ថ្មីៗ នេះ តារាចម្រៀង ឱក សុគន្ធកញ្ញា មានវ័យ ៣៧ឆ្នាំមានកូនពីរនាក់ក៏ដោយ គាត់ទទួលបានភាគជោគជ័យខ្លាំងណាស់ក្នុងការកម្មវិធី The Q – Rise of The Queen – Aok Sokunkanha Solo Concert រហូតដល់ហ្វេនៗ ដាក់ប្រសិទ្ធិនាមឲ្យថា The Queen នៅពីក្រោយភាគជោគជ័យដ៏អស្ចារ្យនេះ គាត់មាន ៣ចំណុចយ៉ាងសាមញ្ញ៖
១. ចាក់គ្រឹះ ដើម្បីលូតលាស់៖ តារាចម្រៀង ឱក សុគន្ធកញ្ញា មាននិស្សនពីកំណើតអ្នកសិល្បៈស្រាប់ហើយបានការបណ្ដុះបណ្ដាលនៅសាលាភូមិន្ទវិចិត្រសិល្បៈយ៉ាងល្អដោយគាត់ធ្លាប់បានលើកឡើងថា “ខ្ញុំមានមូលដ្ឋានគ្រឹះបានរាំរបាំពីបុរាណខ្មែរយើង ទើបធ្វើឲ្យខ្ញុំមានសមត្ថភាពអាចរាំចង្វាក់បែបសម័យយ៉ាងរស់រវើកបែបនេះ”។ ដោយសារគាត់ធ្លាប់រៀនសូត្រជាមួយគ្រូបែបនេះហើយបានជាគាត់ដឹងពីចង្វាក់នៃការរាំបានយ៉ាងឡូយពិសេស។ អាចហៅថា ចេះមានគ្រូ ជាការគ្រឹះយ៉ាងរឹងមាំបំផុត។
២. ភាពអត់ធ្មត់៖ ទម្រាំឈានដល់ចំណុចកំពូលវិស័យតារាចម្រៀងនារីដូចជាសព្វថ្ងៃនេះ តារាចម្រៀង ឱក សុគន្ធកញ្ញា មានភាពអត់ធ្មត់ខ្ពស់ណាស់។ គាត់និយាយថា កន្លងទៅអស់ជាច្រើនឆ្នាំ ដែលបានបោះជំហានចូលក្នុងវិស័យសិល្បៈ នាងខ្ញុំតែងតែប្រាប់ខ្លួនឯង ឲ្យខិតខំអភិវឌ្ឍន៍ខ្លួន មិនថាជួបរឿងអ្វីកុំបោះបង់ ពាក្យជាច្រើនដែលធ្វើឲ្យខ្ញុំមានថ្ងៃនេះ ហើយដាស់សតិខ្លួនឯង រហូតមក “ដ្បិតខ្ញុំគ្មានសមត្ថភាពច្រៀងពីរោះដូចអ្នកចង់បាន តែខ្ញុំមានសមត្ថភាព នឹងធ្វើឱ្យអ្នកស្ដាប់បទចម្រៀងរបស់ខ្ញុំ នៅថ្ងៃណាមួយ”។ ការអភិវឌ្ឍន៍សមត្ថភាពក្នុងការច្រៀងរបស់គាត់ឱ្យល្អបែបនេះ ព្រោះតែគាត់មានតាំងចិត្តខ្ពស់ និងអត់ធ្មត់ណាស់។
៣. ពូកែដាក់ខ្លួនដាក់អារម្មណ៍ក្នុងបទចម្រៀង៖ តារាចម្រៀង ឱក សុគន្ធកញ្ញា មានទេពកោសល្យខ្ពស់ក្នុងការលេងអារម្មណ៍ដាក់មនោសញ្ចេតនាក្នុងបទចម្រៀង ធ្វើឱ្យអ្នកស្តាប់មានភាពអណ្តែកអារម្មណ៍តាមសាច់ភ្លេង និងទឹកដមសម្លេងតាមការច្រៀងដែរ។ យើងអាចហៅថា “រស់ក្នុងព្រលឹងបទចម្រៀង” អ្នកមានលក្ខណៈបែបនេះ ជាអ្នកពូកែដាក់ខ្លួនដាក់អារម្មណ៍ក្នុងបទចម្រៀងណាស់។ ព្រោះតែគាត់ខំធ្វើការយ៉ាងផ្ចិតផ្ចង់ ហ្មត់ចត់ជាមួយអ្នកជំនាញគ្រប់ផ្នែកផ្សេងៗ នាំឲ្យបទចម្រៀងនីមួយៗ ចេញមកបម្រើអារម្មណ៍ហ្វេនៗ ល្អឥតខ្ចោះ។ មានហ្វេនម្នាក់បាននិយាយថា ខ្ញុំចូលចិត្តបទចម្រៀង បងកញ្ញា ព្រោះគាត់ច្រៀងចេញមកបែបច្បាស់ៗ មិនបន្លំៗ ហើយដង្ហើមវែង ចេញសម្លេងមកយ៉ាងពិរោះស៊ីអារម្មណ៍ណាស់។ នេះជាមូលហេតុដែលខ្ញុំចូលចិត្តបទគាត់រហូតមក៕ អត្ថបទដោយ៖ ទ្រ សុភាព