រដ្ឋបាលក្រុងបាងកក (BMA) កំពុងបញ្ជាឱ្យសាលារៀនក្នុងរាជធានីទាំងអស់ត្រូវអនុវត្តតាមវិធានការបង្ការជំងឺដៃ ជើង និងមាត់ (HFMD) មេរោគផ្លូវដង្ហើម (RSV) និងជំងឺគ្រុនឈាមចាប់តាំងពីមេរោគបានរីករាលដាលក្នុងចំណោមកុមារនៅសាលា។ នេះបើយោងតាមការចុះផ្សាយរបស់សារព័ត៌មាន Bangkok Post ។
កាលពីម្សិលមិញនេះអភិបាលក្រុងបាងកក លោក Chadchart Sittipunt បានធ្វើជាអធិបតីក្នុងព្រឹត្តិការណ៍មួយនៅសាលា Wichuthit ក្នុងសង្កាត់ Din Daeng ដើម្បីលើកកម្ពស់អនាម័យ និងការការពារមេរោគនៅក្នុងសាលារៀន។ ដោយលោកអភិបាលក្រុងនិយាយថា ចំនួនករណីជំងឺ HFMD គឺខ្ពស់ជាងឆ្នាំមុនដល់ទៅ ៥ ដង ហើយភាគច្រើនជំងឺនេះត្រូវបានរកឃើញនៅក្នុងមជ្ឈមណ្ឌលថែទាំកុមារ និងក្នុងចំណោមកុមារដែលមានអាយុក្រោម ៥ ឆ្នាំ ។
យ៉ាងណាមិញករណីជំងឺ HFMD មានចេញអាការគ្រុនក្តៅ ក្នុងរយៈពេល ៣ ថ្ងៃដំបូង មុនពេលឡើងកន្ទួលលើដៃ ជើង និងក្នុងមាត់ ។ ប៉ុន្តែទោះបីជាយ៉ាងណាក៏ដោយ មិនមានករណីស្លាប់ ដោយសារជំងឺ HFMD នៅឆ្នាំនេះនោះទេ ។
ប្រសិនបើថ្នាក់រៀនជាច្រើនត្រូវបានរកឃើញ មានសិស្សកើតជំងឺ HFMD, RSV និងជំងឺគ្រុនឈាម ដែលសុទ្ធតែជាជំងឺឆ្លងខ្លាំងនោះ សាលានឹងត្រូវបិទជាបណ្តោះអាសន្ន ហើយពួកគេអាចព្យាបាលនៅផ្ទះបានក្នុងរយៈពេល ៥-៧ ថ្ងៃ ប៉ុន្តែចំពោះក្មេងដែលមិនបានទទួលការព្យាបាលទាន់ពេលវិញ អាចវិវត្តទៅជារោគសញ្ញាគំរាមកំហែងដល់អាយុជីវិតជាក់ជាមិនខាន ៕
អត្ថបទដោយ៖ ស្រីណុច