ផ្ទៃមុខស្រអាប់មិនស្រស់ថ្លា គ្មាននរណាម្នាក់ប្រាថ្នាចង់បាននោះទេ ជាពិសេសមនុស្សស្រីតែងតែចង់បានស្បែកមុខរលោងស្អាត ដូច្នេះថ្ងៃនេះក្រុមការងារចាបបៃតងកម្ពុជា សូមផ្ដល់ដំបូន្មានខ្លះពាក់ព័ន្ធនឹងការថែរក្សាផ្ទៃមុខ ដែលមិត្តៗនារី ក៏ជាសុភាពបុរសទាំងអស់គួរតែអនុវត្តតាម។

 ដោយផ្អែកតាមប្រសាសន៍របស់វេជ្ជបណ្ឌិត ប៊ិត សុខទេពី ជាវេជ្ជបណ្ឌិតឯកទេសរោគសើស្បែក បច្ចុប្បន្នកំពុងបម្រើការងារនៅគ្លីនិកTepy Skin Care បានឱ្យដឹងថា ត្បិតតែយើងមិនអាចសន្មត់ថាមុនបង្កមកពីអ្វីឱ្យពិតប្រាកដ ក៏ប៉ុន្តែមានកត្តាធំមួយដែលគេកត់សម្គាល់នោះ គឺកត្តាបម្រែបម្រួលអរម៉ូន។ ក្រៅពីកត្តាបម្រែបម្រួលអរម៉ូន វេជ្ជបណ្ឌិត បានបន្ថែមថាមានកត្តាផ្សេងៗជាច្រើនទៀតដូចជា កត្តារស់នៅ ដែលមានន័យថា ទម្លាប់រស់នៅកង្វះអនាម័យគឺ បង្កហានិភ័យដល់សុខភាពរបស់អ្នកគ្រប់ផ្នែកទាំងអស់។ ជាពិសេសគឺ ការកង្វះអនាម័យនៅកន្លែងគេងរបស់អ្នក នៅពេល​អ្នកមិនបានកក់សក់ទៀងទាត់ រួមទាំងកម្រាលគេង ស្រោមខ្នើយ ភួយ របស់អ្នកមិនបានបោកសម្អាតបានត្រឹមត្រូវទៀតនោះ ធ្វើឱ្យមេរោគ បាក់តេរី ធូលីដីទាំងអស់នោះវានឹងមកទុំលើស្បែកមុខរបស់អ្នក ហើយវាបង្កឱ្យកកស្ទះក្នុងក្រពេញរន្ធញើសលើផ្ទៃមុខ ឬខ្នង ហើយធ្វើឱ្យរលាក់ក្រពេញញើសបង្កកើតជាមុនផងដែរ។

ជាមួយគ្នាផ្អែកតាមការសិក្សាស្រាវ ក៏ដូចជាផ្អែកតាមប្រសាសន៍វេជ្ជបណ្ឌិត នេះជាដំបូន្មានសំខាន់ៗដែលយុវវ័យក៏ដូចជាលោកអ្នក គួរតែធ្វើតាមដើម្បីកុំឱ្យផ្ទៃមុខមានបញ្ហា៖

ក.កុំ

1. កុំប្រើស្ក្រាប់ពេលកំពុងមានមុន ព្រោះវាអាចនឹងធ្វើឱ្យស្បែកងាយរងប្រតិកម្ម

2. កុំប្រើពពួកអាស៊ីតក្នុង skincare mix ចូលគ្នាច្រើនពេក ព្រោះសារធាតុខ្លះអាចនឹងឆាប់ប្រតិកម្ម

3. កុំញិចមុន កេះមុន ប៉ះមុខ ព្រោះដៃរបស់អ្នកអាចនឹងសម្បូរមេរោគ

4. កុំលាងមុខដោយប្រើសាច់ហ្វូមដុសផ្ទាល់ជាមួយមុខ ! ញីយកពពុះសិនចាំយកមកលាង

5. កុំប្រើក្រមួន ឬប្រេងលាងមុខយូរពេក ធ្វើឲ្យងាយស្ទះរន្ធរោម បើអ្នកអនុវត្តការលាងមុខ ២ តង់

6. កុំប្រើច្រើនជាន់ពេក ព្រោះអាចនឹងធ្វើឱ្យកកស្ទះរន្ធរោម

7. កុំព្យាយាមបង្ខំស្បែកដោយប្រើបរិមាណ skincare ច្រើនៗ ព្រោះវាអាចនឹងធ្វើឱ្យឆាប់រលាក ឬក្រហមរោល ងាយប្រតិកម្ម ស្ដើងស្បែក

ខ. ខំ

1. ផ្ដល់ជាតិទឹកឲ្យស្បែកឲ្យបានច្រើនតាមដែលអាចធ្វើទៅបាន ដូច្នេះមួយថ្ងៃគួរតែផឹកទឹកយ៉ាងតិចបំផុត២,៥លីត្រ

2.លាបឡេការពារកម្ដៅថ្ងៃគ្រប់ពេល មិនថាអ្នកនៅផ្ទះ ឬចេញក្រៅនោះទេ ព្រោះឡេការពារកម្ដៅថ្ងៃជួយការពារស្បែកបានល្អណាស់ និងត្រូវលាបរៀងរាល់៣-៤ម៉ោងម្ដង

3. គេងឱ្យបានគ្រប់គ្រាន់ ជាពិសេសពេលយប់ ព្រោះបើអ្នកមិនគេងស្បែករបស់អ្នកនឹងស្ងួត ស្លក់ក្រោមភ្នែក ស្បែកឆាប់ជ្រួញខ្លាំងណាស់

4. លាបទេផ្ដល់សំណើមដល់ស្បែក ឬក៏បិទម៉ាសយ៉ាងតិច៣ដងក្នុងមួយសប្ដាហ៍

5. ញុំាបន្លែផ្លែឈើដែលសម្បូរវីតាមីនស៊ីដូចជាក្រូចឆ្មា ផ្លែផាសិន គីវី ល្ហុងចេក និង ម្ហូបអាហារមានជីវជាតិ

គ. គួរ

1. គួរលាងសម្អាតផ្ទៃមុខដោយយកចិត្តទុកដាក់លាងថ្នមៗកុំយកក្រចកដៃកោសត្រដុសស្បែកខ្លាំងៗ ប្រសិនបើស្បែកអ្នកខ្លាញ់ខ្លាំង គួរតែលាង២ដង ដើម្បីជម្រះមេរោគ (ត្រូវលាងសម្អាតមុខយ៉ាងតិច៣ដងក្នុងមួយថ្ងៃ ជាពិសេសមុនចូលគេង)

2. ពេលផ្ទៃមុខមានស្នាម មុខឡើងមុន សូមប្រើឡេផ្ដល់សំណើមលាប ឬពពួកគ្រីមដែលត្រជាក់ៗដូចជាពពួកប្រទាលកន្ទុយក្រពើ ពីព្រោះវាអាចជួយឱ្យផ្ទៃមុខត្រជាក់ និងក្រាបមុនលឿន

3. ប្រសិនបើមុខកើតមុនធំៗ មុនខ្ទុះ មុនដំបូក អ្នកគួរតែទៅពិគ្រោះជាមួយអ្នកជំនាញដើម្បីរកដំណោះស្រាយបន្ថែម មិនមែនដេកលាបតែផលិតផលនោះទេ។

4. រើសផលិតផលផ្អែកលើធាតុផ្សំ និងតម្រូវការស្បែកមិនមែនលើភាពល្បីល្បាញ

5. ប្រើ skincare ដែលមានប្រភពច្បាស់លាស់ និងការណែនាំពីរបៀបប្រើប្រាស់ និងទុកដាក់ត្រឹមត្រូវ

  ជាមួយគ្នានេះ វេជ្ជបណ្ឌិត សុខទេពី បានបង្ហើបបន្ថែមថា កត្តាចំណីអាហារក៏ជាផ្នែកមួយដែលធ្វើឱ្យ ស្បែកឆាប់ឡើងមុនផងដែរ។ ពោល គឺពពួកអាហារផ្អាប់ អាហារដែលមានជាតិហឹលខ្លាំង អាហារដែលមានជាតិផ្អែមឬ​ ប្រៃខ្លាំង និងពពួកគ្រឿងស្រវឹងជាដើម។ នៅពេលអ្នកហូបអាហារទាំងអស់នេះ ញឹកញាប់ វាធ្វើឱ្យក្នុងរាងកាយរបស់អ្នកទទួលបានជាតិស្ករ ជាតិអំបិល និងជាតិផ្អាប់ស្អុយលើសលប់ពេក ស្បែករបស់អ្នកឆាប់រោល ក្រហម ហើយវាជះផលអាក្រក់ធ្វើឱ្យស្បែកស្រអាប់ ស្បែកបាត់បង់សំណើម កើតមុន ស្បែកចាស់មុនអាយុជាដើម។ យ៉ាងណាមិញ ការលាងសម្អាតផ្ទៃមុខមិនជ្រះល្អ ក៏ជាកត្តាធ្វើឱ្យស្បែកងាយនឹងឡើងមុនផងដែរ ដូច្នេះមិនថាមុនចូលគេង ឬ ពេលអ្នកមកពីខាងក្រៅនោះទេ អ្នកត្រូវលាងសម្អាតផ្ទៃមុខរបស់អ្នកឱ្យបានស្អាត ជាពិសេស ការរស់នៅក្នុងសម័យកូវីដ ដែលអ្នកតែងតែពាក់ម៉ាស ហើយក្នុងម៉ាសរបស់អ្នកគឺ សម្បូរដោយបាក់តេរី មេរោគ ធូលីជាច្រើនដែលអ្នកមើលមិនឃើញ។ ដូច្នេះ ត្រូវលាងសម្អាតផ្ទៃមុខឱ្យបានស្អាត ឱ្យអស់បាក់តេរី ជាតិប្រេងរលើបរលោងលើផ្ទៃមុខ។ បន្ថែមពីនេះអ្នកគួរប្រើ ហ្វូម ឬសាប៊ូដែលមានPHសមល្មមនឹងស្រទាប់ស្បែករបស់អ្នក ចៀសវាងប្រើសាប៊ូមានPHខ្ពស់ ប្រយ័ត្នរលាក់ស្បែកមុខ។

អត្ថបទដោយ៖ តឹក​ ស៊ីថា