នេះជាសំណួរមួយចង់សួរដល់អ្នកកំពុងអត្ថបទនេះ និងពលរដ្ឋខ្មែរដែលចូលចិត្តចំណាយផឹកស្រាច្រើនសឹងរាល់ថ្ងៃ ខណៈស្រាវាមិនបានផ្តល់ផលចំណេញអ្វីសោះ មានតែបំផ្លាញ់លុយ និងសុខភាពយើង ហេតុអ្វី យើងនៅសប្បាយរីករាយជាមួយស្រាតទៅទៀត។
បច្ចុប្បន្ននេះ មានពលរដ្ឋខ្មែរយើងតិចណាស់ដែលខ្វល់ខ្វាយទៅពិនិត្យសុខភាពឱ្យបានទៀងទាត់ ដើម្បីការពារខ្លួនកុំឱ្យកើតជំងឺផ្សេងៗ។ ផ្ទុយមកវិញមានពលរដ្ឋខ្មែរច្រើនណាស់ ចូលចិត្តចំណាយលុយខ្ជះខ្ជាយធ្វើរឿងរ៉ាវនានា ដែលនាំឱ្យប៉ះពាល់សុខភាពធ្ងន់ធ្ងរ ខណៈដែលសុខភាពជារឿងចម្បង និងសំខាន់ជាងរឿងណាៗទាំងអស់។
យើងហ៊ានចំណាយលុយទិញរបស់ប្រើប្រាស់ទំនើបៗ តម្លៃថ្លៃៗ ចុះហេតុអ្វីសុខភាពខ្លួនឯងយើងមិនហ៊ានចំណាយខ្លះ ដើម្បីការពារខ្លួនឱ្យចៀសផុតពីជំងឺផ្សេងៗផង ឬយើងមិនស្រលាញ់ខ្លួនតែបែរជាស្រលាញ់របស់ខាងក្រៅខ្លួនជាង។
ត្រង់ចំណុចនេះ លោកសោម សម្បត្តិ ជាសហគ្រិនចាស់វស្សាមួយរូបរបស់កម្ពុជាធ្លាប់បានលើកឡើងថា សុខភាពគឺសំខាន់ជាងអ្វីៗទាំងអស់ បើសុខភាពមិនល្អ មិនអំណោយផលហើយ ជីវិតគ្មានន័យនោះទេ។
លោកបានយកចិត្តទុកដាក់ខ្លាំងបំផុតចំពោះសុខភាព រហូតបង្កើតពាក្យស្លោកប្រចាំគ្រួសារថា «សម្រស់ជាលាភ សុខភាពជាទ្រព្យ បញ្ញាជាទ័ព សីលជាអាវុធ»។ ត្រូវថែរក្សាសុខភាពឱ្យបានល្អ កុំធ្វេសប្រហែសឱ្យសោះ។
បើមិនថែរក្សាសុខភាពឱ្យល្អទេ កុំសង្ឃឹមថា នឹងធ្វើអ្វីៗបានទៀត ឬយើងអាចនិយាយបានថាសុខភាពគឺជាលេខ១ ហើយអ្វីគ្រាន់តែជាលេខសូន្យបន្ថែមក្រោយលេខ១តែប៉ុណ្ណោះ ពេលដែលដកលេខ១ចេញ លេខ០ គឺគ្មានន័យទាំងអស់។
ដូច្នេះយើងត្រូវរក្សាសុខភាពឱ្យបានល្អ បើចង់ក្លាយជាអ្នកដឹកនាំ ព្រោះបើសុខភាពមានបញ្ហាហើយ ឧស្សាហ៍ឈឺច្រើនហើយ គឺចប់ហើយមិនអាចធ្វើអ្វីបាននោះទេ។ ដើម្បីជោគជ័យកិច្ចការទាំងអស់ ដំបូងដៃត្រូវជោគជ័យលើសុខភាពសិន ឬមានសុខភាពរឹងមាំល្អ៕
អត្ថបទដោយ៖ម៉ន វុទ្ធា