ការ​ធ្វើ​លំហាត់​ប្រាណ​គឺ​ជា​វិធី​ដ៏​ល្អ​បំផុត ​មួយ​ក្នុង​ការ​កាត់​បន្ថយ​ស្ត្រេស លោក Frank Lupin គ្រូបង្ហាត់ប្រាណ មានប្រសាសន៍ថា "នៅពេលហាត់ប្រាណ រាងកាយចាប់ផ្តើម បញ្ចេញ អរម៉ូន endorphins ដែលជាអរម៉ូនដែលប្រឆាំងនឹងភាពតានតឹងតារយៈញើស ជួយឱ្យស្រឡះខួរក្បាល និងបង្កើនIQ។

យោងតាមការបន្ថែមថាពីគេហទំព័រ everydayhealth បានឱ្យដឹងថា លំហាត់ប្រាណកាត់តែមានប្រសិទ្ធភាពខ្លាំងប្រសិនជាអ្នកហាត់តាមក្បាច់ត្រូវជាមួយបញ្ហាដែលអ្នកកំពុងជួបប្រទះ។ មានន័យថាលំហាត់ប្រាណគ្រប់ក្បាច់ទាំងអស់សុទ្ធតែមានអត្ថប្រយោជន៍ផ្សេងៗគ្នា ឧទាហរណ៍៖ ប្រសិនជាអ្នកកំពុងស្រ្តេស ខួរកំពុងស្ពឹក ខួរក្បាលIQទាប ប៉ុន្តែអ្នកបែរជាទៅហាត់ប្រាណក្បាច់សម្រាប់អ្នកសម្រកគីឡូក៏ជួយដោះស្រាយបញ្ហាអ្នកមិនបានដែរ។ ដូច្នេះប្រសិនជាអ្នកចង់ឱ្យបាត់ស្រ្តេស ខួរលែងស្ពឹក កើនIQ គួរហាត់៣ក្បាច់ខាងក្រោមល្អបំផុត៖

១. ក្បាច់ aerobic៖ មានដូចជាការរត់ ការដើរ ការរាំ ការបង្វិលកង និងការជិះស្គី...ត្រូវបានគេចាត់ទុកជាលំហាត់ប្រាណបង្កើនអត្រាបេះដូង ជួយឱ្យរាងកាយបញ្ចេញសារធាតុ endorphins ធ្វើអោយអ្នកមានអារម្មណ៍ល្អ ស្រស់ស្រាយខួរក្បាល ស្រ្តេសមានទាំងប៉ុន្មានរសាយអស់ក្រោយពីអ្នកបានហាត់ប្រាណក្បាច់នេះ។

២. យូហ្គា៖ ជាលំហាត់ប្រាណបំបាត់ភាពតានតឹងដ៏ល្អឥតខ្ចោះ ពាក់ព័ន្ធនឹងការផ្លាស់ប្តូរ ឥរិយាបថ។ លំហាត់ប្រាណយូហ្គា ជួយឱ្យផ្លូវចិត្តធូស្រាល បន្ធូរភាពតានតឹង កាត់ស្រ្តេស ឈាមដើរស្រួល ខួរក្បាលស្រឡះ គិតអ្វីឆាប់ចេញ។ បើអ្នកចំណាយពេលហាត់បាន៣០នាទីក្នុងមួយថ្ងៃល្អបំផុត។

៣. តៃជី៖ ប្រជាពលរដ្ឋខ្មែរយើងមិនសូវនិយមហាត់ក្បាច់នេះទេ ប៉ុន្តែបើយើងក្តឡែកទៅមើលប្រទេសផ្សេងៗដូចជា ចិន ជប៉ុន កូរ៉េ ក្បាច់តែជីនេះត្រូវបានគេចាត់ទុកជាលំហាត់ប្រាណសង្រ្គោះខួរក្បាល កាត់បន្ថយភាពតានតឹង ពួកគេតែងហាត់ប្រាណក្បាច់នេះនៅពេលល្ងាចបន្ទាប់ពីសម្រាកពីការងារ ដើម្បីផ្តល់ចំណីទៅដល់ខួរក្បាល និងទុកពេលឱ្យខួរក្បាលមានពេលសម្រាក ព្រមទាំងដេញស្រ្តេសផងដែរ។ អត្ថប្រយោជន៍ជាច្រើនចំពោះសុខភាព៖ តៃជី អាចជួយកសាងដង់ស៊ីតេឆ្អឹង បន្ថយសម្ពាធឈាម បង្កើនប្រព័ន្ធភាពស៊ាំក្នុងរាងកាយ។ ហាត់រយៈពេល៣០នាទីក្នុង១ថ្ងៃនៅពេលព្រឹកឬពេលល្ងាចល្អបំផុត៕

អត្ថបទដោយ៖ មឿន គន្ធា