ប្រេងដូងត្រជាក់ម៉ាកយីហោLM ដែលបានបង្កើតនិងផលិតឡើងដោយស្នាដៃកូនខ្មែរនៅខេត្តសៀមរាប កំពុងតែមានសន្ទុះក្នុងការគាំទ្រយ៉ាងខ្លាំងពីសំណាកអ្នកប្រើប្រាស់ ដោយសារតែវាមានគុណប្រយោជន៍ច្រើនមហាសាលក្នុងការជួយសុខភាព និងសរីរាង្គផ្សេងៗនៃរាងកាយ ហើយម្ចាស់យីហោប្រាប់ថា ប្រេងដូងរបស់គាត់ គឺត្រៀមនឹងចេញទៅវាយលុកទីផ្សារក្រៅប្រទេសនាថ្ងៃខាងមុខ។

លោកស្រី លឹម លីម៉ា ដែលជាស្ថាបនិកនៃប្រេងដូងត្រជាក់យីហោLMបានបង្ហើបឱ្យក្រុមការងារចាបបៃតងកម្ពុជាដឹងថា ​ការផលិតប្រេងដូងនេះឡើង គឺគាត់មានចក្ខុវិស័យចំនួន២ ទី១ គឺជួយឱ្យប្រជាជនក្នុងស្រុកមានការងារធ្វើ និងទី២គឺ ដើម្បីជួយកសិករដាំដូង និងប្រជាជនដែលមានដូងសល់ច្រើនអាចរកចំណូលបានពីដូងទាំងនោះ។ ដូច្នេះហើយទើបគាត់សម្រេចចិត្តច្នៃដូងទុំទាំងនោះ ឱ្យក្លាយជាប្រេងដូងត្រជាក់ដែលមានគុណប្រយោជន៍ និងជាផលិតផលដែលមានគុណតម្លៃក្នុងទីផ្សារ។ លោកស្រីបានចាប់ផ្ដើមធ្វើប្រេងដូងត្រជាក់នេះ យូរឆ្នាំគ្រាន់ដែរហើយ (ផលិតសម្រាប់តែការប្រើប្រាស់ក្នុងគ្រួសារ) ក៏ប៉ុន្តែដោយសារមុខជំនួញច្រើន ទើបលោកស្រីមិនសូវបានយកចិត្តទុកដាក់ខ្លាំងចំពោះមុខរបបរមួយនេះ ទើបតែដើមឆ្នាំ២០២១នេះ លោកស្រីបានចាប់សម្រុកវាយលុកទីផ្សារក្នុងស្រុកខ្មែរ ពោលគឺកាលពី ដើមខែមិថុនា ឆ្នាំ២០២១ រហូតមកទល់ពេលនេះ ប្រេងដូងរបស់លោកស្រី ពិតជាទទួលបានការគាំទ្រខ្លាំង និងទទួលបានការកម្មង់ពីអតិថិជនគ្រប់លំដាប់ថ្នាក់នៅគ្រប់ទិសទី។

លោកស្រីបន្តថា មុខរបបរមួយនេះបានជួយបុគ្គលិកនិងកម្មករក្នុងក្រុមហ៊ុនប្រមាណ ជាង៥០នាក់ អាចបន្តមានការងារធ្វើដូចមុន មានចំណូលសមរម្យសម្រាប់ចិញ្ចឹមជីវភាពរស់នៅប្រចាំថ្ងៃ ដែលអាចចាត់ទុកថា ជាកម្លាំងចិត្តរបស់ស្ថាបនិក ក្នុងការបន្តផលិតប្រេងដូងត្រជាក់នេះជារៀងរហូត ជាមួយគ្នានេះ លោកស្រីបានចុះតាមបណ្ដាខេត្តនានាៗជុំវិញប្រទេសកម្ពុជា ដើម្បីប្រមូលទិញដូងទុំខ្មែរ ឬពេលខ្លះចុះទៅតាមតំបន់ដាច់ស្រយាលនានាជាច្រើនដែលជាតំបន់ ប្រជាកសិករខ្មែរក្រីក្រ និងជាម្ចាស់អនុផលដូង មិនធ្លាប់ទទួលបានតម្រូវការទីផ្សារដូងទុំ ពីមុនមកទាល់តែសោះនោះ ឱ្យបានក្លាយទៅជាអ្នកផ្គត់ផ្គង់ដូងទុំសម្រាប់សង្វាក់ផលិតកម្មប្រេងដូងត្រជាក់ អិលអិម។ ហើយវា គឺជាហេតុផលដ៏ធំមួយក្នុងចំណោមហេតុផលផ្សេងៗទៀត ដែលលោកស្រី លីម៉ា ប្ដេជ្ញាចិត្តថាត្រូវតែពង្រីកផលិតផលក្នុងស្រុកមួយនេះឱ្យឈានដល់លំដាប់ខ្ពស់បំផុត។

ដោយឃើញការគាំទ្រច្រើន បែបនេះ លោកស្រី លឹម លីម៉ា និងស្វាមី គឺលោក​ឃួង ម៉េងជាប បានសម្រេចថានឹងផលិតប្រេដូងត្រជាក់នេះឱ្យក្លាយជាផលិតផលស្ដង់ដារ ដើម្បី ត្រៀមវាយលុកទីផ្សារក្រៅប្រទេស ស្របទៅតាមផែនការយុទ្ធសាស្ត្រ SMEs របស់រាជរដ្ឋាភិបាល ថែមទៀតផង។

សូមបញ្ជាក់ថា ប្រេងដូងត្រជាក់ LM ផលិតនៅក្នុងខេត្តសៀមរាប ដោយក្រុមហ៊ុន លឹម លីម៉ា ខ្មែរ អង្គរ ហ្វ៊ូត ឯ.ក. ហើយ បច្ចុប្បន្ននេះ​ កំពុងមានសក្ដានុពលជាអាទិភាព ខ្លាំងក្នុងស្រុកខ្មែរ ដែលមានអ្នកតំណាងចែកចាយនៅទូទាំង២៥ ខេត្តក្រុងរួចហើយ។

អត្ថបទដោយ៖​ តឹក ស៊ីថា

អត្ថបទដោយ៖​ តឹក ស៊ីថា​