មហារីកជាជំងឺកាចសាហាវមួយដែល​​បានសម្លាប់មនុស្សជាច្រើននាក់ ក្នុងរយៈពេលដ៏ខ្លី ហើយជំងឺមហារីក​​មានច្រើនប្រភេទ និង​កត្តាបង្កមាន​​ច្រើនទៅតាម​ប្រភេទនៃជំងឺមហារីក។

យោងតាមមន្ទីរពេទ្យកាល់ម៉ែតកម្ពុជាបានឱ្យដឹងថា Nasopharyngeal Cancer ជាជំងឺមហារីកដែលកើតឡើងនៅផ្នែកខាងក្រោយច្រមុះ និងខាងលើបំពងក ដែលពាក្យបច្ចេកទេសឲ្យតំបន់នេះថា “Nasopharynx”។

ចំណែករោគសញ្ញាវិញ នៅដំណាក់កាលដំបូង ជំងឺមហារីកច្រមុះ ពុំស្ដែងនូវសញ្ញាអ្វីដែលគួរឲ្យកត់សំគាល់ទេ។ រោគសញ្ញាមួយចំនួនដែលតម្រូវឲ្យអ្នកជំងឺមកពិគ្រោះជាមួយគ្រូពេទ្យជំនាញ មានដូចជា៖- មានឡើងកូនកណ្តុលនៅក, ឈាមច្រមុះ, តឹងច្រមុះភាគច្រើនមួយចំហៀង, សណ្តាប់មានការធ្លាក់ចុះនៅត្រចៀកម្ខាង, ហឹងត្រចៀក និង ឈឺក្បាល។

សម្រាប់មូលហេតុបង្កឲ្យកើតជំងឺមហារីកច្រមុះ នៅមិនទាន់ដឹងពិតប្រាកដ ប៉ុន្តែមានកត្តាមួយចំនួនដែលជំរុញឲ្យកើតមានជំងឺនេះ ៖ ទីតាំងភូមិសាស្រ្ត ដូចជាប្រទេសចិនភាគខាងត្បូង ឬអាស៊ីខាងកើត។ ការបរិភោគអាហារដែលសម្បូរជាតិ Nitrosamine : អាហារដែលមានកម្រិតអំបិលខ្ពស់ ប្រលាក់ហាលឲ្យស្ងួតរួចអាំង (សាច់ ឬត្រី), អ្នកប្រកបរបរដែលទាក់ទងជាមួយឈើ-ជាងឈើ វីរុសEpstein-Barr Virus និង ប្រវត្តិក្រុមគ្រួសារដែលកើតជំងឺនេះ(Nasopharyngeal Cancer)។

ចំណែកការព្យាបាលវិញ ត្រូវព្យាបាលដោយកាំរស្មី តាមវិធីសាស្ត្រទំនើប (Modern Radiotherapy),ការចាក់ថ្នាំគីមី(Chemotherapy) និង ការវះកាត់ក្នុងករណីខ្លះ។

សូមបញ្ជាក់ថា បើបងប្អូនមានអាការៈខាងលើ ហើយសង្ស័យថាខ្លួនឯងមានជំងឺមហារីកច្រមុះ ត្រូវប្រញ៉ាប់ទៅមន្ទីរពេទ្យជំនាញជាបន្ទាន់ ដើម្បីពិនិត្យធ្វើរោគវិនិច្ឆ័យ និងការព្យាបាលឱ្យទាន់ពេលវេលា៕

អត្ថបទដោយ៖ម៉ន វុទ្ធា