កាលពីថ្ងៃទី២៥ ខែមេសា ឆ្នាំ២០២៣កន្លងទៅនេះ ក្រុមហ៊ុន បក្សីមេឌា បានប្រារព្ធពិធីខួបគម្រប់១០ឆ្នាំ ដែលក្រុមហ៊ុនបក្សីមេឌាបានបង្កើន Business Cambodia (ចាបក្រហម) ឡើងនៅលើទឹកដីប្រទេសកម្ពុជា។ ក្នុងឱកាសពិសេសនេះ ក៏មានការចូលរួមពីសំណាក់វត្តមានឯកឧត្តម លោកជំទាវ សហគ្រិនឆ្នើមៗរបស់កម្ពុជា ភ្ញៀវកត្តិយស អ្នកគាំទ្រចាបក្រហម រួមទាំងក្រុមការងារទាំងមូលផងដែរ។

ដោយឡែកនៅក្នុងកម្មពិធីខួបគម្រប់១០ឆ្នាំរបស់ចាបក្រហម លោក សំ កុសល ស្ថាបនិក Business Cambodia(ចាបក្រហម) បានពោលពាក្យយ៉ាងក្តុកក្តួលថា ព្រោះតែពាក្យមួយឃ្លាគឺ “បំផុសគំនិតដើម្បីកម្ពុជាពូកែរកស៊ីជាងមុន” ធ្វើឱ្យលោកនិងក្រុមកូនចាប ខំហែលឆ្លងឧបសគ្គរាប់មិនអស់ ស្ទើរតែដួលជាច្រើនលើកជាច្រើនសារ មានពេលខ្លះរហូតដល់គ្មានប្រាក់ខែបើកឱ្យបុគ្គលិក ក៏លោកនៅតែមិនបោះបង់ចោលក្តីស្រមៃមួយនេះ ហើយខំត្រដររស់រហូតមានថ្ងៃនេះ ជាថ្ងៃដែលចាបក្រហមអាយុ១០ឆ្នាំ។

ទម្រាំ Business Cambodia (ចាបក្រហម) មានថ្ងៃនេះជាថ្ងៃដែលប្រជាជនកម្ពុជាទទួលស្គាល់ មានអ្នកឡាចផេកផ្លូវការជាង២លាននាក់ ចាបក្រហមបានហែលឆ្លងឧបសគ្គរាប់រយជំពូក។ ចាបក្រហមផ្តើមចាប់កំណើតនៅលើទឹកដីប្រទេសកម្ពុជានៅថ្ងៃទី២៥ ខែមេសា ឆ្នាំ២០២១៣ ប្តូរពីបោះពុម្ពផ្សាយលក្ខណៈទស្សវដ្តី មកផ្សព្វផ្សាយតាមបែបអនឡាញ ដោយការប្រើប្រាស់បណ្តាញសង្គម វេបសាយ ហ្វេសប៊ុក ជំនួសវិញ។។ ជោគជ័យដែលចាបក្រហម ចង់ឃើញបំផុត ហើយក៏កំពុងធ្វើសព្វថ្ងៃនេះ គឺជួយជាផ្នែកមួយ ឱ្យផលិតផលខ្មែរមានមុខកាន់តែច្រើន កាន់តែល្បី តាំងលក់ចូលទីផ្សារផ្សារទំនើប និងនាំចេញទៅក្រៅប្រទេសផងដែរ។

ស្ថាបនិកបក្សី បានបន្តលើកឡើងបន្តថា ជាសម្មតិផលក្រៅពីចាបក្រហម (Business Cambodia) ដែលបង្កើតឡើងដើម្បីបំផុសគំនិតកម្ពុជាឱ្យពូកែរកស៊ីជាងមុន យើងបានបង្កើតចាបបៃតង (Healthy Cambodia) ដើម្បីបំផុសគំនិតកម្ពុជាឱ្យរស់នៅមានផាសុកភាព និងចាបខៀវ (Technology Cambodia) ដើម្បីបំផុសគំនិតកម្ពុជាឱ្យកាន់តែទំនើបជាងមុន។ ឆ្លៀតក្នុងឱកាសនេះ លោកសំ កុសល តំណាងឱ្យកូន ចាបទាំង៣សូមថ្លើមអំណរគុណដល់ក្រុមហ៊ុននានា ដែលជាដៃគូសហការ រួមទាំងអរគុណយ៉ាងជ្រាលជ្រៅទៅកាន់អ្នកគាំទ្រទាំងអស់ផងដែរ មានការចូលរួមពីអ្នកគ្រប់គ្នា ទើបក្រុមហ៊ុនបក្សីមេឌាមានអាយុកាលមកបាន១០ឆ្នាំមកនេះ។ លោកក៏សង្ឃឹមថា ម្ចាស់អាជីវកម្មទាំងអស់នឹងរួមដំណើរជាមួយគ្នានឹងក្រុមចាប ដើម្បីកម្ពុជាកាន់តែប្រសើរជាងមុនផងដែរ។

ជាមួយគ្នានេះផងដែរ ម្ចាស់អាជីវកម្មក្នុងស្រុកដែលបានចូលរួម ក៏សម្ដែងនូវឱ្យអបអរសាទរ រួមទាំងអរគុណដល់ក្រុមការងារចាបក្រហម ដែលបានជួយផ្សព្វផ្សាយផលិតផលខ្មែរ ធ្វើឱ្យអាជីវកម្មក៏ដូចជាយីហោរបស់ពួកគាត់កាន់តែល្បីឡើង មានទីផ្សារជាងមុនទ្វារដង និងខ្លះទៀតមានលទ្ធភាពនាំផលិតផលខ្មែរចេញទៅក្រៅប្រទេសបណ្ដើរៗផងដែរ។

ជាការបញ្ចប់នៃកម្មវិធី ក៏មានការអបអរ ជាការកាត់នំគម្រប់ខួប១០ឆ្នាំ រួមទាំងចែកជូនជាកាដូ ដល់ម្ចាស់ក្រុមហ៊ុន ម្ចាស់អាជីវកម្មនានា រួមទាំងភ្ញៀវកិត្តយសដែលបានចូលរួម ការទទួលទានអាហារសម្រន់ និងមានថតរូបជាអនុស្សាវរីយ៍ផងដែរ៕