យោងតាមរយៈអង្កការសុខភាពពិភពលោក Whoបានសិក្សាកាលពីឆ្នាំ២០១០ ថាប្រជាជនកម្ពុជា ចំនួន១៤លាននាក់ជាង មានជំងឺលើសឈាមប្រមាណ១២ភាគរយ។ ក៏ប៉ុន្ដែមកដល់ឆ្នាំ២០២៣នេះ ប្រហែលអាចមានជំងឺច្រើនជាងឆ្នាំ២០១០ទៀត។ ជុំងឺលើសឈាមគឺជាមូលហេតុធំមួយដែលបង្កឱ្យអ្នកមានជំងឺបន្ថែមមកទៀត ដូចជាជំងឺទឹកនោមផ្អែម ខ្សោយតម្រងនោមជាដើម។ល។

ដូច្នេះហើយ ដើម្បីការពារលើសឈាមកុំឱ្យកើតមាន បងប្អូនត្រូវដឹងពីកត្តាដែលនាំឱ្យកើតជំងឺលើសឈាម។ ដើម្បីជាផ្លូវមួយជួយឱ្យបងប្អូនរកវិធីដើម្បីការពារជំងឺទុកមុន ប្រសើរជាងកើតហើយទើបលំបាកកើតទុក្ខព្យាបាលជំងឺពេលក្រោយ។ ជាធម្មតាជំងឺលើសឈាម បានចេញជារោគសញ្ញាធ្វើទុក្ខជាកើតដូចជា ឧស្សាហ៍ឈឺក្បាល ដង្ហើមខ្លី ឈាមច្រមុះ នេះបើយោងតាមរយៈគេហទំព័រ mayoclinic។ យោងតាមប្រភពwhoដដែលបានបញ្ជាក់ថា មានកត្តាជាច្រើនដែលធ្វើឱ្យមនុស្សម្នាក់ងាយកើតមានជំងឺលើសឈាមឡើងមកឆាប់រហ័សគឺកត្តារបបអាហារប្រចាំថ្ងៃ និងរបៀបរស់នៅដែលធ្វេសប្រហែលយូរនឹងឆាប់ងាយប្រឈម។

កត្តាទាំងអស់នោះមានដូចជា៖

ទីមួយ ញុំាអាហារដែលមានខ្លាញ់អាក្រក់ច្រើន ដូចជាអាហារចៀនបំពងជាដើម អាហារទាំងអស់នេះ បង្កឱ្យមានការកកស្ទះឈាមចលនាឈាមរត់ទៅបេះដូង ដែលបង្កឱ្យមានបញ្ហាលើសឈាមឡើងមក ជំងឺនេះក៏ប្រឈមគ្រោះថ្នាក់ដល់អាយុជីវិតលឿនណាស់។

ទី២ទម្លាប់ផឹកស្រាជក់បារីរាល់ថ្ងៃ ទម្លាប់នេះ ដូចដុតខ្លួនឯងឱ្យធ្លាក់ក្នុងស្ថានភាពទ្រុធទ្រោម កើតជំងឺរុំា អ្នកខ្លះមិនទាំងដឹងថាខ្លួនកំពុងតែមានជំងឺលើសឈាមហើយ។  ព្រោះស្រានិងបារីនេះ មិនបានជួយឱ្យសុខភាពអ្នកល្អ​រឹងមាំគ្មានជំងឺមកយារីនោះទេ តែវាជាមេខ្លោងនាំជំងឺជាច្រើន ដែលអាចផ្ដាច់អាយុអ្នកឱ្យខ្លី ទាំងមិនដឹងខ្លួន។ ស្រាបារីធ្វើឱ្យខូចថ្លើម ខួរក្បាល បេះដូង ជំងឺលើសឈាម ខ្សោយតម្រងនោម រួមទាំងជំងឺទឹកនោមផ្អែមជាដើម។ ដែលកំណើនជំងឺទាំងប៉ុន្មានមុខនេះ លេចធ្លោខ្លាំងបំផុតរយៈពេលប៉ុន្មានឆ្នាំចុងក្រោយ។ ដោយហេតុថាអ្នកខ្លះមានអាយុក្មេងនៅឡើយ តែមានជំងឺរុំខ្លួន ហើយប្រភេទជំងឺស្លាប់លឿនអស់លុយព្យាបាលទៀត ដូចជាជំងឺតួឯក៣នេះ​ទឹកនោមផ្អែម លើសឈាម តម្រងនោម។

ទី៣មិនដែលហាត់ប្រាណ ចង់បានសុខភាពល្អ កុំរំលងហាត់ប្រាណឱ្យសោះ ដូចជាលាររត់ ការហែលទឹក យូហ្គាជាហដើម។ ហាត់ប្រាណតែ១៥នាទីរឿងដែលអ្នកទទួលបានអារម្មណ៍ដំបូងពេលហាត់ប្រាណគឺជួយបំបាត់អារម្មណ៍តានតឹង ខឹងមួរម៉ៅបានច្រើនបំផុត បើមិនជឿអាចសាក១៥នាទីបាន​ប្រសើរជាងដេកមើលទុរស័ព្ទ។

ជាចុងក្រោយ ដើម្បីការពារជំងឺលើសឈាមកុំឱ្យកើត អ្នកគួរហាត់បន្ថយអាហារសម្បូរខ្លាញ់ អាហារប្រៃ គ្រឿងស្រវឹង​ ប្ដូរមកញុំាបន្លែផ្លែឈើឱ្យបានគ្រប់គ្រាន់និងចំណាយពេលហាត់ប្រាណខ្លះផង ជាពិសេសគួរ៦ខែធ្វើការពិនិត្យសុខភាព ដូចជា ពិនិត្យជាតិស្ករ សម្ពាសឈាម ជាតិខ្លាញ់ជាដើម ដើម្បីដឹងថាអ្នកមានបញ្ហាកន្លែងណាស្រួលព្យាបាលទាន់ពេល ឆាប់ជាអស់លុយតិច៕

អត្ថបទដោយ៖ ប៉ែត ធីតា