បងប្អូនណាខ្លះកំពុងមានបញ្ហាមុខមុន មិនរលោងស្អាត ខំទិញម្សៅទិញឡេលាបអស់រាប់រយដុល្លារនៅតែមិនបាត់ ហើយថែមទាំងឡើងលើសដើមទៀត។ ខាងក្រោមនេះជាវិធីសាមញ្ញៗអនុវត្តជាប្រចាំថ្ងៃ ធានាទោះមុខអ្នកមុនកម្រិតណាក៏រាបអស់ ហើយមិនចាំបាច់ចំណាយលុយច្រើននោះទេ។

ជាការពិតណាស់យោងតាមប្រសាសន៍របស់អ្នកឧកញ៉ាវេជ្ជបណ្ឌិត គួច ម៉េងលី បានធ្វើការណែនាំអំពីវិធីងាយៗ ដើម្បីធ្វើឱ្យស្បែកមុខស្អាត រលោង គ្មានមុន និងបំបាត់ស្នាម​ ជាពិសេសទៀតនោះ​ បងប្អូនមិនចាំបាច់ចំណាយលុយច្រើនទៀតផង ជាក់ស្ដែងវិធីទាំងអស់នោះរួមមាន៖

១.ញ៉ាំទឹកឱ្យបាន ៨ ទៅ ៩ដប(ប្រហែលចន្លោះពី ៣លីត្រកន្លះ ទៅ៤លីត្រ) ក្នុងមួយថ្ងៃ

វេជ្ជបណ្ឌិត គួច ម៉េងលី បានមានប្រសាសន៍ថា ចង់មានស្បែកមុខស្អាត ស្បែកមុខរលោង គ្មានមុនស្នាម ឬ​បញ្ហាផ្សេងនោះទេ សូមញ៉ាំទឹកមួយថ្ងៃឱ្យបានចន្លោះពី៨ ទៅ៩ដបក្នុងមួយថ្ងៃ ដើម្បីជួយឱ្យស្បែកត្រជាក់ និងមានសំណើមគ្រប់គ្រាន់ ធ្វើឱ្យស្បែកភ្លឺរលោង។ វេជ្ជបណ្ឌិត បានបន្ថែមថា ប្រសិនបើអ្នកញ៉ាំទឹកមិនគ្រប់គ្រាន់នោះទេ ទោះធ្វើអ្វីផ្សេងដើម្បីឱ្យផ្ទៃមុខស្អាត ក៏គ្មានប្រសិទ្ធភាពនោះដែរ។

២.ហាមយកដៃស្ទាបមុខ ឬក៏កេះមុខ

វេជ្ជបណ្ឌិត បានបញ្ជាក់ថានៅពេលយើងយកដៃមកស្ទាប ឬអង្អែលនៅលើផ្ទៃមុខ វាធ្វើឱ្យជាតិដី ធូលីនៅលើផ្ទៃមុខទៅគល់រោម ធ្វើឱ្យស្ទះគល់រោមបណ្ដាលឱ្យកើតមុន ក្បាលខ្មៅ និងស្នាមនៅលើផ្ទៃមុខជាដើម។ ហាមដាច់ខាតយកដៃទៅកេះមុន ឬស្នាមនៅលើផ្ទៃមុខ ពីព្រោះចរន្តឈាមនៅលើផ្ទៃមុខមិនមានទ្វារបិទការចម្លងមេរោគនោះទេ។ ដូចនេះ នៅពេលដែលយើងយកដៃទៅកេះ ដែលបង្កឱ្យមានស្នាម ឬក៏ឈាម ជាហេតុធ្វើឱ្យមេរោគកាន់តែជ្រាបចូលស្បែកមុខពីមួយកន្លែងទៅមួយកន្លែង ហើយបណ្ដាលឱ្យកើតមុនកាន់តែច្រើន។

៣.បោកកម្រាលពួក ភួយ និងស្រោមខ្នើយមួយអាទិត្យម្ដង

ស្រោមខ្នើយ ស្រោមពូក ភួយ គឺជាកន្លែងដែលសម្បូរដោយមេរោគ និងធូលីជាច្រើនបំផុត។ ហេតុដូច្នេះ សូមអ្នកទាំងអស់គ្នាឧស្សាហ៍បោកកម្រាលពូក ភួយនិងខ្នើយឱ្យបានញឹកញាប់ផង។ បើកាលណាដែលធូលីដីបង្កឡើងកាន់តែច្រើន នោះនៅពេលដែលអ្នកគេង វាធ្វើឱ្យផ្ទៃមុខរបស់អ្នកនឹងប៉ះជាមួយមេរោគ និងធូលីដែលនៅលើភួយ ឬក៏ស្រោមខ្នើយរបស់អ្នក ហើយមេរោគទាំងអស់នេះនឹងបង្កឱ្យមានការចម្លងចូលទៅក្នុងស្បែកមុខរបស់អ្នកជាមិនខាន។

៤.កក់សក់ឱ្យបានរៀងរាល់ថ្ងៃ

មនុស្សជាច្រើនគិតថា ការកក់សក់រៀងរាល់ថ្ងៃធ្វើឱ្យសក់ជ្រុះ ក៏ប៉ុន្តែវេជ្ជបណ្ឌិត គួច ម៉េងលី បានបញ្ជាក់ថា ការកក់សក់ជារៀងរាល់ថ្ងៃ គឺមិនបណ្ដាលឱ្យជ្រុះសក់នោះទេ ថែមទាំងធ្វើឱ្យសក់ដុះកាន់តែច្រើនទៀតផង ពីព្រោះក្អែល សារធាតុខ្លាញ់កខ្វក់ និងធូលីដី ដែលធ្វើឱ្យស្បែកក្បាលរបស់អ្នករមាស់ ឡើងប្រេង និងបង្កងាប់គល់សក់ជាដើម។ បន្ថែមពីនេះ ការអ្នកគេងទាំងមិនកក់សក់ ដែលធ្វើឱ្យផ្ទៃមុខរបស់អ្នក ប៉ះញីជាមួយនឹងសក់ ដែលបណ្ដាលឱ្យបណ្ដុំមេរោគ ឬក៏បាក់តេរីបង្កបញ្ហាដូចជា ធ្វើឱ្យផ្ទៃមុខឆ្លងមេរោគចូលក្នុងស្បែកដែលបណ្ដាលឱ្យមុខរមាស់ រោល ស្ទះគល់រោម ដែលបង្កឱ្យកើតជាមុន ស្នាម និងបញ្ហាស្បែកមុខជាច្រើន។

៥. កុំលុបមុខពេលមកពីក្រៅ

ធ្វើការហាលក្តៅ ជិះម៉ូតូត្រូវក្តៅ ឬមកពីដើរលេង ហើយពេលចូលផ្ទះភ្លាមហាមរត់ទៅលុបមុខដាច់ខាត ពីព្រោះការលុបមុខនៅពេលដែលមុខកំពុងក្តៅធ្វើឱ្យមុខរបស់អ្នកជាំ មានស្នាមអុចខ្មៅ និងកើតមុនកាន់តែខ្លាំង។ ដូច្នេះអ្នកត្រូវរងចាំ ១០ ទៅ ១៥នាទីទុកមុខរបស់អ្នកឱ្យត្រជាក់សិន ចាំទៅលាងសម្អាតមុខ។

លើសពីនេះទៀត យោងតាមការចុះផ្សាយរបស់គេហទំព័រ healthline បានប្រាប់ថា អាហារដែលអ្នកត្រូវតែញ៉ាំជារៀងរាល់ថ្ងៃ ជួយឱ្យមុននៅលើមុខរបស់អ្នកឆាប់រាប និងស៊ីមុននៅលើមុខរបស់អ្នកបានល្អនោះគឺមាន ២ ប្រភេទ៖

ទីមួយ ការបរិភោគអាហារអូមេហ្គា៣ដែលមានដូចជា សាច់ត្រី ត្រីសាម៉ុង សាច់គោធម្មជាតិ ស៊ុតមាន់ ខាត់ណា និងគ្រាប់ធញ្ញជាតិ ជារៀងរាល់ថ្ងៃគឺជួយធ្វើឱ្យមុនរបស់អ្នកឆាប់ជាសះស្បើយ និងរលាយបាត់ពីមុខ។ ពីព្រោះសារធាតុអូមេហ្គា៣ វាមានតួនាទីប្រឆាំងទៅនឹងការរលាក ជាពិសេសគឺគ្រាប់មុន ដូច្នេះប្រសិនជាអ្នកកំពុងតែមានបញ្ហាមុខកើតមុនច្រើន អ្នកត្រូវតែញ៉ាំអាហារដែលមានអូមេហ្គា៣ឱ្យបានច្រើន។

ទីពីរ  អាហារជាតិសរសៃដូចជា ដំឡូង ខាត់ណាខៀវ សណ្តែក ផ្លែប៊ឺរ ផ្លែប៉ោម ពោត ជាដើម វាជួយអ្នកក្នុងការរំលាយអាហារ និងបញ្ចេញសារធាតុដែលបង្ក ឱ្យកើតមុន និងស្បែកក្មេងជាងវ័យ។ មិនត្រឹមតែប៉ុណ្ណោះ ជាតិសរសៃអាចជួយកាត់បន្ថយការស្រូបយកជាតិខ្លាញ់នៅកម្រិតពោះវៀន ជួយការពារស្បែកកុំឱ្យឡើងខ្លាញ់ ជួយកាត់បន្ថយការរលាកដែលបណ្តាលមកពីមុន ជួយប្រព័ន្ធរំលាយអាហារក្នុងការដុតកាកសំណល់ និងជាតិពុល ជួយរក្សាតុល្យភាពអ័រម៉ូន និងសារធាតុប្រឆាំងអុកស៊ីតកម្មផងដែរ។

គូសបញ្ជាក់ផងដែរថា វិធីទាំង ៥ដែលអ្នកឧកញ៉ាវេជ្ជបណ្ឌិត គួច ម៉េងលី បានណែនាំ រួមជាមួយនឹងការញ៉ាំអាហារ ២ប្រភេទខាងលើគឺជាជម្រើសដ៏ល្អបំផុតជួយកែខៃរាល់បញ្ហាមុនគ្រប់ប្រភេទនៅលើមុខរបស់អ្នក ជួយឱ្យស្បែកមុខសុខភាពល្អ និងស្អាតរយៈពេលវែង ហើយក្បួនទាំងនេះក៏មិនត្រូវការចំណាយលុយច្រើននោះដែរ៕

អត្ថបទដោយ៖ មឿន គន្ធា