ក្លៀកខ្មៅនៅពេលពេញវ័យ ត្រូវបានគេសិក្សារកឃើញថា អាចបណ្ដាលមកពីបញ្ហាជាច្រើនរួមមាន កត្តាប្រើប្រាស់នូវសារធាតុ​គីមី​បំបាត់​ក្លិន ឬផលិតផលបំបាត់ក្លិន ឧស្សាហ៍អេះ បក ដក ឬកោររោមញឹកញាប់ ការស្លៀកពាក់ខោអាវរឹបតឹង ញុំាអាហារសម្បូរជាតិខ្លាញ់ ផ្អែម ប្រៃ និងជក់បារី...ជាដើម។ ចំណែកឯបញ្ហាដទៃទៀតអាចកកើតមកពីហ្សែន ឆ្លងជំងឺ ឬបាក់តេរី ដែលបង្កឱ្យតំបន់ស្បែកស្លៀកប្រែជាស្រអាប់ និងខ្មៅ។

កត្តានេះដែរ ដើម្បីដោះស្រាយនូវវិបត្តិក្លៀកខ្មៅនេះ ប្រភព Healthline បានប្រាប់នូវវិធីសាស្ត្រខ្លះៗដែលអាចជួយកែពណ៌ស្បែកក្លៀកឱ្យមកសភាពប្រសើរ ឬត្រលប់មកសភាពប្រក្រតីវិញ៖

១. ជំហានធ្វើឱ្យក្លៀកពណ៌ស្រាលជាងមុន

- ប្តូរផលិតផលបំបាត់​ក្លិន ស្វែងរកប្រភេទត្រូវនឹងស្បែក និងមានគុណភាពច្បាស់លាស់ដែលមានការទទួលស្គាល់ត្រឹមត្រូវ។

- កាត់បន្ថយការរោម មិនដករោមផឹកញាប់ពេក

- ខាត់ស្បែក ដោយប្រើ​ស្ក្រាប់​ថ្នមៗ ២ ទៅ ៣ ដង​ក្នុង​មួយ​សប្តាហ៍។

- ស្លៀកសម្លៀកបំពាក់រលុង

- កាត់បន្ថយនូវរបបអាហារមានជាតិខ្លាញ់ ផ្អែម ប្រៃ និងព្យាយាមនៅឱ្យឆ្ងាយពីផ្សែងជក់បារី។

២. ធ្វើម៉ាស

- ម៉ាសដំឡូង៖ កិន​ដំឡូងបារាំង​មួយ​ផ្លែ ច្របាច់​យកទឹក​ ហើយ​យក​ទឹក​មក​លាប​លើ​ក្លៀក។ បន្ទាប់ពី ១០ នាទីក្រោយមក លាងជម្រះក្លៀកជាមួយនឹងទឹកត្រជាក់ចេញ។

- ម៉ាសទឹកដោះគោ ទឹកផ្កាកុលាប និងសំបកក្រូច៖ លាយទឹកដោះគោ ១ស្លាបព្រាបាយ ទឹកផ្កាកុលាប ១ ស្លាបព្រាជាមួយកម្ទេចសម្បកក្រូចល្មម។ បន្ទាប់មកជូត​ក្លៀក​​ថ្នមៗ​ជាមួយល្បាយដែលលាយរួច​ហើយ​ទុកចោល​ប្រហែល ១៥ នាទី មុន និង​លាង​សម្អាត​ចេញ​ដោយ​ទឹក​ត្រជាក់។ ធ្វើពីរទៅបីដងក្នុងមួយសប្តាហ៍។

- ម៉ាសស៊ុតក្រហម៖ មុនចូលគេង យកស៊ុតឆៅផ្នែកក្រហម លាបម៉ាស្សានៅលើក្លៀកថ្នម នៅព្រឹក លាងជាមួយសាប៊ូដែលមានកម្រិត pHចេញ។

- ប្រេងដូង៖ ម៉ាស្សា​បន្តក់​ប្រេងដូង​ពីរបី​ដំណក់​លើ​ស្បែកក្លៀក បន្ទាប់ពី ១៥ នាទី លាង​សម្អាត​ក្លៀក​ដោយ​ទឹក​ក្តៅឧណ្ណៗ និង​សាប៊ូមានជាតិកាត់កម្រិត​ស្រាលៗ។ ធ្វើពីរទៅបីដងក្នុងមួយសប្តាហ៍។

៣. ជំហានព្យាបាលបំបាត់ក្លៀកខ្មៅ

ជាទូទៅនៅពេលដែលទៅជួបជាមួយពេទ្យជំនាញ ឬវេជ្ជបណ្ឌិតជំនាញខាងសើស្បែក គឺតម្រូវឱ្យមានការពិនិត្យច្បាស់លាស់ទៅលើកម្រិតនៃការខូចខាតនៃស្រទាប់ស្បែកជាមុនសិន។ ក្នុងកម្រិតស្រាលគ្រូពេទ្យអាចជាឱ្យថ្នាំលាប ឬណែនាំនូវផលិតផលដែលត្រឹមត្រូវសម្រាប់ស្បែក។ ដោយឡែកសម្រាប់ស្បែកប្រភេទខ្លាំងអាចជាបាញ់ឡាស៊ែរ ដើម្បីលុបសារធាតុពណ៌ក្លៀក។

គូសបញ្ជាក់បន្ថែមផងថា ស្បែកក្លៀកខ្មៅមិនមែនព្យាបាលត្រឹមតែរយៈពេលខ្លីទេ គឺត្រូវការការថែទាំរយៈពេលយូរ និងយកចិត្តទុកដាក់ជាមួយការអនាម័យខ្លួនដែរ។ ម្យ៉ាងវិញទៀត ចំពោះរបបអាហាររឹតតែសំខាន់ ហេតុនេះអ្នកមានបញ្ហាស្បែកក្លៀកគួរតែញុំានូវអាហារជាប្រភេទបន្លែបៃតង ផ្លែឈើ និងញុំាទឹកឱ្យគ្រប់គ្រាន់។ អ្វីដែលកាន់តែពិសេសក្នុងការជួយដោះស្រាយបញ្ហាស្បែកក្លៀកបានលឿនទៀតនោះ គឺកាត់បន្ថយស្ត្េស ធ្វើលំហាត់ប្រាណ និងគេងឱ្យបានគ្រប់គ្រាន់៕

អត្ថបទដោយ៖ ប៉ាវ ភក្តី