មនុស្សសព្វថ្ងៃនេះ មានការងារច្រើនជាហេតុនាំឱ្យរវល់ពេក នាំឱ្យកើនស្រ្តេស អារម្មណ៍តានតឹង និងរងសម្ពាធផ្លូវចិត្ត។ ជាពិសេសកត្តាបញ្ហាស្រ្តេសជាប្រចាំថ្ងៃ ធ្វើឱ្យរាងកាយអ្នកកើតជំងឺអត់ដឹងខ្លួនទេ។ បើយោងតាមគេហទំព័រ mayoclinic បានលើកឡើងថា ស្រ្តេសនិងតានតឹងច្រើន ងាយកើតជំងឺទាំង ៣នេះណាស់៖
១. កើនសម្ពាធឈាម៖ អ្នកធ្លាប់ដឹងទេថា បញ្ហាស្ត្រេសភាពតានតឹងនេះ បើវាចេះតែកើនឡើងនៅក្នុងអារម្មណ៍ខ្លាំងទៅៗ ពីមួយថ្ងៃទៅមួយថ្ងៃ នាំឱ្យសម្ពាធឈាមរបស់អ្នកកើនឡើងខ្ពស់។ នៅពេលអ្នកស្ត្រេសនោះ រាងកាយនឹងបង្កើនការផលិតអ័រម៉ូនមួយចំនួនដែលជះឥទ្ធិពលលើកម្រិតនៃសម្ពាធឈាមនាំឱ្យដំណើរការខុសប្រក្រតីដែលបង្កទៅជាបញ្ហាដល់ចង្វាក់បេះដូងលោតញាប់ ហើយសម្ពាធសរសៃឈាមរួមតូច ហើយបើអ្នកមានអារម្មណ៍ខឹងខ្លាំងទៀត អ្នកងាយដាច់សរសៃឈាម ហើយពិកាផ្នែករាងកាយផងដែរ។
២. ជំងឺធ្លាក់ទឹកចិត្ត និងការថប់បារម្ភ៖ វាមិនមែនជារឿងអ្វីដែលថ្មីនោះទេ ពីព្រោះថាកត្តាស្ត្រេសតានតឹងរុំារ៉ៃ ត្រូវបានគេលើកឡើងជាច្រើនរួចមកហើយថា មានអត្រាខ្ពស់នៃការកើតជំងឺធ្លាក់ទឹកចិត្ត និងការថប់បារម្ភ។ ការស្ទង់មតិមួយនៃការសិក្សាថ្មីៗបានរកឃើញថា មនុស្សដែលមានភាពតានតឹងខ្ពស់ទាក់ទងនឹងការងារ និងជីវិតរស់នៅប្រចាំថ្ងៃ អាចមានហានិភ័យខ្ពស់នៃការវិវត្តទៅជាជំងឺធ្លាក់ទឹកចិត្ត 80% ក្នុងរយៈពេល2-3ឆ្នាំបន្ទាប់ បើធៀបទៅនឹងមនុស្សដែលមានភាពតានតឹងទាប។
៣. ជំងឺបេះដូងបង្កឡើងដោយសារស្ត្រេស៖ ពេលអ្នកខំធ្វើការលើសពីសមត្ថភាពទៅការប្រកួតប្រជែង និងតម្រូវការកាន់តែខ្ពស់ ឬចង់បានលទ្ធផលលឿននោះ វាធ្វើឱ្យបុគ្គលម្នាក់ៗ កាន់តែគិតច្រើន កាន់តែខំប្រឹងឡើង។ ពេលអ្នកគ្មានពេលសម្រាកឱ្យខ្លួនឯង កើតបញ្ហាស្រ្តេសស្ទើររាល់ថ្ងៃបែបនេះ វាជះឥទ្ធិពលអាក្រក់លើប្រព័ន្ធសរសៃឈាមបេះដូង។ តាមការស្រាវជ្រាវក្នុងប្រទេសហ្វាំងឡង់ បានបញ្ជាក់ដែរថា ចំនួនអត្រាអ្នកស្លាប់ដោយសារជំងឺបេះដូងមានការកើនឡើងដល់ទៅ ២ដង ចំពោះអ្នកធ្វើការក្រោមសម្ពាធខ្លាំងលើសពីសមត្ថភាពខ្លួនពេក បើប្រៀបធៀបទៅនឹងអ្នកធ្វើការធម្មតា។ អត្រាការកើនកាន់តែខ្ពស់រហូតដល់ ២,៤ដង ចំពោះអ្នកមានតួនាទីកាន់តែធំ ឬប្រាក់ខែកាន់តែច្រើន ដើម្បីខំធ្វើការឱ្យតាមគោលដៅរបស់ក្រុមហ៊ុន៕ អត្ថបទដោយ៖ ទ្រ សុភាព