ខណៈពេលដែលយើងគេងលក់នៅពេលយប់ រាងកាយត្រូវអត់អាហារ និងទឹកពី៦ទៅ៨ម៉ោង។ ជាហេតុធ្វើឱ្យរាងកាយមានការស្រេកឃ្លានខ្លាំងពេលព្រឹក និងខ្វះជាតិទឹកបង្គ្រប់ក្នុងរាងកាយផងដែរ។ អ្វីដែលអ្នកត្រូវ ធ្វើគួររើសអាហារពេលព្រឹក ក៏ដូចជាភេសជ្ជៈដែលអាចបន្ថែមជាតិទឹក សារធាតុចិញ្ចឹមល្អៗ ដែលអាចផ្ដល់ថាមពល និងជំនួយដល់ក្រពះ ពោះវៀន ប្រព័ន្ធរំលាយអាហាររបស់អ្នកឡើងវិញ។

ខាងក្រោមនេះជាកំពូលភេសជ្ជៈ៣មុខ ផឹករាល់ព្រឹក ពី២៥០ទៅ៥០០មីលីលីត្ររាល់ថ្ងៃ នឹងជួយការពាររាងកាយពីជំងឺជាច្រើនប្រភេទ។ សូមបញ្ជាក់ថាភេសជ្ជៈផឹកពេលព្រឹកមិនមែនជាអាហារពេលព្រឹកទេ អ្នកគួរទទួលទានអាហារជាមុនសិន ចាំទទួលទានភេសជ្ជៈទាំងនេះ។

១ ទឹកដូង៖ ដូងជាផ្លែឈើពេញនិយមសម្រាប់ប្រជាជនខ្មែរ ក៏ដូចជាប្រជាជនជាច្រើននៅលើពិភពលោក ដោយសាររសជាតិឆ្ងាញ់ បរិសុទ្ធពីធម្មជាតិ និងមានប្រយោជន៍ច្រើនដល់សុខភាព។ យោងប្រភព timesofindia បានឱ្យដឹងថា ទឹកដូងសម្បូរដោយសារធាតុចិញ្ចឹម ប៉ូតាស្យូម ម៉ាញ៉េស្យូល សូដ្យូម កាល់ស្យូម ប្រូតេអ៊ីន និងជាតិកាកសរសៃផងដែរ។ ហេតុនេះវាអាចជួយបង្ការជំងឺទឹកនោមផ្អែម ជំងឺបេះដូង និងក្រួសតម្រងនោម ប្រឆាំងអុកស៊ីតកម្ម ប្រឆាំងនឹងរ៉ាឌីកាល់សេរី និងកម្ចាត់ជាតិពុលនៅក្នុងរាងកាយ។ ក្នុង១ថ្ងៃ អ្នកអាចទទួលទានទឹកដូងនៅពេលព្រឹកក្រោយអាហារ២៥០-៥០០មីលីលីត្រ នឹងការពាររាងកាយពីជំងឺបាន។

២ តែបៃតង៖ តែបៃតងឆុងក្ដៅៗ មិនមែនជាតែបៃតងដាក់ទឹកកក ទឹកដោះគោឬស្ករបន្ថែមនោះទេ។ ផ្អែកតាម Indiatimes បានឱ្យដឹងថា ទទួលទានតែបៃតងក្ដៅៗពេលព្រឹក ជួយជំរុញប្រព័ន្ធរំលាយអាហារ ដុតបំផ្លាញជាតិខ្លាញ់ មានសារធាតុប្រឆាំងអុកស៊ីតកម្មដែលជួយបង្កើនប្រព័ន្ធភាពស៊ាំឱ្យរឹងមាំ និងធ្វើឱ្យរាងកាយមានថាមពល។ វិធីធ្វើគ្រាន់តែដាំទឹក២៥០ទៅ៥០០មីលីលីត្រឱ្យពុះ រួចដាក់ម្សៅតែបៃតង ឬស្លឹកតែបៃតងប្រមាណ១ស្លាព្រាកាហ្វេចូលជាការស្រេច អាចបន្ថែមទឹកឃ្មុំ និងក្រួចឆ្មារតិចតួចតាមចំណូលចិត្ត។

៣ ទឹកខ្មេះប៉ោម៖ ឌីថុកនេះ និងជួយប្រឆាំងអុកស៊ីតកម្ម ជួយឱ្យរាងកាយស្រួបជាតិរ៉ែ ប្រូតេអ៊ីនពីចំណីអាហារចូលក្នុងខ្លួនបានល្អ បញ្ចេញជាតិពុល ដោះស្រាយបញ្ហាស្បែកខូច ការពារស្បែកពីការឆ្លងមេរោគ ជួយកាត់បន្ថយជាតិស្ករក្នុងឈាម និងជួយដល់ការសម្រកទម្ងន់បានថែមទៀត។ របៀបធ្វើ តាមការណែនាំពីHealthline ណែនាំឱ្យយកទឹកខ្មេះប៉ោម១ឬ២ស្លាបព្រាកាហ្វេ លាយជាមួយទឹក១កែវធំ ហើយទទួលទាន។ សូមចាំថាត្បិតទឹកខ្មេះប៉ោមមានប្រយោជន៍ច្រើន ប៉ុន្តែទាមទារឱ្យអ្នកប្រើប្រាស់វាមានកម្រិត អ្នកគួរទទួលទានវាត្រឹម ១ទៅ១ស្លាបព្រាកាហ្វេ ឬពី១០ទៅ៣០មីលីលីត្រ ក្នុង១ថ្ងៃបានហលយគឺល្អបំផុត។

ត្រូវញ៉ាំថា គួរចៀសវាងភេសជ្ជៈឬអាហារណា ដែលមានផ្ទុកជាតិស្ករខ្ពស់ ព្រោះការទទួលទានជាតិស្ករច្រើន ពិសេសនៅពេលព្រឹកងាយនឹងធ្វើឱ្យជាតិស្ករកើនឡើងក្នុងសរសៃឈាម ងាយនឹងវិវត្តទៅជាជំងឺទឹកនោមផ្អែម៕

អត្ថបទដោយ៖ Senghong