គីមឈី គឺជាអាហារតំណាងជាតិ១របស់ប្រទេសកូរ៉េខាងត្បូង ដែលអាចយកវាទៅញុំាជាមួយអាហារជាច្រើនប្រភេទ ដូចជាយកទៅធ្វើសម្ល ញុំាជាមួយសាច់អាំង ស៊ុប​ឬក៏ញុំាជាមួយអាហារផ្សេងៗបានច្រើនមុខទៀត។ ដល់ពេលបច្ចុប្បន្ននេះ ប្រជាជនកម្ពុជាយើងក៏កំពុងតែនិយមចូលចិត្តញុំាគីមឈីជាមួយអាហារដូចគ្នា។

ជាការពិតណាស់ យោងតាមរយៈប្រភព webmd បានណែនាំពីអត្ថប្រយោជន៍ជាច្រើនក្នុងគីមឈី គឺជួយដល់សុខភាពបេះដូង ការពារការកកឈាមក្នុងសរសៃឈាម ប៉ូវសុខភាពរបស់ក្រពះពោះវៀន ថែរក្សានិងការពារដុំសរសៃប្រសាទ និងជំនួយដល់ផ្លូវអារម្មណ៍ដល់អ្នកញុំាដូចគ្នា។ប្រភពដដែលក៏បានបន្ថែមឱ្យដឹងផងដែរថា ក៏ព្រោះក្នុងគីមឈី សម្បូរដោយប្រូបាយអូទិក ដែលជាប្រភេទបាក់តេរីល្អសម្រាប់ជួយដល់សុខភាពក្រពះពោះវៀនឱ្យដំណើរការល្អ ពពួកនេះជាប្រភេទបាក់តេរីល្អ។ មួយវិញទៀតតាមរយៈការសិក្សាបានបញ្ជាក់ឱ្យដឹងថា ញុំាគីមឈី អាចកាត់បន្ថយហានិភ័យនៃជំងឺក្រិនសរសៃឈាមបេះដូង  តាមរយៈសារធាតុប្រឆាំងអុកស៊ីតកម្មប្រឆាំងនឹងការរលាក រួមទាំងកាត់បន្ថយកូលេស្តេរ៉ូលក្នុងឈាម។ បន្ថែមលើសនេះ គីមឈីក៏មានប្រយោជន៍ អាចការពារការឆ្លងរោគផ្សិតក្នុងទ្វារមាសរបស់ស្រ្តីបាន។

យោងតាមរយៈអ្នកឯកទេសខាងចំណីអាហារ Keri Gans បានបន្ថែមគេ គីមឈីត្រូវបានគេទទួលស្គាល់ថា សម្បូរដោយប្រូបាយអូទិក ដែលមានប្រយោជន៍ជួយក្រពះពោះវៀន។ អ្នកសិក្សាស្រាវជ្រាវ Burdeosបានសិក្សាកាលពីឆ្នាំ២០១៩ឱ្យដឹងផងដែរថា គីមឈីអាចជួយការពារការឆ្លងមេរោគផ្សិតក្នុងទ្វារមាស ​​កម្ចាត់រោគផ្សិតដែលអាចបង្ករោគក្នុងទ្វារមាស បង្កជាបញ្ហារលាក រមាស់ទ្វារមាសឡើងមកប៉ះពាល់សុខភាពស្រ្តី។  ទោះយ៉ាងនេះក្ដីអ្នកជំនាញមិនបានណែនាំឱ្យស្រីៗដែលមានបញ្ហារោគស្រ្តីមកញុំាគីមឈីដើម្បីជួយបំបាត់បញ្ហានេះនោះទេ តែញុំាគីមឈីអាចជួយឱ្យស្រ្តីមានសុខភាពទ្វារមាសល្អ ការពាររោគផ្សិតតែប៉ុណ្ណោះ។

ជាចុងក្រោយ គីមឈីមិនត្រឹមតែជួយដល់សុខភាពក្រពះពោះវៀន ការពារជំងឺក្រិនសរសៃឈាមបេះដូង តែគីមឈីក៏មានប្រយោជន៍ជួយដល់សុខភាពរបស់ទ្វារមាសស្រ្តីដូចគ្នា៕

អត្ថបទដោយ៖ ប៉ែត ធីតា