១. របបអាហារគ្មានតុល្យភាព៖ ការញ៉ាំអាហារកែច្នៃ ឬម្ហូបដែលមានជាតិខ្លាញ់ អំបិល និងស្ករច្រើន អាចធ្វើឱ្យសរសៃឈាមឆាប់ខូច។ ជាតិខ្លាញ់ឆ្អែត ដែលភាគច្រើនមាននៅក្នុងអាហារចៀន សាច់អាំង បើអ្នកញុំាអាហារប្រភេទនេះច្រើនយូរទៅធ្វើឱ្យកើនជាតិខ្លាញ់នៅក្នុងឈាម និងបង្កើនបន្ទះកកលើជញ្ជាំងសរសៃឈាម ។ ប្រសិនបើមិនបានត្រួតពិនិត្យទេ សរសៃឈាមដែលអាចបត់បែនបានជាធម្មតានឹងក្លាយទៅជាតូចចង្អៀត និងរឹង ដែលបង្កើនហានិភ័យនៃជំងឺដាច់សរសៃឈាមខួរក្បាល។

២. អង្គុយយូរ៖ ការអង្គុយយូរច្រើនម៉ោងក្នុងមួយរថ្ងៃ អាចធ្វើឱ្យដំណើរការសំខាន់ៗក្នុងរាងកាយដូចជា ការំលាយអាហារ ការប្រើប្រាស់ថាមពល ការគ្រប់គ្រងជាតិស្ករ និងជាតិខ្លាញ់ ត្រូវបានកាត់បន្ថយ ដោយសាររាងកាយយើងគ្មានចលនា ហើយជាតិខ្លាញ់ក្នុងឈាមងាយនឹងកកកុញ។ លើសពីនេះ ការអង្គុយយូរអាចបង្កការធន់នឹងអាំងស៊ុយលីន ដែលមានន័យថា រាងកាយមិនអាចគ្រប់គ្រងកម្រិតជាតិស្ករក្នុងឈាមបានល្អ។ ការស្រាវជ្រាវជាច្រើនបានបញ្ជាក់ថា មនុស្សដែលអង្គុយលើសពី ៨ម៉ោងក្នុងមួយថ្ងៃ ហើយមិនបានធ្វើលំហាត់ប្រាណទៀងទាត់ មានហានិភ័យខ្លាំងកើតជំងឺស្ទះសរសៃឈាម។
 
៣. ភាពតានតឹងរ៉ាំរ៉ៃ៖ ភាពស្ត្រេសជាមូលហេតុចម្បងដែលមើលមិនឃើញ វាអាចរំខានដល់ប្រព័ន្ធសរសៃឈាម នៅពេលរាងកាយស្ថិតក្រោមភាពស្ត្រេសយូរ អ័រម៉ូនស្ត្រេសនឹងកើនឡើង បង្កឱ្យសម្ពាធឈាមកើន និងកម្រិតស្ករក្នុងឈាមឡើងខ្ពស់ហើយ អាស៊ីតខ្លាញ់សេរីក្នុងឈាមក៏កើនឡើងដែរ ជាហេតុធ្វើឱ្យងាយស្អិតជាប់ជញ្ជាំងសរសៃឈាម បង្កើតបន្ទះកក និងធ្វើឱ្យសរសៃឈាមរឹង។ អ្នកខ្លះចូលចិត្តផឹកគ្រឿងស្រវឹង និងបារីដើម្បីកាត់បន្ថយអារម្មណ៍តានតឹង តែទម្លាប់ទាំងនេះកាន់តែបំផ្លាញសរសៃឈាម មានហានិភ័យខ្លាំងដល់បេះដូង។ 

សរសៃឈាមគឺជាអង្គធាតុដ៏សំខាន់បំផុតមួយក្នុងរាងកាយ ដែលធានាឱ្យសរីរាង្គទាំងអស់ទទួលបានអុកស៊ីសែន និងសារធាតុចិញ្ចឹម។ ទម្លាប់មិនល្អមួយចំនួនដូចជា របបអាហារមិនល្អ ការអង្គុយយូរ និងភាពតានតឹង អាចបំផ្លាញសរសៃឈាមយ៉ាងស្ងៀមស្ងាត់ ហើយធ្វើឱ្យហានិភ័យនៃជំងឺបេះដូង និងដាច់សរសៃឈាមខួរក្បាល។ ទាំងអស់នេះសុទ្ធតែជាអ្វីដែលយើងអាចកែលម្អបានឱ្យតែមានការតាំងចិត្ត ដោយចាប់់ផ្ដើមពីការញុំាអាហារណាដែលល្អសម្រាប់សុខភាព ហាត់ប្រាណឱ្យបានច្រើន និងពិនិត្យសុខភាពឱ្យបានទៀងទាត់ ទាំងនេះអាចជួយរក្សាសរសៃឈាមឱ្យមានភាពបត់បែន សុខភាពល្អ និងបន្ថយហានិភ័យជំងឺធ្ងន់ធ្ងរ៕ 

អត្ថបទដោយ៖ សារួ