អ្នកគ្រប់គ្នាត្រូវដឹងថា ការដកដង្ហើម គឺជាសកម្មភាពនៃការស្រូបដង្ហើមចូលសួតតាមរយៈ ច្រមុះ និងមាត់ បន្ទាប់មកសួតនឹងធ្វើដំណើរការនៅក្នុងថង់ខ្យល់ដែលមានរាងប៉ោងដែលហៅថា Alveoli។ រួចអុកស៊ីហ្សែននឹងផ្លាស់ទីទៅក្នុងឈាម ដើម្បីបញ្ជូនទៅតាមសរីរាង្គក្នុងខ្លួនរបស់មនុស្ស។

មនុស្សជាច្រើនជួបប្រទះនឹងការពិបាកដកដង្ហើម ឬដកដង្ហើមខ្លី ដែលអាចជាសញ្ញានៃការកើតជំងឺផ្លូវដង្ហើម ឬក៏ការឆ្លងមេរោគ។ នៅក្នុងនោះដែរ ជំងឺផ្លូវដង្ហើមរួមមាន ជំងឺផ្ដាសាយ ជំងឺហឺត ជំងឺសួត ជំងឺធាត់ ជំងឺខ្សោយបេះដូង ដែលបណ្ដាលឱ្យអ្នកមានអាការដកដង្ហើមខ្លីៗ ឬពិបាកក្នុងការដង្ហើម។ នេះបើយោងតាម vnexpress ។

១.ជំងឺហឺត

ជំងឺហឺត គឺជាជំងឺមួយដែលកើតឡើងដោយសារតែការស្ទះផ្លូវដង្ហើម ឬពិបាកក្នុងការដកដង្ហើមចេញពីសួត។ អាការនៃជំងឺហឺតរួមមាន កណ្ដាស់ ក្អក ដកដង្ហើមខ្លីៗ និងមានអារម្មណ៍តឹងៗទ្រូងជាដើម។

២.ជំងឺផ្ដាសាយ និងការឆ្លងមេរោគSinus

ជំងឺផ្ដាសាយ និងការឆ្លងមេរោគអាចបណ្ដាលឱ្យអ្នកពិបាកដកដង្ហើម ប៉ុន្តែអាចធូរស្បើយទៅវិញក្រោយពេលញុំាថ្នាំ។ មិនតែប៉ុណ្ណោះទេ មេរោគ និងបាក់តេរីអាចរស់នៅក្នុងច្រមុះ ដែលបណ្ដាលឱ្យអ្នកពិបាកក្នុងការដកដង្ហើម និងស្រូបយកខ្យល់អុកស៊ីសែន។ រោគសញ្ញានៃជំងឺផ្ដាសាយរួមមាន ហៀរសំបោរ កណ្ដាស់ ក្អក ឈឺក ឈឺក្បាល ឈឺខ្លួនប្រាណ គ្រុនក្ដៅ។ រីឯរោគសញ្ញានៃការឆ្លងមេរោគSinusរួមមាន ទឹករំអិលពណ៌បៃតងក្នុងច្រមុះ ឈឺក្បាល ក្អក ក្ដៅខ្លួន អស់កម្លាំង ឬមិនស្រួលក្នុងការដកដង្ហើម។

៣.ឆ្លងមេរោគផ្លូវដង្ហើម

ជំងឺរលាកសួត ជំងឺរលាកទងសួត ជំងឺរបេង គឺជាការឆ្លងមេរោគសួតដែលបណ្ដាលមកពីបាក់តេរី និងវីរុស។ រោគសញ្ញានៃការឆ្លងមេរោគផ្លូវដង្ហើមរួមមាន ក្អក ក្ដៅខ្លួន អស់កម្លាំង ឈឺក្បាល ឆាប់ខឹង និងតឹងទ្រូង។

៤.ឡើងខ្លាញ់ច្រើន

ការឡើងទម្ងន់អាចធ្វើឱ្យសួតមានសម្ពាធ ធ្វើឱ្យសួតពិបាកក្នុងការដកដង្ហើម។ ប្រសិនបើអ្នកធាត់ អ្នកនឹងមានបញ្ហាក្នុងការដកដង្ហើម ជាពិសេសអំឡុងពេលអ្នកហាត់ប្រាណហត់ខ្លាំង។ មិនតែប៉ុណ្ណោះទេ អ្នកធាត់ក៏អាចជួបនឹងបញ្ហាសុខភាពផ្សេងៗទៀតដូចជា ជំងឺបេះដូង ជំងឺទឹកនោមផ្អែម និងពិបាកក្នុងការដកដង្ហើមអំឡុងពេលគេង។

៥.ជំងឺសួតរ៉ាំរ៉ៃ

ជំងឺសួតរ៉ាំរ៉ៃ គឺជាក្រុមនៃជំងឺរលាកទងសួតរ៉ាំរ៉ៃ និងជំងឺស្ទះសួត ដែលបណ្ដាលឱ្យអ្នកជំងឺពិបាកក្នុងការដកដង្ហើម។ ជំងឺនេះភាគច្រើនកើតឡើងដោយ ការជក់បារី។ រោគសញ្ញានៃជំងឺសួតរ៉ាំរ៉ៃរួមមាន ក្អករ៉ាំរ៉ៃ ដកដង្ហើមខ្លី អស់កម្លាំង និងមានទឹករំអិលក្នុងបំពងក។

៦.ជំងឺខ្សោយបេះដូង

ជំងឺខ្សោយបេះដូងក៏ធ្វើឱ្យអ្នកជំងឺពិបាកក្នុងការដកដង្ហើម ហើយជំងឺនេះមានរោគសញ្ញរួមមាន ឈឺទ្រូង ញ័របេះដូង ក្អក វិលមុខ ហើមកជើង ឡើងទម្ងន់លឿន។

៧.ជំងឺមហារីកសួត

ការដកដង្ហើមខ្លី អាចជារោគសញ្ញានៃជំងឺមហារីកសួត ហើយជំងឺនេះមានរោគសញ្ញារួមមាន ក្អក តឹងទ្រូង ឈឺទ្រូង និងក្អកមានឈាមជាដើម។

ប្រសិនបើអ្នកមានអាការពិបាកក្នុងការដកដង្ហើម ដើម្បីកំណត់អត្ថសញ្ញាណនៃជំងឺនីមួយៗ អ្នកត្រូវតែទៅពិនិត្យសុខភាពជាមួយវេជ្ជបណ្ឌិតជំនាញ។ ពីព្រោះថា បញ្ហាពិបាកដកដង្ហើម ឬដកដង្ហើមខ្លីជារោគសញ្ញាមួយមិនស្រួលនោះទេ ដូច្នេះត្រូវពិគ្រោះជាមួយពេទ្យជាបន្ទាន់។