ស្ត្រីអំឡុងពេលមានផ្ទៃពោះ រមែងត្រូវបានក្រុមគ្រូពេទ្យជំនាញណែនាំឱ្យទទួលទាននៅប្រភេទក្រុមបន្លែផ្លែឈើ ស៊ុត និងប្រភេទអាហារដែលសម្បូរទៅសារជាតិប្រូតេអ៊ីន ដើម្បីបំប៉នទៅដល់សុខភាពផ្ទាល់ខ្លួន និងទារកក្នុងផ្ទៃ។
ដោយឡែក ក្នុងចំណោមក្រុមអាហារដែលសម្បូរសារជាតិចិញ្ចឹមទាំងនោះ ក៏មានប្រភេទអាហារមួយចំនួនដែលត្រូវបានគេសិក្សាឃើញថា អាចប៉ះពាល់ដល់ទារកក្នុងផងដែរ។ តួយ៉ាង ផ្អែកប្រភព apollocradle បានលើកបង្ហាញនូវក្រុមផ្លែឈើចំនួន៣ប្រភេទ ដែលស្ត្រីមានផ្ទៃពោះ គួរប្រុងប្រយ័ត្ននៅពេលទទួលទាន ព្រោះអាចបណ្តាលឱ្យមានការហូរឈាមតាមទ្វារមាស ហើយក្នុងករណីអាក្រក់បំផុតគឺរលូតកូន៖
១. ផ្លែល្ហុង៖ ប្រភេទផ្លែល្ហុងខ្ចី ឬល្ហុងមិនទាន់ទុំ មានផ្ទុកជាតិជ័រ អាចបណ្តាលឱ្យមានការកន្ត្រាក់ស្បូនមិនគ្រប់ខែ អាចបង្កគ្រោះថ្នាក់ដល់កូនក្នុងផ្ទៃ។ ដោយឡែក ចំពោះផ្លែល្ហុងទុំសម្បូរទៅដោយវីតាមីន និងជាតិដែក ដែលអ្នកមានផ្ទៃពោះអាចទទួលបានក្នុងបរិមាណសមស្របមួយ។
២. ម្នាស់៖ អង់ស៊ីមមួយចំនួនមាននៅក្នុងផ្លែម្នាស់ អាចផ្លាស់ប្តូរលក្ខណៈមាត់ស្បូន ធ្វើឱ្យមានការកន្ត្រាក់មុនអាយុកាល និងអាចបណ្តាលឱ្យរលូតកូន។ ក្រៅពីឥទ្ធិពលបែបនេះ វាក៏ជាអាចបង្កឱ្យរាគ និងធ្វើឱ្យមានអារម្មណ៍មិនស្រួលក្នុងពេលមានផ្ទៃពោះ។
៣. ទំពាំងបាយជូ៖ សម្រាប់ស្ត្រីមានផ្ទៃពោះ ទំពាំងបាយជូមិនត្រូវបានណែនាំឱ្យទទួលទានក្នុងអំឡុងត្រីមាសចុងក្រោយនោះទេ។ ដោយហេតុថា សារជាតិនៅក្នុងផ្លែទំពាំងបាយជូ អាចបង្កើតកម្តៅក្នុងខ្លួនដែលមិនល្អសម្រាប់ទាំងម្តាយ និងកូន រួចទាំងអាចជះផលវិបាកផ្សេងៗទៀត។
យ៉ាងណាមិញ អំឡុងពេលមានផ្ទៃពោះស្ត្រីគ្រប់រូបគួរតែព្យាយាមញុំានូវក្រុមផ្លែឈើខាងក្រោមនេះ៖
១. ឪឡឹក សម្បូរទៅដោយជាតិទឹក ជួយរក្សាតុល្យភាពអេឡិចត្រូលីតក្នុងខ្លួន។
២. ចេក សម្បូរទៅដោយកាបូអ៊ីដ្រាត ការពារភាពស្លេកស្លាំង និងជួយថែរក្សាសុខភាពពោះវៀនធំ។
៣. ផ្លែក្រូច ធ្វើឱ្យជួយរក្សាជាតិទឹកក្នុងខ្លួន និងសម្បូរទៅដោយវីតាមីន C។
៤. ផ្លែបឺរ សម្បូរទៅដោយខ្លាញ់ដែលមានសុខភាពល្អ និងមានសារធាតុ folate ដែលជួយជំរុញ ការលូតលាស់សុខភាពខួរក្បាលទារកក្នុងផ្ទៃ និងសម្បូរវីតាមីន K វីតាមីន B ជាតិសរសៃ ម៉ាញ៉េស្យូម និងប៉ូតាស្យូមជំនួយដល់ការលូតលាស់របស់ទារកផងដែរ។
៥. ផ្លែប៉ោម សម្បូរទៅដោយជាតិសរសៃ វីតាមីន និងប៉ូតាស្យូម ជួយបានទាំងសុខភាពម្តាយ និងទារក។
គូសបញ្ជាក់ឱ្យដឹងបន្ថែមទៀតថា សម្រាប់ស្ត្រីមានផ្ទៃដាច់ខាតត្រូវចៀសវាងនូវប្រភេទសាច់ឆៅគ្រប់ប្រភេទ គ្រឿងស្រវឹង សារជាតិកាហ្វេអ៊ីន និងផ្សែងបារី ពីព្រោះថា ក្រុមអាហារទាំងអស់នេះ គឺអាចប៉ះពាល់ដល់ទារកក្នុងផ្ទៃ និងសុខភាពម្តាយខ្លាំង៕
អត្ថបទដោយ៖ ប៉ាវ ភក្តី