ហើយលោកគ្រូបានអូសតម្រុយឱ្យយើងគិតថា នៅក្នុងទំនាក់ទំនងអ្នកនិងដៃគូជាប្តីនិងប្រពន្ធ។ ឯទំនាក់ទំនងអ្នកទាំង២ជាមួយកូន ក្នុងនាមជាឪពុកម្តាយ។ ពេលមានបញ្ហាប្តីប្រពន្ធ គឺបង្កឡើងដោយអ្នកទាំង២ បែបនេះអ្នកទាំង២ត្រូវដោះស្រាយជាប្តីប្រពន្ធ។ ហើយកុំយកកូនមកធ្វើជាចំណាប់ខ្មាំងនៃជម្លោះប្តីប្រពន្ធអ្នកឲ្យសោះ ទើបមានន័យថា អ្នកទាំង២ជួយការពារបញ្ហាផ្លូវចិត្តរបស់កូន។ នៅពេលអ្នកអូសកូនមកឡូកឡំ ផលប៉ះពាល់លើផ្លូវចិត្តកូនកាន់តែខ្លាំង ហើយមានលក្ខណៈរ៉ាំរ៉ៃនិងយូរអង្វែង។

បើអ្នកជាកូន អ្នកត្រូវដកខ្លួនចេញឲ្យផុតពីជម្លោះប្តីប្រពន្ឌរបស់ម៉ែឪ បើអ្នកចូលពាក់ព័ន្ធ គឺជាទ្វេគ្រោះមិនខាន ពីព្រោះអ្នកទៅខាងណាក៏ខុសដែរ ហើយទីបំផុតបានត្រឹមខកចិត្ត ឈឺចាប់ និងវិប្បដិសារីប៉ុណ្ណោះ។ ពេលអ្នកងាកទៅខាងម្តាយ ប្រាកដជាខុសខាងឪពុក ពេលអ្នកងាកទៅខាងឪពុក ប្រាកដជាខុសខាងម្តាយ បែបនេះ អ្នកត្រូវប្រកាន់ខ្ជាប់ឧបេក្ខា មានន័យថា មិនលំអៀងទៅខាងណាឡើយ។ ម្យ៉ាងទៀត សូមឲ្យច្បាស់ពីតួនាទីរបស់ខ្លួន មានន័យថា យើងជាកូនត្រូវទំនាក់ទំនងជាមួយពួកគាត់ គឺម៉ែនិងឪ។ ឯជម្លោះពួកគាត់ គឺប្តីនិងប្រពន្ធ។

សូមចងចាំ រាល់ជម្លោះដែលកើតមាន គឺព្រោះតែប្រើខួរក្បាលជាធំ ហើយក្លាយជាមនុស្សខួរក្បាល។ មនុស្សខួរក្បាលជាមនុស្សក្របេះដូង។ហើយលោកគ្រូបានបន្ថែមថា យើងជ្រើសរើសមនុស្សម្នាក់មួយធ្វើជាដៃគូជីវិត គឺយើងចង់ឃើញម្នាក់នឹងសុខចម្រើន។ តែបើគេរស់នៅជាមួយយើង ហើយគេមិនសុខចម្រើនទេ មានន័យថា យើងមិនអាចឆ្លើយតបនឹងតម្រូវការគេបានឡើយ។ បែបនេះសូមឆាប់ដឹងខ្លួន ហើយដោះលែងគេឲ្យមានសេរីភាពទៅ បែបនោះទើបអ្នកមិនបំផ្លាញបេះដូងខ្លួនឯង។

បើអ្នកតាមឃ្វាលមនុស្ស អ្នកនឹងហត់នឿយមួយជីវិត ហើយអ្នកនឹងក្លាយជាមនុស្សខួរក្បាលមិនខាន ហើយជីវិតអ្នកក៏មិនមានក្តីសុខដែរ។ ក្នុងទំនាក់ទំនងជាដៃគូ ឬប្តីប្រពន្ធ បើខួរក្បាលដឹកមុខរៀងៗខ្លួនហើយ ទំនាក់ទំនងនោះ មិនអាចរីកចម្រើនឡើយ។ បេះដូងដើរតួនាទីធំធេងក្នុងគ្រប់នៃទំនាក់ទំនង។លោកអ្នកអាចទាក់ទងជាមួយលោកគ្រូស៊ាង លាប បន្ថែមតាម Facebooks៖ ស៊ាង លាប អ្នកជំនាញចិត្តសាស្រ្ត និងលេខទូរស័ព្ទ៖ 087 573 233
អត្ថបទដោយ៖ ទ្រ សុភាព