ដើម្បីអាចឱ្យខ្លួនអ្នកគេចផុតពីការស្តាយក្រោយ កាត់បន្ថយភាពឈឺចាប់ពីអតីតភាព អ្នកគួរចាប់ផ្តើមបង្កើតទម្លាប់សួរឱ្យត្រូវ រៀនឱ្យត្រូវ ប្រឹងប្រែងឱ្យត្រូវ អ្នកនឹងអាចដើរនៅលើផ្លូវត្រូវជាផ្លូវដែលនាំឱ្យអ្នកអាចដើរលឿនជាងមុន ឆ្លាតជាងមុន ហើយដើរដោយមិនខ្លាចខ្មោចថែមទៀត។ លើលោកនេះ គ្មានរឿងអ្វីដែលសមស្របតាមការគិត និងការចង់បានរបស់យើងគ្រប់ពេលនោះទេ ដូចនេះត្រូវរៀនធ្វើចិត្ត និងទទួលស្គាល់ការពិតខ្លះទៅ ទើបមិនសូវពិបាកចិត្ត ហើយក៏មិនសូវឈឺចាប់ ពិសេសព្យាយាមកុំបង្កើតកំហុសឱ្យខ្លួនឯងច្រើនពេក។

អ្វីដែលអ្នកត្រូវរៀនហាត់ពត់លុតដំចិត្តខ្លួនឯងនោះគឺនៅពេល អ្នកមានអារម្មណ៍មិនល្អ អ្នកអាចនឹងបាត់បង់ម្ចាស់ការ ហើយចាប់ផ្តើមដែលអាចធ្វើឱ្យអ្នកស្ដាយហើយចាប់និងច្រើនដូចគ្នាដែរ។ គ្រប់ពេលអ្នកកំពុងតែពិបាកចិត្ត កំពុងតែខឹង កំពុងតែបាក់ទឹកចិត្ត កុំព្យាយាមសម្រេចចិត្តបញ្ចេញសកម្មភាពច្រើនពេក ព្រោះសកម្មភាព ឬពាក្យសម្តីដែលបញ្ចេញទៅហើយ ប្រៀបដូចជាកែដែលប្រេះបែកហើយ ពិបាកនឹងឱ្យដូចដើមវិញណាស់។

ធាតុពិតជីវិតរស់នៅមិនលំបាកទេ យើងទេដែលធ្វើឱ្យខ្លួនឯងលំបាក ហើយធ្វើឱ្យជីវិតកាន់តែស្មុគស្មាញ កាន់តែស៊ាំញ៉ាំ កាន់តែវេទនាទាំងផ្លូវកាយ និងផ្លូវចិត្ត។ នៅសុខៗចូលចិត្តបង្កើតបញ្ហាឱ្យខ្លួនឯង ធ្វើឱ្យខ្លួនឯងរវល់ទាំងមិនត្រឹមត្រូវ ដើរលើផ្លូវដែលមិនច្បាស់លាស់ ដឹងថាមិនត្រូវហើយ តែនៅតែបន្តដើរថែមទៀត ព្រោះហេតុតែអ្នកមិនទាន់ចេះលើគ្រប់គ្រងខ្លួនឯង មិនទាន់មានគោលការណ៍រស់នៅត្រូវសម្រាប់ខ្លួនឯង និងចូលចិត្តបោកកុហកខ្លួនឯងជាប្រចាំ។

ពេលដែលហត់ខ្លាំង គួរតែសម្រាកសិនទៅ! ចាំបន្តដំណើរទៅមុខទៀត កុំបង្កើតទម្លាប់អាក្រក់ឱ្យខ្លួនឯង គ្មានជោគជ័យណាដែលសម្រេចបានក្នុងរយៈពេលមួយម៉ោង ឬមួយថ្ងៃឡើយ ដូចនេះ បើដល់ពេលញ៉ាំគឺត្រូវតែញ៉ាំ ដល់ពេលគេងគឺត្រូវតែគេង ទើបខួរក្បាលស្រឡះ មានកម្លាំងជម្នះឧបសគ្គបន្តទៅទៀត។ មនុស្សមិនធ្លាប់ខុស ក៏មិនអាចមានឱកាសរកឃើញផ្លូវត្រូវដែរ អ្នកដែលមិនធ្លាប់បរាជ័យក្នុងការរកស៊ី ក៏មិនអាចរកឃើញផ្លូវរកស៊ីឱ្យជោគជ័យ។ ចង់ដឹងថាការគិត និងគំនិតរបស់អ្នកត្រូវ ឬក៏ខុស សាកដើរមើលទៅ អ្នកប្រាកដជារកចម្លើយបានល្អបំផុតសម្រាប់ជីវិត។

គ្រប់ពេលអ្នកជួបឧបសគ្គ អ្នកនឹងរៀនបានមេរៀនល្អថ្មីមួយ គ្រប់ពេលអ្នកលំបាកខ្លាំង អ្នកនឹងរកឃើញវិធីសាស្ត្រថ្មីមួយ គ្រប់ពេលអ្នកបរាជ័យ អ្នកនឹងរកឃើញផ្លូវទៅភាពជោគជ័យ គ្រប់ពេលអ្នកឈឺចាប់ខ្លាំង អ្នកនឹងកាន់តែរឹងមាំជាងមុន។ ដកស្រង់ចេញពីសៀវភៅ “កូនសោជីវិត” និពន្ធដោយលោក ម៉េង សុងហោរ។ អ្នកអាចទិញតាមនេះអ្នកអាចទិញសៀវភៅ "លំហូរចិត្ត" តាមនេះ👉 https://t.me/BusinessCambodiaBook