ជាក់ស្ដែង បើសិនស្រ្តីមានផ្ទៃពោះគាត់មានបញ្ហាអរម៉ូនទីរ៉ូអ៊ីត តើគាត់អាចនឹងប្រឈមប៉ះពាល់សុខភាពអ្វីខ្លះទាំងម្ដាយ រួមទាំងកូននៅក្នុងផ្ទៃ? លោកវេជ្ជបណ្ឌិត ក៏បានបកស្រាយបញ្ជាក់ឱ្យដឹងថា តាមរយៈបទពិសោធន៍របស់គាត់​សម្រាប់ស្រ្តីដែលគាត់ចាប់ផ្ដើមពពោះ គាត់មានបញ្ហាខ្វះឬក៏លើសអរម៉ូនទីរ៉ូអ៊ីតគាត់មិនសូវចាប់អារម្មណ៌ប៉ុន្មាននោះទេ ហើយកាលពីមិនទាន់មានផ្ទៃពោះគាត់ធ្លាប់មានប្រវិត្តិ រលាក ឬក៏ខ្វះអរម៉ូននេះស្រាប់ ហើយបើគាត់មិនបានព្យាបាលឱ្យបានទាន់ពេលវេលានោះទេ គឺអាចនឹងធ្វើប៉ះពាល់ដល់កូនរបស់គាត់ គឺកើតមកងាយនឹងខ្សោយបញ្ញាមិនសូវឆ្លាត មួយទៀតអាចកើតមកមានបញ្ហាបេះដូងតាំងពីកំណើត។

ចំពោះផលប៉ះពាល់ដល់ម្ដាយវិញ គឺអាចនឹងធ្វើឱ្យគាត់ងាយមានបម្រុងក្រឡាភ្លើង និងងាចនឹងឡើងគីឡូខ្លាំង  ឬក៏អាចមានបញ្ហាបេះដូងដូចកូនផងដែរ។ មួយវិញទៀតសម្រាប់ម៉ាក់ៗដែលលើសអរម៉ូនទីរ៉ូអ៊ីតនៅអំឡុងពពោះវិញ គឺអាចប៉ះពាល់លើផ្នែកដូចជា ម្ដាយងាយនឹងមានបញ្ហារលូតកូនក្នុងផ្ទៃ សម្រាលមុនកំណត់ ឡើងសម្ពាធឈាម បម្រុងក្រឡាភ្លើង​ អាចនឹងវង្វេងស្មារតី ឬក៏ប្រកាច់ក៏មានដែរ។

សរុបមកគឺគ្រោះថ្នាក់ខ្លាំងមែនទែនដល់សុខភាពរបស់ម្ដាយ រួមនឹងកូនក្នុងផ្ទៃ។

អាស្រ័យហេតុនេះហើយ តើដើម្បីការពារបញ្ហានេះ យើងត្រូវធ្វើបែបណា ដើម្បីដឹងថាលើសអរម៉ូន ឬក៏ខ្វះ?

ដូច្នេះហើយលោកវេជ្ជបណ្ឌិត ភុំ ចាន់ថុន គាត់បានចែករំលែកសញ្ញាខ្លះៗដែលអាចបញ្ជាក់ថាអ្នកអាចមានបញ្ហាខ្វះអរម៉ូនអំឡុងពេលពពោះអាចនឹងមានចេញសញ្ញាខ្លះៗដូចជា​ស្រ្តីឡើងគីឡូខ្លាំង បាក់ទឹកចិត្ត សកម្មភាពរបស់គាត់យឺត ទល់លាមក។ បើសម្រាប់រោគសញ្ញាលើសអរម៉ូនទីរ៉ូអ៊ីតវិញគាត់អាចមានរោគសញ្ញាដូចជា បេះដូងលោតញាប់ ញ័រដៃ បត់ជើងធំញឹកញាប់ រាក ឆេវឆាវ ឆាប់ខឹង។​ក៏ប៉ុន្ដែស្រ្តីមួយចំនួនមិនមានរោគសញ្ញាចេញមកច្បាស់នោះទេ។

ដូច្នេះហើយដើម្បីដឹងថាយើងខ្វះអរម៉ូន ឬក៏លើស នឹងដើម្បីការពារទុកមុនស្ដ្រីគួរតែជួបពេទ្យដើម្បីពិនិត្យឈាម មើលឱ្យបានត្រឹមត្រូវ ថាអរម៉ូនរបស់យើងមិនមានបញ្ហាអ្វីទេចាំយកកូនតាមក្រោយទើបល្អសម្រាប់សុខភាពរបស់យើងម្ដាយផងនឹងកូនក្នុងផ្ទៃផង៕