សរីរាង្គកាយរបស់មនុស្សម្នាក់ អាចដំណើរការបានល្អគឺពឹងផ្អែកទាំងស្រុងទៅលើសារជាតិចិញ្ចឹមដែលយើងទទួលបានមកពីរបបអាហារទទួលបានប្រចាំថ្ងៃ។ ដោយឡែក ប្រសិនណាបើសរីរាង្គរបស់យើងកង្វះនូវសារជាតិចិញ្ចឹមណាមួយជួយផ្គត់ផ្គង់សារពាង្គកាយ ជាលទ្ធផល អាចបង្កឱ្យកើតជាជំងឺ បង្កជារោគអាការផ្សេងៗ។
កត្តានេះ ផ្អែកទៅតាម healthnavigator.org បានលើកឡើងនូវប្រភេទវីតាមីន ៣ក្រុម ដែលច្រើនផ្ទុកនៅក្នុងអាហារជំនួយសុខភាព ប្រសិនបំពេញបានជាប្រចាំថ្ងៃ នឹងទទួលប្រសិទ្ធខ្ពស់៖
១. វីតាមីន E ៖ វីតាមីន E ជាប្រភេទសារធាតុអុកស៊ីតកម្ម ការពារកោសិកាឈាមក្រហម កោសិកាសាច់ដុំ ជំរុញដល់កោសិកាស្បែកលូតលាស់។ ជាទូទៅសម្រាប់អ្នកខ្វះវីតាមីន E គឺងាយប្រឈមនឹងភាពស្លេកស្លាំង បែកគ្រាប់ឈាម និងមានហានិភ័យនៃការគ្មានកូន។
វីតាមីនE ត្រូវបានអ្នកជំនាញណែនាំថា ចំពោះបុរសត្រូវការវីតាមីនE ១០មីលីក្រាមក្នុងមួយថ្ងៃ ចំណែកស្រ្តីត្រូវការ៧មីលីក្រាម។ សម្រាប់មនុស្សពេញវ័យ មានសុខភាពទូទៅអាចទទួលបានវីតាមីននេះតាមរយៈការញុំាបន្លែ ផ្លែឈើ គ្រប់ភេទ និងគ្រឿងសមុទ្រ។
២. វីតាមីន D ៖ វីតាមីន D មានតួនាទីជួយដល់សុខភាពឆ្អឹងធ្វើឱ្យឆ្អឹងរឹងមាំ និងជំនួយសាច់ដុំ។ ក្នុងករណីនៃការកង្វះនូវសារជាតិវីតាមីន D ជាញឹកញាប់ច្រើនជួបប្រទះនឹង អាការរមួលក្រពើ ឈឺចាប់សាច់ដុំ ឆ្អឹងទន់ខ្សោយងាយនឹងបាក់បែកពេលប៉ះទង្គិចនឹងអ្វីមួយ។
ហេតុនេះ ដើម្បីបំពេញនូវសារជាតិវីតាមីន D ឱ្យបានគ្រប់គ្រាន់ គឺតែព្យាយាមត្រូវពន្លឺព្រះអាទិត្យនាពេលព្រឹក និងញុំា ត្រី ទឹកដោះគោ ស៊ុត សាច់ ថ្លើម...ជាដើម។
៣. វីតាមីន C ៖ សារធាតុវីតាមីន C មានតួនាទីជួយបង្កើនសមត្ថភាពឆ្អឹង សរសៃប្រសាទ បង្កើនកូឡាជែន ពង្រឹងសុខភាពមាត់ធ្មេញ និងឆ្អឹងខ្ចី ថែរក្សាប្រព័ន្ធភាពសុំាឱ្យធន់នឹងការឆ្លងមេរោគ និងសារធាតុប្រឆាំងអុកស៊ីតកម្ម ដែលអាចបង្កឱ្យកើតមាននូវជំងឺមហារីក ប្រឆាំងភាពចាស់ ជួយស្រូបយកជាតិដែក និងទង់ដែងផងដែរ។ វីតាមីននេះ មានភាគច្រើននៅក្នុងផ្លែឈើ ដូចជាផ្លែក្រូច ត្របែក ស្រ្តបឺរី ស្ពៃខ្មៅ ដំឡូងបារាំង ឪឡឹក...និងបន្លែបៃតង៕
អត្ថបទដោយ៖ ប៉ាវ ភក្តី