ជាទូទៅតែ មានអត្ថប្រយោជន៍ខ្ពស់ក្នុងការជួយដល់ការបន្ធូរអារម្មណ៍តានតឹង បញ្ហាថប់អារម្មណ៍ សម្រួលដល់ការគេងបានស្ងប់ និងជួយដល់ចរន្តឈាមរត់ ពេលខ្លះពពួកតែរុក្ខជាតិមួយចំនួនក៏ត្រូវបានគេផលិតយ៉ាងយកចិត្តទុកដាក់ដើម្បីជួយសម្រួលដល់ការព្យាបាលជំងឺផងដែរ។

ថ្ងៃនេះយើងមកដឹងប្រភេទតែមួយចំនួនដែលជួយដល់សរីរាង្គកាយឱ្យដំណើរការល្អ ពិសេសបន្ធូរបន្ថយបញ្ហាស្រ្តេសដែលកំពុងមានជាប់ក្នុងចិត្តរបស់អ្នក ក៏ដូចជាសម្រាលភាពនឿយហត់របស់អ្នកកន្លងមកផងដែរ៖

-តែខ្មៅ មានលក្ខណៈសម្បត្តិប្រឆាំងអុកស៊ីតកម្ម ហើយការសិក្សាមួយរបស់សាកលវិទ្យាល័យ University College London បានបង្ហាញថា ការផឹកតែខ្មៅជួយកាត់បន្ថយកម្រិតស្ត្រេសបានយ៉ាងល្អ។រឿងដ៏គួរឱ្យភ្ញាក់ផ្អើលមួយគឺចិត្តវិទូរូបវិទ្យាលោកអាលប៊ឺត អាញស្ដាញ( Albert Einstein)ក៏ជាបុគ្គលមួយរូបចូលចិត្តតែខ្មៅនេះផងដែរ។

-តែផ្កាឡាវេនឌ័រ គឺជាតែដ៏ល្អមួយក្នុងការធ្វើឱ្យអារម្មណ៍ស្ងប់ ព្រោះថាសារធាតុចម្រាញ់ពីផ្កាឡាវេនឌ័រមានប្រយោជន៍សម្រាប់ការព្យាបាលនៃជំងឺថប់បារម្ភ និងជំងឺធ្លាក់ទឹកចិត្ត បញ្ហាថប់បារម្ភផងដែរ នេះបើយោងតាមការសិក្សាមួយដោយទស្សនាវដ្តី Natural Medicine ។

-តែផ្កាផាសិន កន្លងមកបងប្អូនប្រហែលជាធ្លាប់តែញុំាផ្លែផាសិនឬច្រោះយកទឹកមកញុំាជាភេសជ្ជៈ ប៉ុន្តែថ្ងៃនេះមកដឹងពីអត្ថប្រយោជន៍របស់ផ្ការបស់ផាសិនវិញម្ដង។តាមកាឱ្យដឹងពី គេហទំព័រសុខភាពHealthline បានបង្ហាញឱ្យដឹងថាប្រភេទតែផ្កាផាសិន ជំនួយខ្លាំងដល់ ការគេងលក់ស្រួល និងបញ្ហាថប់បារម្ភ និងជួយសម្រួលដល់បញ្ហាក្រពះពោះវៀនបានល្អទៀតផង។

-តែម៉ាឆា (Matcha) ជាប្រភេទម្សៅម្យ៉ាងដែលមានការនិយមទទួលទានផងដែរនៅប្រទេសជប៉ុន វាមានផ្ទុកសារធាតុ L-theanine ខ្ពស់។ L-theanine ជាប្រភេទអាមីណូអាស៊ីតម្យ៉ាងមានឥទ្ធិលពលដល់អរម៉ូននៃស្រ្តេស និងអរម៉ូនរីករាយ រួមទាំងការគេង បង្កើនប្រសិទ្ធភាពនៃការយល់ដឹង ការរក្សាទម្ងន់រាងកាយ សម្រួលសម្ពាធឈាមកុំឱ្យឡើងផងដែរ។សារធាតុដ៏ពិសេសមួយនេះក៏មាននៅក្នុងតែខ្មៅ តែបៃតងផងដែរ។នេះបើតាមការលើកឡើងពីMedical News Today។

គួររំលឹកដែរថាប្រសិនបើបងប្អូនមានជំងឺប្រចាំខ្លួនហើយត្រូវលេបថ្នាំជាប្រចាំសូមពិភាក្សាជាមួយគ្រូពេទ្យផ្ទាល់ខ្លួនបន្ថែមមុននឹងទទួលទាននូវភេសជ្ជៈឬអាហារផ្សេងៗ ដើម្បីសុវត្ថិភាពរាងកាយរបស់បងប្អូន។

"ពេលពិបាកចិត្តសូមញុំាតែសម្រួលអារម្មណ៍ កុំកាន់កែវស្រាដែលបង្កបញ្ហាធំដល់សុខភាពទៅថ្ងៃមុខ"

អត្ថបទដោយ៖ ភោគ ម៉ារី