បច្ចុប្បន្នមានប្រជាជនកម្ពុជាជាច្រើនមានបញ្ហាសុខភាព ក្នុងនោះជម្ងឺមហារីកស្បែកក៏ជាប្រភេទជម្ងឺមួយគួរឲ្យព្រួយបារម្ភផងដែរ ។ ថ្ងៃនេះ Healthy Cambodia នឹងនាំលោកអ្នកមកដឹងពីជម្ងឺមហារីកស្បែកដោយដកស្រង់ចេញពីគេហទំព័រ www.familydoctor.com ។

ជម្ងឺមហារីកស្បែក ភាគច្រើនត្រូវបានបង្កឡើងដោយកាំរស្មី ultraviolet ដែលគេសង្កេតឃើញមាននៅក្នុងពន្លឺព្រះអាទិត្យ និងពន្លឺភ្លើងជាដើម ។ ភាគច្រើនគេសង្កេតឃើញ មានទម្រង់ពីរប្រភេទនៃជម្ងឺមហារីកស្បែកនេះ គឺ Basal cell carcinoma និង squamous cell carcinoma ។ វាមានការវិវដ្ដយឺត ហើយប្រសិនបើកំណត់រោគវិនិច្ឆ័យបានលឿន ការព្យាបាលមានភាពងាយស្រួល និងមិនរីករាលដាលទៀតផង ។

ចំណែកជម្ងឺមហារីកស្បែកប្រភេទ Melanoma ជាប្រភេទជម្ងឺកម្រ ប៉ុន្តែប្រសិនបើមិនបានធ្វើរោគវិនិច្ឆ័យបានទាន់ពេលវេលាទេ វាអាចរាលដាលពេញរាងកាយ ហើយអាចបង្កឲ្យស្លាប់បានទៀតផង ។

រោគសញ្ញានៃជម្ងឺមហារីកស្បែក ៖ ផ្លាស់ប្ដូរស្បែក ដុះសាច់លើស្បែក មានស្នាមពក ដុះប្រជ្រុយ ស្បែកឡើងគគ្រើម និងមើលទៅស្បែកមានលក្ខណៈមិនដូចគ្នា ។

មូលហេតុនៃជម្ងឺមហារីកស្បែក​៖ បង្កឡើងដោយពន្លឺ ultraviolet ។ ពន្លឺនេះមានពីរប្រភេទ គឺ UVA rays (វាជ្រាបចូលជ្រៅដល់ស្រទាប់ស្បែក និងបំផ្លាញស្រទាប់មូលដ្ឋាននៃស្បែក ) ចំណែក UVB rays ធ្វើឲ្យខូចស្រទាប់លើនៃស្បែក និងធ្វើស្បែករលាកទៀតផង ។

​របៀបការពារស្បែកពីជម្ងឺមហារីកស្បែក៖ ជៀសវាងកុំឲ្យត្រូវពន្លឺព្រះអាទិត្យ និងពន្លឺភ្លើងញឹកញាប់ និងរយៈពេលយូរ ។ ប្រើប្រាស់ ឡេការពារពន្លឺព្រះអាទិត្យ (SPF) ប៉ុន្តែត្រូវចាំថា ឡេការពារពន្លឺព្រះអាទិត្យមិនអាចការពារស្បែកអ្នក១០០%នោះទេ ។ ក្រៅពីនេះ លោកអ្នកអាចពាក់ខោអាវ និងពាក់វ៉ែនតា(ការពារ UVA និង UVB) បន្ថែមបាន ។

ការព្យាបាលជម្ងឺមហារីកស្បែក៖ អាស្រ័យលើប្រភេទជម្ងឺមហារីកស្បែក ទីកន្លែងដែលវាបានកើត ទំហំរបស់វា ការរីករាលដាល និងសុខភាពទូទៅរបស់អ្នកជម្ងឺ ។

ត្រូវចាំថា ពេលមេឃស្រទន់ និងទឹកមិនអាចការពារពន្លឺព្រះអាទិត្យមិនឲ្យប៉ះស្បែកបាននោះទេ ។ ពន្លឺប្រភេទ UV rays អាចចាំងចូលក្នុងទឹកបានជម្រៅរហូតដល់ជាងមួយម៉ែត និងអាចឆ្លងកាត់ដុំពពកបានរហូតដល់ ៦០%ទៅ ៨០% (ពេលមេឃស្រទន់ )៕

អត្ថបទដោយ៖ ហួ ភារ៉ា