សម្រាប់គោលការណ៍ទីមួយ កុំរស់ដូចជាកង្កែបក្នុងឆ្នាំ។ អ្នកគួរយល់នោះ គឺមេរៀនពីសត្វកង្កែប។ បើអ្នកដាក់ឆ្នាំហើយដាក់ទឹកក្តៅនោះ រួចដាក់កង្កែបចូល ច្បាស់ណាស់វានឹងលោតចេញពីឆ្នាំភ្លាមតែម្តង។ ប៉ុន្តែបើអ្នកដាក់សត្វបង្កែបក្នុងឆ្នាំ ហើយអ្នកបង្កើនកម្តៅក្នុងឆ្នាំងម្តងបន្តិចៗ សត្វបង្កែកនឹងមានអារម្មណ៍ថាវាស្រួលខ្លួនណាស់ មួយសន្ទុះក្រោយមក សត្វកង្កែបមួយក្បាលនេះនឹងឡើងឆ្អិតជាមិនខាន។ មេរៀនសត្វកង្កែបបានបង្រៀនយើងថា បើអ្នកសម្ងំរស់នៅក្នុងភាពសុខស្រួលក្នុងឆ្នាំដូចជាសត្វកង្កែប ហើយភ័យខ្លាចច្រើនមិនហ៊ានសាកល្បងអ្វីថ្មីៗ ទេ បញ្ហាក្នុងជីវិតរបស់អ្នកនឹងមានអំណាចដើម្បីផ្តួលអនាគត និងជីវិតរបស់អ្នក ឱ្យរស់នៅវេទនាទាំងកាយទាំងចិត្តផងដែរ។ តាមលោក Andrew Matthews បានលើកឡើងថា “ជីវិតយើងធ្វើដំណើរឡើងម្តងបន្តិចៗ បើអ្នកមិនព្យាយាមដោះស្រាយបញ្ហាតូចៗ ទេ ជីវិតរបស់អ្នកនឹងសង្រ្គោះបន្ទោន់មិនខានឡើយ”។ បើអ្នកចង់អនាគតភ្លឺស្វាង ចូរអ្នកកុំរស់ដូចជាសត្វបង្កែបឱ្យសោះ។

នៅមានគោលការណ៍មួយទៀត ដើម្បីបណ្តុះស្មារតីរបស់អ្នកឱ្យមាំលើបញ្ហា គឺរស់ក្នុងវិន័យ។ តាមលោក Andrew Matthews បានលើកឡើងថា “ចូរអ្នកដាក់វិន័យឱ្យខ្លួនធ្វើកិច្ចការតូចៗ ណាដែលមិនចូលចិត្ត គង់តែថ្ងៃណាមួយ អ្នកមានសមត្ថភាពឆ្នើមអាចធ្វើកិច្ចការនោះបានសម្រេច ដើម្បីសាងអនាគតខ្លួន ឱ្យជីវិតរស់នៅមានក្តីសុខជាមិនខានឡើយ”។ គ្រាន់តែមានវិន័យតូចមួយដែលខ្លួនមិនចូលចិត្ត គឺព្យាយាមហាត់ប្រាណឱ្យបាន ១០នាទីជាប្រចាំថ្ងៃ សុខភាពអ្នកកាន់តែរឹងមាំ។ គ្រាន់តែអ្នកដាក់វិន័យអានសៀវភៅឱ្យច្រើនជាងមើលទូរស័ព្ទ ជីវិតរបស់អ្នកនឹងសម្បូរគំនិតថ្មីៗ ។ អ្នកឃើញទេ! គ្រាន់តែអ្នកព្យាយាមតែបន្តិច រស់តាមគោលការណ៍វិន័យ ជីវិតរបស់អ្នក អនាគតរបស់អ្នក នឹងមានដំណើររលូនជាមិនខានទេ។ ពេលអ្នករស់ក្នុងវិន័យបែបនេះ មានន័យថា ចិត្តគំនិតរបស់អ្នកមានរបៀបរៀបរយហើយ។ ដូចនេះ ពេលអ្នករស់ក្នុងវិន័យបែបនេះ អ្នកនឹងក្លាយជាម្ចាស់ដឹកនាំអនាគតដោយខ្លួនឯង៕ អត្ថបទដោយ៖ ទ្រ សុភាព