ក្នុងនាមជាមេដឹកនាំត្រូវមានចិត្តសាស្រ្តខ្ពស់ក្នុងការដឹកនាំ មើលថែរក្សា ទាំងការស្ទង់មើល ទាំងទិកនិកនៃការនិយាយ ដើម្បីដឹងពីបុគ្គលិកលក្ខណៈរបស់អ្នកនៅក្បែរខ្លួន។ត្បិតមានទស្សនៈមួយចំនួនពោលថាការនិយាយជាភាសាដែលអាចឱ្យយើងដឹងពីអ្នកដទៃ តែជួនកាលមនុស្សមិនអាចនិយាយចេញនូវអ្វីដែលគេចង់បង្ហាញឡើយ។

ជាទូទៅមនុស្សតែងមានអារម្មណ៍សប្បាយរីករាយ អារម្មណ៍ឈឺចាប់ អារម្មណ៍ច្របូកច្របល់ ជួនកាលក៏មិនអាចយល់ពីអារម្មណ៍ខ្លួនឯងថែមទៀតផង។ការធ្លាក់ចូលក្នុងស្ថានភាពដូចគ្នាភាគរយនៃការទទួលអារម្មណ៍គឺ ដូចគ្នាច្រើន អាចយល់ពីគ្នាក៏ច្រើន ដែលនេះជាចិត្តសាស្រ្តមួយជួយឱ្យយើងយល់ពីអ្នកដទៃ កាន់តែច្បាស់។

ទន្ទឹមនឹងការស្វែងយល់ពីលក្ខណៈសម្បត្តិនិងហេតុការណ៍ដែល បុគ្គលផ្សេងជួបប្រទះនេះមានទស្សនៈមួយលើកឡើងថា “ត្រូវចេះយកខ្លួនឯង ទៅដាក់ក្នុងស្ថានភាពដែលអ្នកដទៃកំពុងរស់នៅ”។

ក្នុងនាមជាមេដឹកនាំ ការយល់ចិត្ត យល់ពីការគិតរបស់អ្នកដទៃ ដឹងសុខទុក្ខ អ្នកដែលនៅក្បែរយើង គឺអាចជួយឱ្យដំណើរការនៃការដឹកនាំក្នុងការបំពេញការងារទទួលបានលទ្ធផលល្អ។

យោងតាមការផ្ដល់កិច្ចសម្ភាសន៍កន្លងមករវាងក្រុមការងារHealthy Cambodiaនិង លោកគ្រូផ្នែកចិត្តសាស្រ្តហឿ សេធុល បានលើកឡើងថា ការចេះយកខ្លួនឯងទៅដាក់ក្នុងស្ថានភាពអ្នកដទៃគឺជួយឱ្យយើង មានក្ដីសុខច្រើន គិចវិជ្ជមានច្រើន ដឹងទុក្ខធុរៈអ្នកដទៃ ជាងមុន ពិសេសអាចផ្ដល់សុភមង្គលដល់ខ្លួនឯងនិងអ្នកដទៃថែមទៀត ព្រោះអ្នកនឹងកើតមានចិត្តសន្ដោយសប្រណៃ នៅពេលអ្នកយល់ពីស្ថានភាពដែលគេកំពុងជួប្រទះ។

Rachel Grady អ្នកដឹកនាំរឿងនិងផលិតករភាពយន្តអាមេរិក និងជាម្ចាស់ពានរង្វាន់ផ្នែក ស្ត្រីនៃចក្ខុវិស័យ កាលពីឆ្នាំ២០០៨បានលើកឡើងដែរថា “ ដាក់ខ្លួនអ្ន។កទៅក្នុងស្បែកជើងរបស់អ្នកដទៃជានិច្ច។ ប្រសិនបើអ្នកមានអារម្មណ៍ថាវាធ្វើឱ្យអ្នកឈឺចាប់វាក៏អាចធ្វើឱ្យអ្នកដទៃឈឺចាប់ដែរ”។

ចូលប្រើប្រាស់អារម្មណ៍របស់អ្នកទៅដាក់ក្នុងស្ថានភាព ដែលបុគ្គលិកអ្នកកំពុងស្ថិតនៅ ហើយស្វែងរកចំណុចសមស្របមួយ ដែលធ្វើឱ្យអ្នកទទួលដឹងថា ការលំបាកដែលគេជួបលំបាកគឺបណ្ដាលមកពីចំណុចអវិជ្ជមានបែបណា។នោះទើបអ្នកងាយប្រាស្រ័យទាក់ទងជាមួយ បុគ្គលិក ហើយអាចជួយដោះស្រាយបញ្ហារបស់បុគ្គលនោះបាន ហើយក៏ដូចជាជួយខ្លួនឯងនិងក្រុមហ៊ុនឱ្យមានភាពរឹងមាំថែមទៀតផងដែរ។

អត្ថបទដោយ៖ ភោគ ម៉ារី