ការហាត់ប្រាណមិនមែនចេះតែហាត់នោះទេ ជាពិសេសគឺក្នុងពេលលោកអ្នកទៅចាប់ផ្ដើមហាត់លើកដំបូងតែម្ដង ប្រសិនបើហាត់មិនមានការណែនាំត្រឹមត្រូវនោះទេ មិនត្រឹមស្រកគីឡូប៉ុណ្ណោះទេ ថែមទាំងអាចធ្វើឱ្យរូបរាង ប្រែប្រួលមិនស្អាតថែមទៀតផង។

លោក រតនៈ វិសិដ្ឋ ជាសិល្បករ និងជាគ្រូ​បង្ហាត់ផ្នែកហាត់ប្រាណ បាន​ថ្លែងប្រាប់ចាបបៃតង (Healthy Cambodia) ថា ជាការពិតណាស់ ការហាត់ប្រាណមិនមែនយើងចេះតែហាត់តាមតែចិត្តចង់ហាត់នោះទេ នៅពេលដែលយើងហាត់មិនមានការណែនាំពីគ្រូត្រឹមត្រូវ គឺយើងពិបាកនឹងទទួលបានរូបរាងដែលយើងចង់បាន និងអ្វីដែលជាផលវិបាកមួយទៀតនោះគឺ​ អាចបណ្ដាលឱ្យសាច់ដុំនៃរូបរាងរបស់យើងគឺ ប្រែប្រួលមិនស្អាតថែមទៀតផង។

ជុំវិញបញ្ហានេះ លោករតនៈ វិសិដ្ឋា បានបន្ថែម សម្រាប់បងប្អូនដែលកំពុងមានបំណងចង់បានសាច់ដុំ ចង់សម្រកគីឡូ ចង់ដំឡើងគីឡូ ការហាត់ប្រាណគឺ ជាកត្តាធំមួយដែលអាចជួយឱ្យក្ដីសុបិន្តរបស់បងប្អូនទទួលបានសម្រេច។ ក៏ប៉ុន្តែ ទន្ទឹ​មនឹងនោះ ជំហានដំបូងនៃការហាត់ប្រាណគឺ បងប្អូនគួរតែទៅហាត់ជាមួយគ្រូជំនាញ ដើម្បីទទួលបានការណែនាំពីរបៀបហាត់និងយកចិត្តទុកដាក់ទៅលើក្បាច់នីមួយៗឱ្យបានច្បាស់ ហើយធ្វើតាមការណែនាំទាំងរបបអាហារ និងការអនុវត្តន៍។

លោកបន្តថា សម្រាប់ការហាត់ដំបូងប្រសិនបើបងប្អូនាហត់ដោយមិនមានគ្រូ បងប្អូនយល់មិនច្បាស់ពីចលនាសាច់ដុំ និងដង្ហើមនៃការហាត់នោះឡើយ ដូចនេះការហាត់របស់បងប្អូនអាចនឹងធ្វើឱ្យសាច់សដុំឡើងខុសពីអ្វីដែលបងប្អូនចង់បាន និងម្យ៉ាងអាចធ្វើឱ្យដង្ហើមដកចេញដកចូលពេលកំពុងហាត់​ដកមិនបានត្រឹមត្រូវ ហាត់ឆាប់ហត់ លើសពីនេះ យូរៗទៅក៏ធ្វើឱ្យបងប្អូនមានអារម្មណ៍ថាខ្ជិលលែងចង់ហាត់ ឬ បោះបង់ការហាត់ចោលតែម្ដង។

ចំណុចនេះហើយ ដែលធ្វើឱ្យបងប្អូនចំណាយពេលហាត់រាប់ខែ មិនស្មើនឹងគេហាត់ជាមួយគ្រូជំនាញ៣ខែ ដូចនេះ សម្រាប់ជំហ៊ានដំបូងបងប្អូនគួរតែជ្រើសក្លឹប ឬ គ្រូបង្ហាត់ណាដែលនៅជិតផ្ទះ ហើយបងប្អូនចូលចិត្ត នោះជាចំណុចដែលកាន់តែល្អ មិនធ្វើឱ្យយើងខ្ជិលក្នុងការទៅហាត់។

លោកបានបញ្ជាក់ថា សម្រាប់អ្នកដែលចង់ហាត់យកសាច់(ប្រុស) ចំណុចសំខាន់ គឺបងប្អូនត្រូវរើសគ្រូជំនាញ រួចចាប់ផ្ដើមអនុវត្តជារៀងរាល់ថ្ងៃ កុំខ្ជិលឱ្យសោះប្រសិនបើពិតជាចង់បានរូបរាងស្អាតពិតមែន។ រឿងសំខាន់ៗដែលអ្នកហាត់យកសាច់ដុំគួរតែធ្វើ គឺសូមកុំព្យាយាមញ៉ាំទឹកច្រើន ចំណុចនេះលោកបញ្ជាក់ថា​ សម្រាប់អ្នកហាត់យកសាច់ដុំប្រសិនបើញ៉ាំទឹកច្រើនអាចនឹងធ្វើឱ្យសាច់ដុំមិនងាយផុសឡើងស្អាតនោះទេ ត្បិតតែវាអាចធ្វើឱ្យស្បែកបងប្អូនស្ងួតបន្តិចដោយសារខ្វះខាតជាតិទឹក តែសូមកុំបារម្ភនៅពេលបងប្អូនមានសាច់ស្អាតលេចរូបរាងហើយ សឹមញ៉ាំទឹកធម្មតាចុះ។

មួយវិញទៀត កំឡុងពេលហាត់សូមកុំញ៉ាំពងក្រហម ពងក្រហមគឺសម្បូរប្រូតេអ៊ីនច្រើន សាច់ធ្វើឱ្យសាច់ដុំមិនងាយឡើង ដូចនេះ បងប្អូនញ៉ាំតែស៊ុតពណ៌សបានហើយ ព្រោះសម្បូរដោយសារធាតុចិញ្ចឹម ជួយដុតរំលាយជាតិខ្លាញ់មិនល្អនៃរាងកាយរបស់យើង។

សូមបញ្ជាក់ថា សម្រាប់អ្នកចង់សម្រកគីឡូ ហាត់យកសាច់ដុំ សូមព្យាយាមហាត់ ហើយធ្វើការហូបអាហារដែលមិនប៉ះពាល់គីឡូដូចជា ត្រី បន្លែផ្លែឈើ​ សាច់ ដើម្បីជួយឱ្យរាងកាយមានវីតាមីនគ្រប់គ្រាន់ និងសូមចៀសវាងអាហារ មានជាប់ជាតិខ្លាញ់ កាត់បន្ថយជាតិប្រៃ ចៀសវាងអាហារផ្អែម និងអាហារដែលកក ពិបាករំលាយអាហារ ធ្វើឱ្យពិបាកបត់ជើងដូចជា នំប៉័ង ប៉ាត់តេ ហតដក សាន់វិច ប៊ឺរហ្គឺ ជាដើម៕

អត្ថបទដោយ៖ តឹក ស៊ីថា