សម្ពាធ ស្ត្រេស តឹងតែង ធុញថប់ក្នុងអារម្មណ៍ កំពុងតែកើតមានចំពោះមនុស្សគ្រប់រូបជាពិសេសសម្រាប់មនុស្សវ័យតែម្តង។ ដើម្បីជួយសម្រួលផ្លូវចិត្តឱ្យរីករាយនោះ សូមអ្នកញ៉ាំអាហារ ចំនួន ៥ប្រភេទនេះនៅពេលព្រឹកជួយឱ្យសុខភាពផ្លូវចិត្ត និងបាត់ស្រ្តេស ដោយយោងតាមប្រភព middleeastmedicalportal.com ៖
១. ទទួលទានខ្លាញ់ត្រឹមត្រូវ៖ ខួរក្បាលរបស់អ្នកត្រូវការអាស៊ីតខ្លាញ់ (ដូចជាអូមេហ្គា ៣ និង ៦) ដើម្បីឱ្យដំណើរការបានល្អ។ អ្នកអាចញ៉ាំខ្លាញ់ល្អនៅពេលព្រឹកមានដូចជាត្រី ខ្លាញ់ត្រីសាច់បក្សី គ្រាប់ធញ្ញជាតិ (គ្រាប់ Walnut និងប្រេងអាល់ម៉ុង) ប្រេងអូលីវ និងផ្កាឈូករ័ត្ន គ្រាប់ល្ពៅ ផ្លែបឺរទឹកដោះគោ ទឹកដោះគោជូរ ឈីស និងស៊ុត។ ព្រោះអាហារនេះប៉ូវខួរក្បាលឱ្យរីករាយ។
២. ថែរក្សាពោះវៀន៖ ពេលខ្លះបញ្ហាពោះវៀន អាចឆ្លុះបញ្ចាំងពីអារម្មណ៍របស់អ្នក។ បើអ្នកតានតឹង ឬធុញថប់ វាអាចធ្វើឱ្យកម្រិតសមត្ថភាពពោះវៀនប្រែប្រួលថយចុះ ឬបង្កើនល្បឿន។ ដូច្នេះពេលព្រឹកនេះ ចូរអ្នកញ៉ាំអាហារណាមានជាតិសរសៃ ជាតិទឹក ឱ្យបានច្រើន ដោយរួមមាន ផ្លែឈើ បន្លែ គ្រាប់ធញ្ញជាតិ ទឹកដោះគោជូរ និងប្រូតេអ៊ីនផ្សេងៗ...ដើម្បីសម្រួលពោះវៀនរបស់អ្នកបានល្អ។
៣. ស្លឹកបៃតង៖ វាមានអត្ថប្រយោជន៍ជាច្រើនដល់រាងកាយមនុស្ស បើប្រៀបធៀបទៅនឹងអាហារផ្សេងទៀត ហើយរួមទាំងសុខភាពផ្លូវចិត្តផងដែរ។ ការសិក្សាថ្មីៗបានបង្ហាញថា ស្លឹកបៃតង គេញ៉ាំរាល់ថ្ងៃជាពិសេសពេលព្រឹកជួយកាត់បន្ថយជំងឺវង្វេង។ អ្នកអាចបញ្ចូលផ្កាខាត់ណា ស្ពៃខ្មៅ បៃតង... នៅក្នុងរបបអាហារប្រចាំថ្ងៃ ដើម្បីអារម្មណ៍ស្រស់ថ្លាផងដែរ។
៤. ញ៉ាំផ្លែចេកពេលព្រឹកជួយអ្នកមានថាមពលនៃប៉ូតាស្យូម និងម៉ាញ៉េស្យូមដែលជួយគ្រប់គ្រងសម្ពាធឈាម និងផ្លូវអារម្មណ៍របស់អ្នកបានសម្រាកស្ងប់។ ផ្លែចេកនេះជាអាហារសម្រន់ដ៏ល្អមួយដើម្បីរំងាប់សរសៃប្រសាទក្នុងខួរក្បាលនិងផ្លូវចិត្តស្ងប់។
៥. ផឹកកាហ្វេពេលព្រឹកជួយអារម្មណ៍ល្អ និងស្វាងស្មារតី បើផឹកវាពេលព្រឹក ហើយវារំញោចផ្តល់ថាមពលផ្លូវចិត្តបានលឿន។
ដូច្នេះហើយ! អាហារទាំង៦នេះល្អសម្រាប់ផ្លូវចិត្តមែន ដើម្បីប៉ូវចិត្តនេះ អ្នកគួរបញ្ចេញទម្លាប់បន្ថែមគឺហាត់ប្រាណ គេងឱ្យបានគ្រប់គ្រាន់ និងអានសៀវភៅថែម ដើម្បីផ្លូវចិត្តរបស់អ្នករឹងមាំ និងមានសមត្ថភាពដោះស្រាយបញ្ហាក្នុងជីវិតជាប្រចាំថ្ងៃផងដែរ។ អស់បញ្ហា អស់ការថប់បារម្ភ អត្ថបទដោយ៖ទ្រសុភាព