ពេលមានអារម្មណ៍រីករាយ អ្នកគិត អ្នកធ្វើអ្វីក៏មានលទ្ធផលដែរ។ ប៉ុន្តែពេលអ្នកមិនមានអារម្មណ៍ល្អនោះ តើអ្នកគួរធ្វើបែបណា? តាមគេហទំព័រ powerofpositivity បានបញ្ជាក់ថា បើអ្នកមិនអាចគេងបានក្នុងមួយយប់៦ទៅ៨ម៉ោងទេ អ្នកកំពុងតែធ្វើបាបសុខភាពខ្លួនឯងទាំងកាយនិងចិត្ត វាធ្វើឱ្យខួរក្បាលអ្នកគិតលើរឿងអវិជ្ជមានច្រើន។ បើគេងឱ្យស្ងប់រយៈពេល ៨ម៉ោងក្នុងមួយយប់នោះ វាធ្វើឱ្យមានអារម្មណ៍ស្ងប់ សូម្បីតែការគិតក៏មានគំនិតល្អៗ និងគំនិតវិជ្ជមានច្រើនឡើង”។ ការគិតបានល្អ អ្នកត្រូវចេះមានគំនិតឆ្ងល់ឱ្យច្រើន។ តាមលោកសូក្រាតបានបញ្ជាក់ថា ចម្ងល់ជាការបណ្តុះគំនិតល្អៗ ផុសចេញមក។
បើតាមប្រសាសន៍របស់អ្នកឧកញ៉ាវេជ្ជបណ្ឌិត គួច ម៉េងលី ដែលចែករំលែកលើបណ្ដាញយូធូបរបស់លោកក៏បានលើកឡើងពីវិសាលភាពនៃការគិតវិជ្ជមានដែរថា “មនុស្សយើងមិនត្រូវមានភាពអវិជ្ជមានទេ ព្រោះអ្វីដែលយើងគិត គំនិតយើងមកដល់ អ្វីយើងឆ្ងល់ក៏គង់មកដល់ដែរ។នៅពេលយើងឆ្ងល់ពីរឿងអសមត្ថភាព យើងនឹងអសមត្ថភាព យើងគិតថាយើងមិនកើត យើងគង់នឹងមិនកើតហើយ យើងគិតថាយើងអន់យើងនឹងអន់ហើយ ព្រោះខួរក្បាលយើងបញ្ជាអ្វីដែលយើងគិត។ចឹងគេឱ្យយើងគិតវិជ្ជមាន គិតអ្វីលូតលាស់អ្វីស្រស់ប្រិមប្រិយ អ្វីល្អ ហើយព្យាយាមតោងវាទាញវាទៅមុខឱ្យល្អ...”។
ការរៀនមើលអ្វីៗ ក្នុងផ្លូវល្អជាការស្ថាបនាសេចក្តីសុខចូលក្នុងជីវិតរបស់អ្នកកាន់តែច្រើន។ នេះជាសម្តីលោក ម៉ារទីន សេលិកម៉ែន សូម្បីនៅក្នុងសៀវភៅ Learned Optimism របស់លោកក៏បានបញ្ជាក់បន្ថែមថា ពេលអ្នកងើបពីការដួល ការបរាជ័យ និងការឈឺចាប់អ្វីមួយ មិនមែនការជម្នះលើអារម្មណ៍ផ្លូវចិត្តនោះទេ ប៉ុន្តែជាការសម្លឹងមើលជីវិតជាថ្មីក្នុងផ្លូវវិជ្ជមានដោយគិតថា ការដួលក្នុងជីវិតនេះ គ្រាន់តែជាមួយរឿងមួយកើតឡើងមួយរយៈពេលខ្លី រួចក៏រលាយបាត់ទៅវិញហើយ។” អ្នកអាចគិតមើលថា តើបញ្ហារាប់រយចូលមកក្នុងជីវិតអ្នកនេះ មានបញ្ហាមួយណាជាការពិត? គឺគ្មានទេ វាតែងរសាតតាមខ្យល់រហូត។ ការគិតបែបនេះ នាំឱ្យរឿងល្អៗ ក៏ចូលមកក្នុងជីវិតអ្នក៕ អត្ថបទដោយ៖ ទ្រ សុភាព