ជឿថាគ្មានប៉ាម៉ាក់ឯណាដែលចង់ឱ្យកូនខ្លួនឯងកើតមកមិនគ្រប់លក្ខណៈ សុខភាពខ្សោយ ឈឺច្រើន លូតលាស់យឺតនោះទេ។ គ្រប់គ្នាសុទ្ធតែប្រាថ្នាឱ្យកូនខ្លួនឯងកើតមកសុខភាពរឹងមាំ ខួរក្បាល ស្អាតតាំងពីកំណើត។
ជាមួយគ្នានេះដែរ មានរឿង៤យ៉ាងដែលគូស្វាមីភរិយាមានគម្រោងយកកូន ហើយចង់ឱ្យកូនខ្លួនឯងកើតមកគ្រប់លក្ខណៈល្អ គ្រប់គីឡូ សុខភាពរឹងមាំ មិនងាយឈឺផ្តេស គួរណាស់តែធ្វើនោះមានដូចជា៖
រឿងទី១នោះគឺ៖ បុរសដែលជាស្វាមីប្រសិនបើមានទម្លាប់ជក់បារី ផឹកស្រាជាប្រចាំញឹកញាប់ ត្រូវតែឈប់ជក់បារី ឈប់ផឹកស្រា ឱ្យបានយ៉ាងហោចណាស់៣ទៅ៦ខែមុនពេលរួមភេទ។ បើតាមការសិក្សាបានរកឃើញថា បុរសដែលផឹកស្រាឬជក់បារីជាប្រចាំរាល់ថ្ងៃ នៅអំឡុងពេលរួមភេទយកកូន អាចបង្កើនហានិភ័យដល់កូនដែលនឹងកើតមកប្រឈមនឹងកើតជំងឺបេះដូង រហូតដល់ទៅ៤៤%។ ពីព្រោះជាតិអាល់កុលនៅក្នុងស្រា ផ្ទុកសារធាតុ teratogen(ធឺរ៉ាតូចេន) ដែលបណ្តាលឱ្យខូចទ្រង់ទ្រាយរបស់អំប្រ៊ីយ៉ុង។
រឿងទី២នោះគឺ៖ ការពិនិត្យសុខភាព ស្រ្តីជាម្តាយមុនពេលសម្រេចចិត្តយកកូន ចាំបាច់ត្រូវតែត្រួតពិនិត្យសុខភាពដោយមើលទៅលើ មាត់ស្បូន ពិនិត្យទំហំស្បូន ពិនិត្យសុដន់ ជាពិសេសនោះគឺធ្វើតេស្តឈាមដើម្បីស្វែងរកមេរោគថ្លើមB,C បើករណីរកឃើញជំងឺទាំងនេះគឺត្រូវប្រញាប់ព្យាបាលឱ្យជា ទើបអាចរួមភេទយកកូនបាន។
ចំណែកឯរឿងទី៣នោះគឺ៖ ស្រ្តីជាម្តាយត្រូវញ៉ាំថ្នាំអាស៊ីហ្វូលីកឱ្យបានរាល់ថ្ងៃរយៈពេល៣ខែមុនពេលរួមភេទយកកូន។ ការញ៉ាំថ្នាំអាស៊ីតហ្វូលីកមុនពេលយកកូននេះគឺជួយឱ្យស្បូនមានសុខភាពរឹងមាំ ស្បូនមានទំហំល្អ គឺប្រៀបដូចជាអ្នកបានសាងសង់ផ្ទះដ៏រឹងមាំមួយសម្រាប់ទុកឱ្យកូនមកស្នាក់នៅអ៊ីចឹងដែរ។
រឿងទី៤នោះគឺ៖ មិនថាបងប្អូនស្រ្តីឬបុរសនោះទេដែលមានទម្លាប់ញ៉ាំអាហារចំប៉ន វីតាមីន ខូឡាជែន ថ្នាំសម្រកជាប្រចាំ គឺត្រូវបញ្ឈប់មុនពេលរួមភេទយកកូនរយៈពេលចាប់ពី៣ទៅ៦ខែដូចគ្នា។ ពីព្រោះប្រសិនបើអ្នកនៅបន្តញ៉ាំថ្នាំទាំងអស់នេះអំឡុងពេលរួមភេទយកកូន គឺវាអាចប្រឈមជាហានិភ័យប៉ះពាល់ទៅដល់កូន ហើយអាចពិបានក្នុងការមានកូនថែមទៀតផង។
សង្ឃឹមថាបងប្អូនអ្នកដែលមានគម្រោងយកកូននឹងទទួលបានគំនិតបន្ថែមពីវីដេអូមួយនេះ។ ជាចុសក្រោយលើកទឹកចិត្តបងប្អូនទាំងបុរសនឹងស្រ្តីគួរណាស់តែទៅពិភាក្សាជាមួយគ្រូពេទ្យជំនាញឱ្យបានច្បាស់មុនពេលសម្រេចចិត្តយកកូន។
អត្ថបទដោយ៖ គន្ធា