ការយល់ដឹងពីរបៀបចិញ្ចឹមកូន ជាពិសេសទារកដែលមានអាយុក្រោម១២ខែ គឺជារឿងដ៏សំខាន់ ព្រោះវាទាក់ទងជាមួយសុវត្ថិភាព និងការលូតលាស់របស់ក្មេង​ ជាពិសេសការលូតលាស់ផ្នែកខួរក្បាល ប្រព័ន្ធរំលាយអាហារ និងប្រព័ន្ធភាពស៊ាំជាដើម​។ ការចិញ្ចឹមកូនដោយទឹកដោះម្ដាយគឺជាជម្រើសដ៏ល្អបំផុត ខណៈពេលការប្រើប្រាស់ម្សៅទឹកដោះគោ(infant formula) ដែលត្រូវបានផ្សំឡើងតាមរូបមន្តក៏ជារឿងដ៏ត្រឹមត្រូវផងដែរ ។

យោងតាមគ្រូពេទ្យជំនាញខាងកុមារ របស់សហរដ្ឋអាមេរិក ក្មេងដែលមានអាយុក្រោម១២ខែ មិនគួរឲ្យញ៉ាំទឹកដោះធម្មតានោះទេ(ទឹកដោះគោ សម្រាប់ក្មេងធំ ឬមនុស្សទូទៅ) ។ ទឹកដោះគោធម្មតា សម្បូរដោយប្រូតេអីន ដែលជាហេតុនាំឲ្យមានការលំបាក ចំពោះការរំលាយ ព្រោះប្រព័​ន្ធរំលាយអាហារ តម្រងនោម និងប្រព័ន្ធភាពស៊ាំរបស់ក្មេងដែលមានអាយុក្រោម១២ខែ នៅមិនទាន់ពេញវ័យ រឹងមាំនៅឡើយទេ ។ ម៉្យាងវិញទៀត ទឹកដោះគោធម្មតាមិនសម្បូរវីតាមីន និងសារធាតុរ៉ែសំខាន់ៗដូចជា ជាតិដែក ដែលទារកត្រូវការជាចាំបាច់ ក្នុងការលូតលាស់នោះទេ ។

កំហាប់ដ៏ខ្ពស់នៃប្រូតេអីន និងសារធាតុរ៉ែផ្សេងៗ ដែលមានក្នុងទឹកដោះគោធម្មតា អាចបង្កជាផលប៉ះពាល់យ៉ាងធ្ងន់ធ្ងរដល់តម្រងនោម   និងប្រព័ន្ធរំលាយអាហារដែលមិនទាន់ពេញវ័យរបស់ទារក ។ ករណីធ្ងន់ធ្ងរ គឺអាចនាំឲ្យមានការបង្ករោគតាមប្រព័ន្ធ រំលាយអាហារ ដែលនាំឲ្យទារក រាកញឹកញាប់​ នាំឲ្យក្ដៅខ្លួន រលាកពោះវៀន មានហូរឈាមតាមប្រព័ន្ធរំលាយអាហារ និងបង្កឲ្យទារកមានភាពស្លេកស្លាំងធ្ងន់ធ្ងរផងដែរ ។

ចំពោះក្មេងដែលមានអាយុចន្លោះពី ៤ទៅ៥ខែ មានហានិភ័យទាបជាងទារក ដែលមានអាយុតិចជាងនេះ ព្រោះ​ប្រព័ន្ធរំលាយអាហារ តម្រងនោម និងប្រព័ន្ធភាពស៊ាំ មានភាពរឹងមាំ ងាយទទួលសារធាតុផ្សេងៗ ដែលមាននៅក្នុងទឹកដោះគោធម្មតា ។​

សរុបសេចក្ដីមក ការចិញ្ចឹមកូនដោយទឹកដោះម្ដាយគឺជាជម្រើសដ៏ល្អបំផុត ខណៈពេលការប្រើប្រាស់ម្សៅទឹកដោះគោដែលត្រូវបានផ្សំឡើងតាមរូបមន្ត គឺជារឿងត្រឹមត្រូវ ។ ហើយទារកដែលមានអាយុក្រោម១២ខែ មិនត្រូវឲ្យញ៉ាំទឹកដោះគោធម្មតា ដូចក្មេងធំនោះទេ ៕

អត្ថបទដោយ៖ ហួ ភារ៉ា

ប្រភព៖ livescience