អ្នកប្រាកដជាបានឃើញច្រើនមកហើយពីសម្រស់ដ៏ស្រស់ស្អាតរបស់នារីៗកូរ៉េ ដែលមានសភាពទន់រលោង ហ្មត់ ស្រមោចវារលើស្ទើរតែធ្លាក់។ ហើយមានមិត្តៗនារីមិនតិចនោះទេ ដែលកំពុងប្រាថ្នាស្បែកមុខ​ ដែលស្ទាបទៅមានភាព សម៉ដ្ឋ ភ្លឺស្រស់ថ្លា ទន់រលោងគួរឱ្យ ទាក់ទាញបែបនោះ។ខាងក្រោមនេះ គឺជាក្បួនគ្រឹះខ្លះៗ ដែលអ្នកអាចអនុវត្តបាន។

យោងតាមប្រភព​​ Redbook បានប្រាប់ឱ្យដឹងថា តាមពិតទៅ ការថែក្សាតាមបែបកូរ៉េវា​មិនមែនជារឿងពិបាកអ្វី ខ្លាំងនោះទេ គ្រាន់តែអ្នកខ្លះមើលរំលង ឬ មិនចាប់អារម្មណ៍ចំណុចទាំងនេះតែប៉ុណ្ណោះ ហេតុនេះ យើងនិងប្រាប់លោកអ្នកខ្លះៗពីគន្លឹះ នៃការថែរក្សាសម្រស់របស់អ្នកឱ្យកាន់តែ ស្រស់ស្អាតបែបស្ត្រីជនជាតិកូរ៉េ៖

ដំបូងគឺលាងសម្អាតផ្ទៃមុខ៖ អ្នកប្រហែលជាគិតថា ការលាងសម្អាតផ្ទៃមុខជារឿងសាមញ្ញធម្មតា ប៉ុន្តែមែនទែនទៅ ការលាងសម្អាតផ្ទៃមុខគឺ ជាជំហ៊ានដំបូងបង្អស់នៃការថែរក្សាសម្រស់របស់អ្នកដែលខ្វះពុំបាន ។ លាងមុខមិនបានស្អាត មិនជ្រះបាក់តេរី ឬ លាងជាមួយទឹកដែលសម្បូរជាតិកខ្វក់ និងបណ្ដាលឲ្យមុខអ្នក ទទួលរងផលប៉ះពាល់ខ្លាំងបំផុត ដូចជាធ្វើឲ្យមុខឡើងរោល ក្រហម ជាដើម។ លើសពីនេះ សូមធ្វើការជ្រើសរើសហ្វូមឬ សាប៊ូដែលសាកសមនិងប្រភេទស្បែករបស់អ្នក ដោយមានការត្រួតពិនិត្យត្រឹមត្រូវពីក្រសួងផងដែរ។

ប្រើទឹក Toner៖ បន្ទាប់ពីងូតទឹក លាងសម្អាតផ្ទៃមុខរួចហើយនោះ​ រឿងដែលអ្នកគួរតែធ្វើបន្ត គឺការជូតមុខជាមួយទឹក Toner។ អ្នកអាចយកទឹកTonerចាក់លើសំឡី រួចយកមកជូតស្រាលថ្នមៗ នៅបរិវេណផ្ទៃមុខរបស់អ្នក។ ការធ្វើបែបនេះ វាជួយឲ្យផ្ទៃមុខអាចរក្សាសំណើមបានគ្រប់គ្រាន់ លើសពីនេះ វាធ្វើឱ្យ មុខភ្លឺទន់រលោងដូចសាច់កូនង៉ាអញ្ចឹង។

លាបសេរ៉ូម៖ សេរ៉ូម គឺជួយមុខរបស់អ្នកបានច្រើនខ្លាំងមែនទែន ក្រៅពីជួយឱ្យ មុខមានសំណើមហើយនោះ ថែ​មទាំងជួយបង្រួមគល់រោម បណ្ដឹងស្បែកមុខរបស់អ្នកឱ្យ មានសភាបតឹង លើសពីនេះ ពន្យារភាពជ្រីវជ្រួញបានថែមទៀតផង ។

គួររម្លឹកថា ការលាបសេរ៉ូមគឺ ធ្វើឲ្យស្បែកមុខម៉ដ្ឋទន់រលោង ជាពិសេសជួយជម្រុះកោសិកាចាស់ៗនៃស្បែកមុខ ហើយបណ្ដុះកោសិកាថ្មីៗសម្រាប់ស្បែកផងដែរ។

បិទម៉ាស់៖ ការបិទម៉ាស់ គឺល្អចំពោះសាច់មុខខ្លាំងណាស់ អ្នកអាចធ្វើការបិទម៉ាសដែលមានសារធាតុចិញ្ចឹមកោសិកាមុខរបស់អ្នក ។ ក្នុងនោះ អ្នកអាចធ្វើការបិទ៣ទៅ៤ដងក្នុងមួយសប្ដាហ៍ ដើម្បីឲ្យមុខមានសំណើម សាច់មុខតឹង ភ្លឺស្រស់ថ្លា ជួយរក្សាភាពក្មេងជាងវ័យរបស់អ្នកបាន។ លើសពីនេះ ការបិទម៉ាស់និងធ្វើឲ្យសាច់មុខរបស់អ្នក ត្រជាក់និងទទួលបានសំណើមខ្ពស់ អាចស្រូបយកសារធាតុល្អៗពីក្នុងម៉ាស។

លាបឡេការពារកម្ដៅថ្ងៃ៖ ប៉ុន្មានចំណុចខាងលើ នៅមិនទាន់គ្រប់គ្រាន់សម្រាប់ផ្ទៃមុខរបស់អ្នកនៅឡើយទេ​ ដូច្នេះ អ្វីដែលអ្នកគួរធ្វើបន្ថែមនោះ គឺការលាបឡេការពារកម្ដៅថ្ងៃ​។ ការលាបឡេការពារកម្ដៅថ្ងៃ អ្នកគួរតែលាបវាជាប្រចាំ មិនថាអ្នកនៅក្នុងម្លប់ឬ ចេញទៅក្រៅនោះទេ​ ព្រោះវាសំខាន់ណាស់ សម្រាប់ការជួយការពារបាក់តេរី ផ្សែងពុល ធូលី និង ជាពិសេសការការពារពីពន្លឺព្រះអាទិត្យ។

គួរបញ្ជាក់ផងដែរថា សូម្បីតែតារាល្បីលំដាប់កំពូលK-Pop របស់កូរ៉េ កញ្ញា Yoona ក៏បានជ្រើសរើសក្បួនក្នុងការថែរក្សាសម្រស់តាមនេះដែរ។ លើសពីនេះ ប្រភពAsiaone បានបន្តទៀតថា រាតាK-Popរូបនេះតែងតែបន្តធ្វើទម្លាប់បែបនេះ បើទោះជានាងរវល់ខ្លាំងជាមួយនិងការងាររបស់នាងក៏ដោយ។

ដូច្នេះ សម្រាប់ប្រិយមិត្តអ្នកអាន ប្រសិនបើចង់បានស្បែកដែល មើលទៅសម៉ដ្ឋ ស្ទាបទៅទន់ភ្លឺរលោង គ្មានមុន និស្បែកមុខជាំនោះទេ លោកអ្នកអាចធ្វើការអនុវត្តជាមួយវិធីសាស្ត្រខាងលើបាន។

អត្ថបទដោយ៖ តឹក ស៊ីថា (Tek Sitha)