ជំងឺបេះដូង គឺជាជំងឺមួយ ដែលភាគច្រើនកើតលើមនុស្សចាស់ តែនាពេលបច្ចុប្បន្ននេះ ជំងឺបេះដូង មនុស្សមានអាយុតិច ក៏ប្រឈមដូចគ្នា នេះបើយោងតាមរយៈគេហទំព័រ cdc ក៏បានបញ្ជាក់ផងដែរថា ជំងឺនេះធម្មតាមិនបានចេញជារោគសញ្ញាធំដុំអ្វីនោះទេ កើតឡើងស្ងាត់ៗ ស្រួលមិនស្រួលអាចប្រឈមគាំងបេះដូង ប្រឈមគ្រោះថ្នាក់ដល់អាយុជីវិតក៏មាន។

ប្រភពដដែលក៏បានបន្ថែមផងដែរថា មនុស្សប្រហែល៦៩៧០០០នាក់នៅសហរដ្ឋអាមេរិកបានស្លាប់ដោយសារជំងឺបេះដូងក្នុងឆ្នាំ២០២០ ពោលគឺ១នាក់ក្នុងចំណោម ៥ នាក់បានស្លាប់ដោយសារជំងឺបេះដូង។

ជាក់ស្តែង ផ្អែកតាមរយៈការចែករំលែករបស់វេជ្ជបណ្ឌិត ឈរ កក្កដា ឯកទេសបេះដូង និងសរសៃឈាមបេះដូង បម្រើការនៅក្នុងមន្ទីរពេទ្យមិត្តភាពខ្មែរ-សូវៀត បានពន្យល់ឱ្យដឹងថា ជំងឺបេះដូង និងសរសៃឈាមបេះដូង គឺជាក្រុមនៃជំងឺដែលប៉ះពាល់ដល់បេះដូង និងសរសៃឈាម ដោយជំងឺទាំងនេះ អាចប៉ះពាល់ដល់ផ្នែកមួយ ឬជាច្រើននៃបេះដូង និង/ឬសរសៃឈាមក្នុងរាងកាយ។

ជាទូទៅ ចំពោះអ្នកអាចងាយនឹងវិវត្តទៅជាជំងឺបេះដូង និងសរសៃឈាមបេះដូង ច្រើនគេសង្កេតឃើញកើតមានទៅលើក្រុមមនុស្សដូចជា៖ សម្ពាធឈាមខ្ពស់ (លើសឈាម) ជំងឺទឹកនោមផ្អែមប្រភេទទី 2 ជំងឺតម្រងនោមរ៉ាំរ៉ៃ កូលេស្តេរ៉ុលខ្ពស់ (hyperlipidemia) ទម្ងន់លើស ឬធាត់ ការប្រើប្រាស់ថ្នាំជក់ (រួមទាំងការជក់បារី) ប្រវត្តិគ្រួសារនៃជំងឺបេះដូង ចូលចិត្តញុំារបបអាហារសម្បូរជាតិសូដ្យូម ស្ករ និងខ្លាញ់ ផឹកគ្រឿងស្រវឹងច្រើនពេក ការប្រើប្រាស់ថ្នាំខុសវេជ្ជបញ្ជា មិនដែលធ្វើលំហាត់ប្រាណ លក្ខខណ្ឌអូតូអ៊ុយមីន...ជាដើម។

សម្រាប់ក្រុមមនុស្សដែលកំពុងស្ថិតនៅក្នុងលក្ខខណ្ឌប្រឈមទាំងនេះ វេជ្ជបណ្ឌិត ក៏បានផ្តល់នូវវិធីសាស្ត្របង្ការមួយចំនួនផងដែរ ដើម្បីកាត់បន្ថយកុំឱ្យងាយកើតនឹងជំងឺបេះដូង និងសរសៃឈាមបេះដូងទៅថ្ងៃអនាគត៖

១. ចៀសវាងផលិតផលថ្នាំជក់ទាំងអស់

២. គ្រប់គ្រងស្ថានភាពសុខភាពផ្សេងទៀត ដូចជាជំងឺទឹកនោមផ្អែមប្រភេទទី 2 , កូលេស្តេរ៉ុលខ្ពស់ ឬសម្ពាធឈាមខ្ពស់

៣. រក្សាទម្ងន់ដែលមានសុខភាពល្អ

៤. ទទួលទានអាហារដែលមានជាតិសូដ្យូមទាប

៥. ធ្វើលំហាត់ប្រាណយ៉ាងហោចណាស់ 30 ទៅ 60 នាទីក្នុងមួយថ្ងៃ

៦. កាត់បន្ថយ និងគ្រប់គ្រងភាពតានតឹង...។

ជាចុងក្រោយ ដើម្បីការពារជំងឺបេះដូង សូមបងប្អូន ធ្វើតាមការណែនាំរបស់គ្រូពេទ្យជំនាញឱ្យបានត្រឹមត្រូវ ដើម្បីការពារសុខភាពនៅថ្ងៃខាងមុខ ព្រោះជំងឺបេះដូងនេះ គឺជាឃាតករលាក់មុខ អាចផ្ដាច់អាយុជីវិត បងប្អូនទាំងវ័យនៅក្មេង វ័យនៅពេញកម្លាំង វ័យកំពុងមានអនាគតភ្លឺស្វាង៕

អត្ថបទដោយ៖ ប៉ែត ធីតា