ទម្លាប់តាំងពីប្រពៃណីមួយដែលឪពុកម្ដាយខ្មែរចូលចិត្តប្រដៅកូននោះ គឺការវាយ ការជេរ ឬការថាឱ្យកូនៗ នៅពេលដែលកូនៗរបស់ខ្លួនធ្វើអ្វីមួយខុស ឬមិនស្ដាប់បង្គាប់ឪពុកម្ដាយ។ ឪពុកម្ដាយមានដឹងអត់ថា តើការប្រដៅកូនតាមរបៀបនេះវាបានជះឥទ្ធិពលអវិជ្ជមានខ្លាំងប៉ុន្មានចំពោះកូន?

បើយោងតាមប្រភពគេហៈទំព័រ Parent បានឱ្យដឹងផងដែរថា ការទម្លាប់វាយ និងជេរស្ដីកូនជាប្រចាំ អាចនាំឱ្យពួកគេជួបនឹងវិបត្តិផ្លូវចិត្ត និងមានផលប៉ះពាល់ដល់រាងកាយទៀតផង។ លោកវេជ្ជបណ្ឌិត Kazdin មានប្រសាសន៍ថា ឪពុកម្ដាយអាចវាយកូនបាន ប៉ុន្តែអ្នកត្រូវដឹងថា ការវាយកូនមិនមែនជាដំណោះស្រាយដ៏ល្អនោះទេ ហើយការវាយកូនមិនមែនជាវិធីសាស្ដ្របង្រៀនកូនៗឱ្យស្ដាប់អ្នកនោះដែរ ផ្ទុយទៅវិញការវាយកូនជាហេតុអ្វីឱ្យកូនរបស់ឈឺចុកចាប់ទាំងផ្នែករាងកាយ និងប៉ះទង្គិចផ្លូវចិត្តទៀតផង។

ទៀតសោត លោកវេជ្ជបណ្ឌិត Robert Larzelere, PhD, សាស្ត្រាចារ្យរងផ្នែកអភិវឌ្ឍន៍មនុស្ស និងវិទ្យាសាស្ត្រនៅសាកលវិទ្យាល័យ Oklahoma State បានព្រមានថា ប្រសិនបើឪពុកម្ដាយនៅតែប្រើទម្លាប់វាយ ឬប្រើសម្ដីអវិជ្ជមានចំពោះកូនទៀត នោះកូនៗនឹងជួបបញ្ហាធំទាំង ៤ នេះ៖

-ការវាយ ឬជេរកូនបង្កឱ្យមានហានិភ័យខ្ពស់នៃបញ្ហាផ្លូវចិត្តដូចជា ជំងឺបាក់ទឹកចិត្ត បញ្ហាថប់បារម្ភ តានតឹងផ្លូវចិត្ត និងប៉ះពាល់ដល់អារម្មណ៍ធ្ងន់ធ្ងរ។

-ការវាយកូនបង្កឱ្យប៉ះពាល់ដល់ដំណើរការរៀនសូត្រ ធ្វើឱ្យកូនរបស់អ្នកក្លាយជាមនុស្សឆាប់ខឹងឆេវឆៅ និងជាក្មេងខ្វះសីលធម៌។

-ការវាយកូនបង្កផលប៉ះពាល់ដល់ការអភិវឌ្ឍផ្នែកខួរក្បាលរបស់ពួកគេ ដែលធ្វើឱ្យកូនៗរៀនមិនចូល និងពិបាកក្នុងការចងចាំ។

-ការវាយកូនបង្កឱ្យប៉ះពាល់ដល់សុខភាពរាងកាយដូចជា ជំងឺបេះដូង មហារីក​ និងបញ្ហាផ្លូវដង្ហើម ដែលលោកវេជ្ជបណ្ឌត Kandin បានបន្ថែមថា សុខភាពរាងទាំងនេះវាបណ្ដាលមកពី ភាពតានតឹងនៃអារម្មណ៍ និងបញ្ហានៃប្រព័ន្ធភាពសុំារបស់ក្មេងៗ។

ដូច្នេះនៅពេលឪពុកម្ដាយអានចប់រាល់ចំណុចដូចដែលបានរៀបរាប់នេះហើយ សូមផ្លាស់ប្ដូរការវាយ កាជេរ ឬការប្រើសម្ដីអវិជ្ជមានចំពោះកូន ហើយសូមឪពុកម្ដាយកុំយកការវាយមកប្រើនៅពេលអ្នកបង្រៀនកូនៗរបស់អ្នក។ ការវាយ ការប្រើសម្ដីអវិជ្ជមានមិនបានជួយអភិវឌ្ឍកូនអ្នកនោះទេ ផ្ទុយទៅវិញវាបានធ្វើឱ្យកូនរបស់អ្នកមានវិបត្តិផ្លូវចិត្ត ឬបញ្ហាផ្នែកសុខភាពរាងកាយវិញ៕

អត្ថបទដោយ៖​ Daddy_Rath