១. អស់កម្លាំង គ្មានថាមពល៖ អាការៈបែបនេះខ្ញុំជឿថាមានមនុស្សច្រើនហើយដែលបានជួបប្រទះនៅពេលយប់មិនបានគេង ឬគេងភ្ញាក់ៗគេងមិនស្ងប់ ព្រឹកឡើងប្រាកដណាស់ថាអ្នកនឹងគ្មានកម្លាំងកំហែង ល្ហិតល្ហៃ ហើយជៀសមិនផុតអ្នកនឹងរករបស់ជំនួយគឺកាហ្វេ។ សម្រាប់អ្នកផឹកសមល្មមមិនជាបញ្ហាអ្វីទេ តែបើផឹកច្រើនអាចបង្កើនហានិភ័យដូចជា ឈឺក្បាលប្រកាំង ចង់ក្អួត ចង្វាក់បេះដូងលោតញាប់ ហើយអាចបន្ថែមបន្ទុកធ្វើឱ្យអ្នកកាន់តែគេងលែងលក់នៅពេលយប់។ 

២. ពិបាកផ្ចង់អារម្មណ៍ និងការចងចាំមិនល្អ៖ ការគេងបានរួមចំណែកខ្លាំងណាស់ដល់មុខងារខួរក្បាល ជាពិសេសការចងចាំ និងការផ្តោតអារម្មណ៍។ ការគេងមិនលក់អាចរំខានដល់ដំណើរការនៃការរក្សាទុកព័ត៌មាននៅក្នុងខួរក្បាល។ ចំពោះអ្នកដែលមានបញ្ហាក្នុងការគេង នឹងបាត់បង់អារម្មណ៍ក្នុងការធ្វើកិច្ចការផ្សេងៗ ការចងចាំរបស់ពួកគេនឹងចុះខ្សោយ ហើយមានការឆ្លើយតបយឺត។ បើបញ្ហានេះនៅតែបន្តពីមួយថ្ងៃទៅមួយថ្ងៃក្នុងរយៈពេលវែងវាអាចមានផលប៉ះពាល់ដល់ការអនុវត្តការងារ សមត្ថភាពរៀនសូត្រ និងការសម្រេចចិត្តលើការងារសំខាន់ៗជាច្រើនទៀត។ 

៣. ប្រព័ន្ធភាពស៊ាំចុះខ្សោយ៖ ការគេងត្រូវបានគេដឹងថាបានរួមចំណែកខ្លាំងជួយដល់ប្រព័ន្ធភាពសុំាក្នុងរាងកាយក្នុងការប្រយុទ្ធប្រឆាំងពីការឆ្លងមេរោគ និងរក្សារាងកាយឱ្យមានសុខភាពល្អ។ ការគេងមិនគ្រប់គ្រាន់លុបបំបាត់ការបង្កើតកោសិកាភាពស៊ាំ និងអង្គបដិប្រាណ។ នេះបង្ហាញថាអ្នកមានទម្លាប់គេងមិនលក់នឹងឈឺញឹកញាប់ជាងមុន ធ្វើឱ្យពួកគេមិនស្រួលខ្លួនជាប្រចាំ ហើយអស់កម្លាំងជារឿយៗ។ យូរៗទៅ ភាពស៊ាំចុះខ្សោយអាចធ្វើឱ្យងាយឆ្លងមេរោគ មានបញ្ហាសុខភាពរយៈពេលវែង។ 

៤. ការប្រែប្រួលអារម្មណ៍ និងបញ្ហាសុខភាពផ្លូវចិត្ត៖ ការគេងមិនគ្រប់គ្រាន់មិនត្រឹមតែជាបញ្ហាមួយទាក់ទងនឹងរាងកាយប៉ុណ្ណោះទេ ប៉ុន្តែវាក៏ប៉ះពាល់ដល់អារម្មណ៍ផងដែរ។ បើអ្នកគេងមិនលក់ជាប្រចាំអាចបណ្តាលឱ្យមានអារម្មណ៍ឆាប់ខឹង  ថប់បារម្ភ និងខ្វះការលើកទឹកចិត្ត។ យូរៗទៅ រំខានដល់ដំណេកជាទម្លាប់ អាចក្លាយជាកត្តាហានិភ័យនៃជំងឺបាក់ទឹកចិត្ត និងជំងឺទាក់ទងនឹងភាពតានតឹង៕

អត្ថបទដោយ៖ សារួ