ជំងឺលើសឈាមជាជំងឺមួយក្នុងចំណោមជំងឺមានគ្រោះថ្នាក់ដល់អាយុជីវិតលឿនបំផុត។ ពេលអ្នកឡើងសម្ពាធសរសៃឈាម មានន័យថាមានខ្លាញ់ច្រើននៅក្នុងសរសៃឈាមច្រើនឡើង។ បើអ្នកជំងឺមិនប្រយ័ត្នចំពោះបញ្ហាលើសឈាម អាចដាច់សរសៃឈាមខួរក្បាលយ៉ាងងាយ និងគាំងបេះដូងអាចស្លាប់ភ្លាមៗ ផងដែរ។ តាមលោកវេជ្ជបណ្ឌិត ឃ្លាំង សៀងលី ផ្នែកវេជ្ជសាស្ត្រទូទៅប្រចាំនៅមន្ទីរពេទ្យបង្អែកអ្នកលឿងក្នុងកិច្ចសម្ភាសន៍ជាមួយក្រុមការងារចាបបៃតងបានលើកឡើងដែរថា អ្នកមានកម្រិតស្ត្រេសយូរអាចធ្វើឱ្យសម្ពាធឈាមកើនឡើង ហើយប្រសិនបើយើងស្ត្រេស តានតឹងរ៉ាំរ៉ៃ នោះឪកាសនាំឱ្យជំងឺលើសឈាម បេះដូង និងដាច់សរសៃឈាមខួរក្បាលនឹងកាន់តែខ្ពស់។​ តើអ្នកធ្វើបែបណា ជួយកម្ចាត់ស្រ្តេស និងជំងឺលើសឈាម?

ខ្ញុំជឿថា បើអ្នកធ្វើតាមទម្លាប់១នេះ ព្រួញមួយបានសត្វបានពីរឯណោះ គឺហាត់ប្រាណ ជួយកម្ចាត់ស្រ្តេស និងលំហូរសរសៃឈាមដំណើរការស្រួលផងដែរ។ យោងតាមការលើកឡើងរបស់អ្នកឧកញ៉ាវេជ្ជបណ្ឌិត គួច ម៉េងលី​ មានប្រសាសន៍ថា “ជំងឺសសៃឈាមយើងនឹងមានបញ្ហា បើយើងមិនហាត់ប្រាណ ផឹកស្រាច្រើន ញុំាច្រើនពេក ឬញុំាសាច់មានជាតិខ្លាញ់ច្រើនពេក ហើយយើងអត់​ដុត​ជាតិខ្លាញ់តាមរយៈការហាត់ប្រាណ វានឹង​​​ស្តុកទុកក្នុងសសៃឈាមយើង ធ្វើឱ្យសសៃឈាមរួមតូច នោះវានឹងបង្កសម្ពាធឈាមឡើងខ្ពស់ មកពីខ្លាញ់ក្នុងសរសៃឈាមយើងច្រើន ធ្វើឱ្យឈាមមិនអាច​ធ្វើរត់ស្រួល”។ អ្នកកុំកំណាញនឹងខ្លួនឯង ត្រូវបើកចិត្តអូសទាញខ្លួនអ្នកឱ្យទៅហាត់ប្រាណតែម្តង ឬពីរម្តង អ្នកនឹងមានអារម្មណ៍ស្រួលខ្លួន ហើយអារម្មណ៍រីករាយផងដែរ។

ការធ្វើលំហាត់ប្រាណតាមរយៈការរត់ឬដើរក្នុងមួយថ្ងៃឱ្យបាន ៣០នាទី នឹងធ្វើឱ្យបេះដូងលោតកាន់តែខ្លាំង ធ្វើឱ្យឈាមចាប់ផ្ដើមធាក់ អារម្មណ៍ក៏ល្អដែរ។ ការមានចលនាបែបនេះ យូរៗធ្វើឱ្យរាងកាយរបស់យើងត្រូវការប្រើកម្លាំងនាំឱ្យទាញយកខ្លាញ់នៅក្នុងខ្លួននិងសរសៃឈាមមកប្រើប្រាស់ជាកម្លាំងចលនារាងកាយ។ ពេលនោះខ្លាញ់ចាប់ផ្ដើមរលាយម្ដងបន្តិចៗ យូរអស់ខ្លាញ់មិនល្អ ឱ្យដំណើរការសរសៃឈាមរត់ស្រួល និងរីករាយដល់ចាស់ផងដែរ៕ អត្ថបទដោយ៖ ទ្រ សុភាព

សៀវភៅ "លំហូរចិត្ត" លោកអ្នកអាចទិញតាម https://t.me/hangchhengH24