មនុស្សស្រីមានស្បូន២ (Double uterus/ Uterine Didelphys) គឺជាភាពមិនប្រក្រតីពីកំណើតដ៏កម្រមួយរបស់ស្ត្រី ដែលមានទម្រង់ស្បូនញែកចេញជា២។ លក្ខណៈស្បូនញែកចេញជា២នេះមានច្រើនករណីដោយមានករណីខ្លះញែកតិច ញែកខ្លាំង និងញែកដាច់ចេញពីគ្នាតែម្តង។ ជាឧទាហរណ៍៖ ករណីជញ្ជាំងស្តើងនៃជាលិកាញែកនោះរត់ចុះតាមប្រវែងទ្វារមាស បែងចែកឱ្យស្បូនមានជារន្ធពីរដាច់ដោយឡែកពីគ្នា និងករណីស្បូនទាំង២អាចមានមាត់ស្បូន១បើក និងមួយទៀតបិទ។ (នេះបើយោងទៅតាមប្រភពចេញផ្សាយ mayclinic)

ចំពោះរោគសញ្ញាស្ត្រីដែលមានស្បូនញែកចេញជា២ នេះ ភាគច្រើនមិនបង្ករោគអាការធ្វើទុក្ខអ្វីដល់សុខភាពទេ ក៏ប៉ុន្តែគេអាចពិនិត្យដឹងថាមានបញ្ហាស្បូនញែកចេញជា២ ក្នុងអំឡុងពេលពិនិត្យអាងត្រគាកជាទៀងទាត់ អំឡុងពេលពិនិត្យសុខភាពផ្លូវពេទ្យ និងពេលពិនិត្យសុខភាព ដើម្បីកំណត់ពីមូលហេតុនៃការរលូតកូនម្តងហើយម្តងទៀត។ ដោយឡែក ចំពោះករណីទម្រង់ស្បូនញែកចេញជា២ខ្លះ អាចបង្កជាអាការគួរឱ្យកត់សម្គាល់រួមមាន៖

១. ឈឺចាប់អំឡុងពេលរួមភេទ

២. ចុករមួល ឈឺចាប់មុន និងអំឡុងពេលមករដូវ

៣. ការហូរឈាមខ្លាំងអំឡុងពេលមានរដូវ

៤. នៅតែមានឈាមរដូវហូរប្រលាក់ឈាមនៅពេលប្រើ tampon (Tampon សំឡីអនាម័យដែលគេផលិតឡើងសម្រាប់ដាក់ចូលទ្វារមាសស្រូបឈាមរដូវ) ដោយសារតែបានប្រើដាក់ចូលទៅក្នុងស្បូនតែមួយចំហៀង មិនបានដាក់ចូលមួយចំហៀង

៥. ការរលូតកូនញឹកញាប់ (ពិបាកនៅក្នុងការមានផ្ទៃពោះ)

៦. សម្រាលកូនមិនគ្រប់ខែ...។

គូសបញ្ជាក់បន្ថែមផងដែរថា សម្រាប់ស្ត្រីមានស្បូនញែកជា២អាចមានលទ្ធភាពក្នុងការពពោះ និងសម្រាលបានដូចស្ត្រីទូទៅ ក៏ប៉ុន្តែស្ថានភាពស្បូនបែបនេះ គឺបង្កើនហានិភ័យខ្ពស់នៃការរលូតកូន និងបញ្ហាសម្រាលកូនមិនគ្រប់ខែ។ បន្ថែមជាមួយគ្នានេះទៀតសោត អ្នកដែលមានបញ្ហាស្បូនញែកជា២ខ្លះអាចនឹងត្រូវប្រឈមមុខនឹងការគ្មានកូន និងមានបញ្ហាតម្រងនោម។

តើបញ្ហាស្បូនញែកជា២អាចព្យាបាលបានដែរទេ? ចំពោះអ្នកផ្តល់សេវាថែទាំសុខភាពភាគច្រើន គេមិនណែនាំឱ្យព្យាបាលស្បូនពីរដងទេ ព្រោះវាជាករណីមានពីធម្មជាតិមក។ លុះត្រាតែអ្នកមានបញ្ហានេះ ជួបប្រទះរោគសញ្ញាដូចជាការបាត់បង់គភ៌ម្តងហើយម្តងទៀត ពីព្រោះថាប្រសិនណាបើធ្វើការ​វះកាត់​ ​ស្បូនមួយផ្នែក ​អាច​ធ្វើ​ឱ្យ​ស្បូន​នៅ​សល់​​ចុះខ្សោយ។

ក្នុងលក្ខខណ្ឌថែរក្សាសុខភាពចំពោះអ្នកមានបញ្ហាស្បូន២នេះត្រូវ៖

- ទៅពិនិត្យសុខភាពស្បូនឱ្យបានទៀងទាត់ ជាពិសេសអំឡុងពេលមានផ្ទៃពោះ

- ទទួលទាននូវរបបអាហារដែលសម្បូរទៅដោយសារចិញ្ចឹម និងវីតាមីនផ្សេងៗរួមមាន បន្លែ ផ្លែឈើ ត្រី សាច់ ស៊ុត និងគ្រាប់ធញ្ញចាតិ...។

- លាងសម្អាត និងអនាម័យប្រដាប់បន្តពូជឱ្យបានល្អ ចៀសវាងការបង្ករោគបាក់តេរី

- ប្រសិនជួបបញ្ហាសុខភាពណាមួយមិនប្រក្រតីទាក់ទងទៅនឹងបញ្ហាស្បូនត្រូវតែប្រញាប់ទៅពិនិត្យជាមួយពេទ្យជំនាញជាបន្ទាន់...៕



ប្រភពបន្ថែម៖ clevelandclinic

អត្ថបទដោយ៖ ប៉ាវ ភក្តី