូក្រាម។
ជាមួយគ្នានេះដែរ មុនពេលមកប្រកួតក្នុងព្រឹត្តការណ៍កីឡាស៊ីហ្គេមនៅកម្ពុជាកីឡាការិនីកូនកាត់ កម្ពុជា-អាម៉េរិកាំង មានប្រវត្តិប្រកួតមិនធម្មតា។ កញ្ញា ថិបកាសាន់ ទ្រីនីកូល ធ្លាប់ប្រកួតដណ្តើមមេដាយអន្តរជាតិចំនួន១៩លើក ឈ្នះមេដាយមាសចំនួន៥ មេដាយប្រាក់៣ និងមេដាយសំរឹទ្ធ៣។ បូកជាមួយនឹងលទ្ធផលពីម្សិលមិញដែល កញ្ញា ថិបកាសាន់ ទ្រីនីកូល បានឈ្នះមេដាយមាស រវាងកីឡាកិនីវៀតណាម សរុបគឺនាងបានឈ្នះមេដាយមាស៦ហើយក្នុងព្រឹត្តការណ៍អន្តរជាតិ។
ក្នុងនោះដែរនាងបានឈ្នះការប្រកួតយុវជន US Open និង Korean Open ក្នុងឆ្នាំ 2014 ជើងឯករងនៅ Spanish Open ឆ្នាំ 2015 និងចំណាត់ថ្នាក់លេខ 3 នៅ Pan American Championship ឆ្នាំ 2015 ហើយក្នុងឆ្នាំ 2014 Nicole ត្រូវបានគេបោះឆ្នោតជ្រើសរើសជា "អត្តពលិកវ័យក្មេងនៃរដ្ឋតិចសាស" ផងដែរ។ ក្នុងការចូលរួមប្រកួតកីឡាស៊ីហ្គេមលើកទី២៩ នៅប្រទេសម៉ាឡេស៊ី Cassandre បានឈ្នះមេដាយសំរឹទ្ធជាលើកដំបូង។ នៅស៊ីហ្គេមលើកទី៣០ ឆ្នាំ២០១៩ នៅប្រទេសហ្វីលីពីន នាងបានឈ្នះមេដាយប្រាក់ ហើយនៅស៊ីហ្គេម៣១ នៅប្រទេសវៀតណាម នាងក៏បានឈ្នះមេដាយសំរឹទ្ធផងដែរ។
ក្នុងនាមជាប្រជាជនខ្មែរ ពិតជាមានមោទកភាពណាស់ ដែលកីឡាការិនីកូនកាត់ កម្ពុជា-អាម៉េរិកាំង បានឈរឈ្នះជាកីឡាការិនីតំណាងឱ្យកម្ពុជា ហើយប្រកួតដណ្តើមមេដាយមាសជូនជាតិបាន និងបានលើកស្ទួយវិស័យកីឡាឱ្យកាន់តែកក្រើកថែមទៀត៕ អរគុណ កញ្ញា ថិបកាសាន់ ទ្រីនីកូល សម្រាប់ការលះបង់មួយនេះ៕
អត្ថបទដោយ៖ មឿន គន្ធា