ការញ៉ាំទឹកក្នុង១ថ្ងៃឱ្យបាន៨ កែវ (ចន្លោះពី២ ទៅ៣លីត្រ) ពិតជាមានគុណប្រយោជន៍ជាច្រើនក្នុងការថែរក្សានៅជាតិទឹកក្នុងសរីរាង្គឱ្យមានតុល្យភាព បញ្ចៀសនូវបញ្ហាខ្សោះ ឬខះជាតិទឹកក្នុងខ្លួន បង្ការកុំឱ្យកើតជានូវរោគអាការរុំារ៉ៃផ្សេងៗរួមមាន ឈឺប្រកាំង អស់កម្លាំងល្ហិតល្ហៃ ទល់លាមក -ល-។

ទន្ទឹមនឹងនេះដែរ ផ្អែកទៅតាមប្រភព everydayhealth បានលើកឡើងនូវក្បួនផឹកទឹកចំនួន៧ពេល ប្រសិនណាបើអនុវត្តន៍បានត្រឹមត្រូវជាប្រចាំ នឹងជួយសុខភាពរាងកាយឱ្យកាន់តែរឹងមាំ ចៀសឆ្ងាយនូវការកើតជំងឺរុំារ៉ៃផ្សេងៗជាច្រើន៖​

១. ផឹក១កែវពេលភ្ញាក់ពីគេង៖ នៅអំឡុងពេលងើបពីគេងរាងកាយអាចនឹងបាត់បង់ជាតិទឹក និងអេឡិចត្រូលីតខ្លះដែលមាននៅក្នុងខ្លួន តាមរយៈការស្រមុក ឬដកដង្ហើម និងបម្រើបម្រាស់មួយផ្នែកទៀតនៅក្នុងសរីរាង្គកាយ។ ហេតុនេះ ការញ៉ាំទឹកឱ្យបាន១កែវបន្ទាប់ពីភ្ញាក់ពីគេង គឺអាចបំពេញជាតិទឹកនៅក្នុងសរីរាង្គវិញ លើសពីទៅទៀត ការញ៉ាំទឹកបែបនេះ ក៏ជួយកាត់បន្ថយអាស៊ីតក្នុងក្រពះនាពេលព្រឹកព្រលឹមផងដែរ។

២. ផឹកទឹកដើម្បីកាត់បន្ថយញុំាច្រើន៖ ដើម្បីគ្រប់គ្រងទម្លាប់នៃការញុំាអាហារច្រើន ការផឹកទឹកមួយកែវមុនពេលអាហារ អាចជួយឱ្យមានអារម្មណ៍ថា ញុំាអាហារឆាប់ឆ្អែតក្នុងបរិមាណតិច និងថែមទាំងជួយសម្រួលដល់ប្រព័ន្ធរំលាយអាហារបានល្អថែមមួយកម្រិត។

៣. ផឹកក្រោយទទួលទានអាហារ៖ ការផឹកទឹកបន្ទាប់ពីស្រស់ស្រូបអាហាររួច នឹងជួយដំណើរនៃចលនារំលាយអាហារឱ្យងាយស្រួលក្នុងការប្រតិបត្តិការ ដោយបម្លាស់ទីអាហារនៅក្នុងប្រព័ន្ធរំលាយអាហារបានល្អ និងជួយសម្រួលដល់ការបន្ទោរបង់បានទៀងទាត់។

៤. ទម្លាប់ផឹកទឹកច្រើននាពេលថ្ងៃត្រង់៖ នៅកំឡុងពាក់កណ្តាលថ្ងៃរសៀល គឺជាពេលដែលរាងកាយឆាប់បាត់បង់ជាតិទឹកលឿនជាងគេ ដោយសារអាកាសធាតុកើតឡើងកម្តៅបណ្ដាលរាងកាយក៏ត្រូវបាត់បង់ជាតិទឹក។ ដូច្នេះការផឹកទឹកច្រើននៅកំឡុងពេលនេះ គឺល្អសម្រាប់បំពេញជាតិទឹកក្នុងសារពាង្គកាយ និងផ្តល់ថាមពលដល់សរីរាង្គទាំងមូល។

៥. បន្ទាប់ពីទទួលទានអាហារសម្រន់ ឬភេសជ្ជៈផ្សេងៗ៖ ក្រោយពីញ៉ាំអាហារសម្រន់ ឬភេសជ្ជៈមួយចំនួនដូចជាគ្រឿងកំប៉ុង កាហ្វេជាដើម អ្នកគួរតែញ៉ាំទឹកឱ្យមួយកែវ ដើម្បីឱ្យវាទៅលាងនៅសារធាតុមិនល្អដែលតោងជាប់នៅក្នុងប្រដាប់លំដាប់រំលាយអាហារ។

៦. ផឹកទឹកមុន និងក្រោយហាត់ប្រាណ៖ នៅពេលដែលអ្នកហាត់ប្រាណសារជាតិទឹកមួយផ្នែកនៅក្នុងសារពាង្គកាយអ្នកត្រូវបានបាត់បង់តាមរយៈការបែកញើស។ ដូច្នេះ ការផឹកទឹក១កែវប្រហែលជា ៣០នាទីមុនពេល គឺល្អសម្រាប់បំពេញជាតិទឹកនៅក្នុងរាងកាយ និងក្រោយពេលហាត់ប្រាណអ្នកគួរតែញ៉ាំទឹកខ្លះៗ ដើម្បីឱ្យវាជ្រាបទៅជួយទៅបំពេញជំនួសឱ្យសារធាតុទឹកដែលបាត់បង់ ខណៈពេលដែលនៅក្នុងកំឡុងពេលហាត់គឺតម្រូវឱ្យញុំាទឹកតិចៗប៉ុណ្ណោះបើទោះជាត្រូវហាត់ហត់យ៉ាងណាក៏ដោយ។

៧. ញុំាទឹកពេលយប់៖ ការទម្លាប់នៃការទទួលទឹកតិចៗក្រោមមួយកែវក្នុងរយៈពេល២ម៉ោងមុនចុលគេងវាក៏អាចជួយរក្សាជាតិទឹកនៅក្នុងរាងកាយឱ្យមានតុល្យភាព រហូតដល់ភ្ញាក់ពីដំណេកនាពេលព្រឹក ​និងជួយ​រក្សា​ជាតិ​ទឹក​ក្នុង​ខ្លួន ធ្វើឱ្យសន្លាក់​មាន​ជាតិ​រំអិល បំបែក​កាក​សំណល់ សម្អាតជាតិពុលក្នុងរាងកាយ ជួយគ្រប់គ្រងសីតុណ្ហភាពរាងកាយ...ផងដែរ៕

អត្ថបទដោយ៖ ប៉ាវ​ ភក្តី