មានសំណួរមួយថា ហេតុអ្វីបញ្ហាខ្លះ ធ្វើមនុស្សមួយចំនួនដួល ហើយអ្នកមួយចំនួនទៀត បែបជាធ្វើឱ្យគេរឹងមាំទៅវិញដោយសារអ្វី? បើអ្នកគិតមិនឃើញចម្លើយទេនោះ នៅក្នុងអត្តបទនេះជាចម្លើយល្អបំផុត។ តាមលោក Andrew Mattews ជាអ្នកចិត្តសាស្រ្តបានសិក្សាឃើញថា ពេលយើងជួបបញ្ហាជាការដាស់ស្មារតីយើងឱ្យចេះកែខ្លួន។ បើយើងចេះតែបណ្តែតបណ្តោយខ្លួនមិនព្រមធ្វើអ្វីទេ ជីវិតរបស់យើងនឹងជាប់គាំងមួយកន្លែង ហើយដួលតែម្តង។ ដូចនេះ អ្នកកុំព្យាយាមឃាត់ខ្លួនឯងនៅមួយកន្លែងឱ្យសោះ អ្នកត្រូវតែបន្តដំណើរទៅមុខ។ បើអ្នករស់នៅតាមទម្លាប់ផ្នត់គំនិតចាស់ៗ ចង់បានសុខស្រួលពេក ថ្ងៃណាមួយ អ្នកនឹងដើរជុលនឹងជញ្ជាំងថ្ម ទើបអ្នកភ្ញាក់ខ្លួន។
ដូចជាករណីឃើញជាក់ស្តែងថា ពេលអ្នកមានបញ្ហាសុខភាព ហើយគ្រូពេទ្យប្រាប់ថា “បើអ្នកមិនផ្លាស់ប្តូរទម្លាប់ក្នុងការរស់នៅទេ អ្នកអាចនឹងស្លាប់ក្នុងពេលឆាប់ៗ នេះជាមិនខានទេ។ អ្នកក៏ធ្វើការសម្រេចចិត្តផ្លាស់ប្តូររបបអាហារនិងធ្វើលំហាត់ប្រាណតែម្តង។ ព្រោះតែអ្នកបានប្តូរផ្នត់គំនិតថា បើខ្លួនបន្តធ្វើទម្លាប់ចាស់ៗ បែបនេះ ខ្លួនរស់មិនយូរទេ។
ការសិក្សាក៏ដូចគ្នាដែរ។ ពេលអ្នកចាប់ផ្តើមប្រឹងរៀនខ្លាំងជាទីបំផុតគឺពេលយើងដឹងខ្លួនថាប្រហែលជានឹងធ្លាក់ ឬជិតដល់ថ្ងៃប្រឡងនៅសល់ប៉ុន្មានថ្ងៃខាងមុខនេះ... ពេលមានបញ្ហា ទើបអ្នកមិនធ្វើការផ្លាស់ប្តូរផ្នត់គំនិតចាស់ៗ ចោលបាន អ្នកនឹងដួលមិនខានទេ។ មនុស្សភាគច្រើនដួលព្រោះតែខំជាប់មិនព្រមធ្វើការផ្លាស់ប្តូរនេះឯង។
មនុស្សយើងតែងរៀនមេរៀនអស្ចារ្យអ្វីមួយ គឺនៅពេលខ្លួនប្រែជាស្មុគស្មាញក្នុងកិច្ចការហ្នឹង។ ពេលណាដែលអ្នកធ្លាប់បានធ្វើការសម្រេចចិត្តដ៏សំខាន់បំផុតនៅក្នុងជីវិត? មិនមែនពេលអ្នកដេកស៊ីស្រួល និងមានលុយចាយពេញដៃនោះទេ គឺពេលអ្នកទន់ជើងហើយជ្រុតជង្គង់នៅលើដីហ្នឹងឯង បញ្ជាក់ឱ្យច្បាស់នោះគឺថា ជាពេលអ្នកមានវិបត្តិធ្ងន់ធ្ងរកើតឡើង បន្ទាប់ពីត្រូវបានអ្នកដទៃបដិសេធចោល គេមើលងាយដោយត្រូវបានគេទាត់ក្បាលចោលជាដើម។ ហើយក៏ជាពេលអ្នកនិយាយមកទៅកាន់ខ្លួនឯងថា “ខ្ញុំធុញទ្រាន់នឹងការដាច់យ៉ៃ ធុញទ្រាន់នឹងការត្រូវបានគេបោកប្រាស់ណាស់។ ខ្ញុំធុញទ្រាន់នឹងភាពក្រីក្រនេះ.. ខ្ញុំត្រូវតែចាប់ផ្តើមធ្វើការផ្លាស់ប្តូរហើយ ទើបជីវិតខ្ញុំមិនដួល”។
អ្នកឃើញទេ! ភាពជោគជ័យដែលអ្នកបានអបអរសាទរ មិនបានផ្តល់មេរៀនល្អៗ ច្រើនដល់អ្នកទេ។ តាមលោក Andrew Mattews បានលើកឡើងថា មានតែកាលៈទេសៈបរាជ័យ និងការឈឺចុកចាប់ឯណេះវិញទេ ដែលជាពេលវេលាលល្អបំផុតក្នុងការអប់រំបំប៉នខ្លួនអ្នកឲ្យប្រសើរឡើង ឱ្យអ្នករឹងមាំជាងមុនទ្វេដង។ បើអ្នកអង្គុយពិចារណាមកក្រោយបន្តិច អ្នកនឹងយល់ឃើញថា វិបត្តិជាចំណុចរបត់នៃការផ្លាស់ប្តូរនៅក្នុងជីវិតរបស់ខ្លួនឯងឱ្យល្អប្រសើរឡើងជានិច្ចកាល។ នេះហើយបញ្ហាជាឱកាសឱ្យសមត្ថភាពរបស់អ្នករីកចម្រើន ហើយផ្លូវចិត្តរបស់អ្នកមិនដួលនោះទេ។ នៅពេលអ្នកព្យាយាមរៀនពីបញ្ហាធ្វើជាកម្លាំងចិត្ត ជាបទពិសោធន៍ក្នុងជិវិត និងជាផ្លូវឱ្យជីវិតអ្នកទៅមុខរហូតនោះ...៕ អត្ថបទដោយ៖ ទ្រ សុភាព