វត្តមានរបស់តារាស្រី Zhao Lusi កំពូលក្រមិចក្រមើមក្នុងបេះដូងមហាជនគាំទ្រនៅតែបន្តកក្រើកបណ្ដាញសង្គមអ៊ីនធឺណិត ខណៈពេលដែលទេពកោសល្យសម្តែងរបស់នាងកាន់តែមានភាពទាក់ទាញពីមួយវគ្គទៅមួយស្ទើរតែគ្រប់សាច់រឿងទៅហើយ។ ចំណែកឯសម្រស់វិញ រឹតតែស្អាតជាងមុនទ្វេរដងទៅទៀតទៅតាមសាច់រឿងថ្មីៗចេញជាបន្តបន្ទាប់។

ហើយថ្ងៃនេះផងដែរ Healthy Cambodia នឹងសូមបង្វែរអារម្មណ៍ប្រិយមិត្តអ្នកអានគ្រប់រូបមកស្វែងយល់ពីតិចនិកធ្វើឱ្យសម្រស់មានភាពទាក់ទាញភ្នែកខ្លាំងរបស់ Zhao Lusi ដោយគ្រាន់តែអនុវត្តន៍រឿងសាមញ្ញៗ ៣ប៉ុណ្ណោះ៖

១. របៀបផាត់មុខ៖ យោងតាមប្រភព daydaynews.cc បានលើកឡើងថា Zhao Lusi ជាប់ឈ្មោះជាតារាស្រីចូលចិត្តផាត់មុខបែបសាមញ្ញបំផុត មើលទៅហាក់ដូចជាគ្មានគ្រឿងសម្អាងលើផ្ទៃមុខរបស់នាងអ៊ីចឹង។ ព្រោះថានាងមិនចូលចិត្តប្រើក្បួនផាត់មុខបែបរញ៉េរញ៉ៃច្រើនទេ គ្រាន់តែជ្រើសយកនូវផ្នែក៣សំខាន់នៅលើផ្ទែមុខ គឺភ្នែក ចិញ្ចើម និងបបូរមាត់ រៀបចំតុបតែបែបទម្រង់សាមញ្ញពណ៌ស្រាល តែទាក់ទាញខ្លាំងមិនធម្មតា មើលមុខនាងលើកណាក៏លង់ស្រលាញ់ពេញចិត្តដែរ៖

ក. ចិញ្ចើម៖ រោមចិញ្ចើមរបស់ Zhao Lusi ថែរក្សារាងចិញ្ចើមតាមបែបធម្មជាតិ ទាន់សម័យដូចចិញ្ចើមបែបកូរ៉េ។ ចំណែកឯកម្រិតនៃការគូសទម្រង់ចិញ្ចើមវិញ គឺបែបពណ៌ត្នោតស្រាលមើលទៅមិនមានភាពរញ៉េរញ៉ៃនៅច្រើនឡើយ។

ខ. ត្របកភ្នែកពណ៌ស្រាល៖ ភាពស្រស់ស្អាតបន្ថែមទៀតរបស់តារាស្រីចិនរូបនេះ គឺទទួលបានពីការលេងពណ៌ត្របកភ្នែកបែបស្រាលស្រទន់។ ដោយលក្ខណៈរបស់វា មើលមិនមានសភាពក្រាស់ពេកភ្ជាប់ជាមួយនឹងការគូសទម្រង់កន្ទុយពណ៌ត្នោតស្ទើរតែមើកមិនដឹងឡើយ រីឯរោមភ្នែកទៀតសោត នាងគ្រាន់តែប្រដាប់ពត់រោមភ្នែកនិងលាប mascara ឱ្យឃើញភ្នែករាងធំមូលសមស្របនឹងកែវភ្នែកមូលក្រឡង់របស់នាង។

គ. បបូរមាត់ក្រហមបែបធម្មជាតិ៖ ជាទូទៅមានតារាសម្តែងជាច្រើនតែងជ្រើសរើសពណ៌លាបបបូរបែបដិតៗ ព្រោះគេអាចបង្ហាញពីភាពសិចស៊ីគួរឱ្យចាប់អារម្មណ៍។ តែខុសគេអ្វីតែ Zhao Lusi ចូលចិត្តប្រើក្រែមពណ៌ស្រាលៗ ដូចជាពណ៌ផ្កាឈូក ទឹកក្រូច ក្រហមស្រាល ...មើលទៅដូចបបូរគាត់កូនក្មេង។ អ្វីតែកាន់ជាអាថ៌កំបាំងពិសេសទៀតនោះ គឺតួឯកស្រីរូបនេះ ក៏ស្រលាញ់ការថែរក្សាមាត់ធ្មេញខ្លាំងផងដែរ ដើម្បីចងភ្ជាប់ស្នាមញញឹមជាមួយបបូរមាត់គួរឱ្យស្រលាញ់ជាមួយនឹងធ្មេញសស្អាត។

២. ប្រើផលិតផលដែលផ្តល់ជាតិទឹកដល់ស្បែក៖ Zhao Lusi មិនប្រើផលិតផលផ្តេសផ្តាសនោះទេ នាងជ្រើសតែផលិតណាដែលផ្តល់សំណើម និងមានជាតិប្រូតេអ៊ីនជំនួយស្បែកប៉ុណ្ណោះដែលមានដូចជា លេឡាប សារ៉ូមបំប៉ន...ជាដើម។ ព្រោះថាស្បែកមុខត្រូវការបំផុតគឺវីតាមីន ឬប្រូតេអ៊ីន និងសមាសធាតុទឹក ដើម្បីជ្រៀបចូលទៅជួយព្យាបាល ការពារស្រទាប់ស្បែកទាំងមូល បង្កាពីការរងគ្រោះសិករិចរឹលដោយសារបរិយាកាសខាងក្រៅ មិនមែនរបស់ធ្វើឱ្យកាត់ស្បែកនោះឡើយ។ ជាងនេះទៅទៀតនាងក៏មិនភ្លេចម៉ាស ប្រើទឹកToner និងលាងមុខជាប្រចាំផងដែរ។

៣. របបអាហារ៖ ដូចដែលបងប្អូនតាមដឹងរួចមកហើយថា Zhao Lusi មានទម្លាប់ឃុំគ្រងរបបអាហារជាប់លាប់ខ្លាំងណាស់ ដោយក្នុងចំណោមការញ៉ាំរបស់នាងបានធ្វើឱ្យមហាជនគាំទ្រសង្កេតឃើញថា នាងចូលចិត្តប្រភេទ ញ៉ាំកូនប៉េងប៉ោះឆឺរី ក្រូច និង បន្លែ។ លើសពីនេះទៅទៀត ការញ៉ាំទឹកឱ្យច្រើនក៏ជាផ្នែកមួយដែលនាងមិនអាចអត់បានដូចគ្នា។

ជារួមមកវិញ ការអនុវត្តន៍ វិធីងាយៗខាងលើនេះ​ មិនត្រឹមតែធ្វើឱ្យស្បែកមុខរបស់ Zhao Lusi ម៉ត់ស្អាតនោះទេ សូម្បីតែទម្ងន់ក៏មិនងាយឡើងផងដែរ។ ទាំងនេះជាភាពស្រស់ស្អាតបែបធម្មជាតិ ដែលយើងគួរតែសាកល្បងតាមនាង៕